సచిన్ గ్రేట్ బ్యాటర్.. నా పేరు చెబుతాడని అనుకోలేదు : పాక్ మాజీ ఆల్‌రౌండర్
క్రికెట్ దిగ్గజం సచిన్ టెండుల్కర్ గురించి ప్రత్యేకంగా చెప్పనక్కర్లేదు. తన కెరీర్ లో లెక్కకుమించి రికార్డులను నమోదు చేశాడు. అయితే తనను ఇబ్బంది పెట్టిన బౌలర్లు ఉన్నారని సచిన్ స్వయంగా చెప్పడం విశేషం. అయితే మెక్‌గ్రాత్, షేన్ వార్న్, వసీమ్ అక్రమ్ కాకుండా పాకిస్థాన్ మాజీ ఆల్ రౌండర్ అబ్దుల్ రజాక్ పేరును సచిన్ చెప్పారు. అతడి బౌలింగ్ విధానం బాగుంటుందని సచిన్ ప్రశంసలు కురిపించాడు. సచిన్ వ్యాఖ్యలపై తాజాగా అబ్దుల్ రజాక్ సంతోషం వ్యక్తం చేశారు. సచిన్ లాంటి గ్రేట్ ప్లేయర్ తనను ప్రశంసించడం ఊహించలేదని పేర్కొన్నారు.
సచిన్, సెహ్వాగ్ ప్రమాదక బ్యాటర్లు
సచిన్ టెండుల్కర్ ఎప్పటికీ ప్రపంచ స్థాయి అత్యుత్తమ బ్యాటర్ అని, అలాంటి అతను కష్టమైన బౌలర్‌గా తన పేరును చెప్పాల్సిన అవసరం లేదని, గ్లెన్ మెక్‌గ్రాత్, వసీమ్ అక్రమ్, ఆంబ్రోస్, వాల్ష్, ముత్తయ్య ఇలా ఎవరి పేరు అయినా చెప్పుంటే బాగుండేదని, అయితే తన పేరును చెప్పడాన్ని గౌరవంగా భావిస్తానని అబ్దుల్ రజాక్ వెల్లడించారు. గత మార్చిలో వీరేంద్రసెహ్వాగ్, సచిన్‌టెండుల్కర్ గురించి రజాక్ కీలక వ్యాఖ్యలు చేసిన విషయం తెలిసిందే. వారిద్దరిని ఔట్ చేయడానికి తమ జట్టు తీవ్రంగా ప్రణాళికలు రచిందేనని, వారిని ఔట్ చేస్తే తాము మ్యాచును గెలిచినట్లేనని, ఇక తమ జట్టు బ్యాటర్లు అయితే జహీర్ ఖాన్, ఇర్ఫాన్ ఫఠాన్ బౌలింగ్ ను ఎదుర్కోవడానికి ప్రణాళికలు వేసేవారని అతను చెప్పుకొచ్చాడు.
