Sarfaraz Khan: సర్పరాజ్ కు డబుల్ ధమాకా.. పుట్టినరోజున అదిరిపోయే గిఫ్ట్
న్యూజిలాండ్‌తో జరిగిన టెస్టులో తన సెంచరీతో అదరగొట్టిన సర్ఫరాజ్ ఖాన్, ఇంట్లో కూడా మరింత సంతోషం నెలకొంది. అతని సతీమణి సోమవారం పండంటి మగబిడ్డకు జన్మనిచ్చారు. సర్ఫరాజ్ తన ఇన్‌స్టాగ్రామ్ ఖాతాలో ఈ శుభవార్తను పంచుకున్నారు. బిడ్డను ఎత్తుకున్న ఫొటోలను కూడా షేర్ చేశారు. ఇది చూసిన అభిమానులు, స్నేహితులు శుభాకాంక్షలు తెలిపారు. గతేడాది ఆగస్టులో సర్ఫరాజ్ ఖాన్ రోమానా జహూర్‌ను వివాహమాడిన విషయం తెలిసిందే. ఈ ఏడాది ఆరంభంలో, రాజ్‌కోట్ వేదికగా ఇంగ్లాండ్ టెస్టు సిరీస్‌లో టీమ్‌ఇండియాకు సర్ఫరాజ్ అరంగేట్రం చేశాడు.
న్యూజిలాండ్‌తో రెండో ఇన్నింగ్స్‌లో 150 పరుగులు
ఆ మ్యాచ్‌ ప్రారంభానికి ముందు, భారత దిగ్గజ స్పిన్నర్ అనిల్ కుంబ్లే చేతుల మీదుగా అతను తన తొలి టోపీని అందుకున్నాడు. ఆ సమయంలో అతని భార్య రోమానా, తండ్రి, కోచ్‌ కూడా అయిన నౌషద్ ఖాన్ చాలా భావోద్వేగానికి గురయ్యారు. ఇక ఇటీవల న్యూజిలాండ్‌తో జరిగిన తొలి టెస్టులో,ఈ 26 ఏళ్ల ముంబై కుర్రాడు తన అంతర్జాతీయ క్రికెట్‌లో తొలి శతకాన్ని సాధించాడు. మొదటి ఇన్నింగ్స్‌లో అతను తేలిపోయినప్పటికీ, రెండో ఇన్నింగ్స్‌లో 150 పరుగులు చేసి జట్టును ఓటమి నుంచి కాపాడాడు. తీవ్రమైన ఒత్తిడిలోనూ అద్భుతమైన ఇన్నింగ్స్‌ ఆడిన సర్ఫరాజ్, ఆ మ్యాచ్‌లో సెన్సేషన్‌గా నిలిచాడు.
