T20 World Cup 2026: భారత్‌ వేదికగా టీ20 వరల్డ్‌కప్‌.. ఈసారి ప్రైజ్‌మనీకి భారీ పెంపు?

వ్రాసిన వారు Jayachandra Akuri

Feb 03, 2026

04:38 pm

ఈ వార్తాకథనం ఏంటి

2026 పురుషుల ఐసీసీ టీ20 వరల్డ్‌కప్‌ ఫిబ్రవరి 7 నుంచి భారత్, శ్రీలంక వేదికలుగా ప్రారంభం కానుంది. టోర్నీకి వారం కూడా సమయం లేకపోవడంతో ఈ ఎడిషన్‌కు సంబంధించిన అధికారిక ప్రైజ్‌మనీ వివరాలను ఐసీసీ త్వరలోనే ప్రకటించనుంది. అయితే భారత్‌కు ఉన్న వాణిజ్య ప్రాధాన్యం, భారీ బ్రాడ్‌కాస్ట్‌ విలువలను దృష్టిలో ఉంచుకుంటే 2026 వరల్డ్‌కప్‌లో రికార్డు స్థాయి బహుమతులు ఉండనున్నాయని క్రీడా నిపుణులు అంచనా వేస్తున్నారు.

Details

2024 టీ20 వరల్డ్‌కప్‌లో రికార్డు బహుమతులు

వెస్టిండీస్‌, అమెరికా సంయుక్తంగా నిర్వహించిన 2024 టీ20 వరల్డ్‌కప్ క్రికెట్ చరిత్రలోనే ఆర్థికంగా కొత్త రికార్డులు సృష్టించింది. ఆ టోర్నీలో విజేతగా నిలిచిన భారత్‌కు 24.5 లక్షల డాలర్లు (సుమారు రూ.20 కోట్లకు పైగా) ప్రైజ్‌మనీగా లభించింది. ఫైనల్‌లో భారత్ చేతిలో ఓడిన దక్షిణాఫ్రికాకు రన్నరప్‌గా 12.8 లక్షల డాలర్లు అందాయి. అంతేకాదు, టోర్నీలో ముందే నిష్క్రమించిన జట్లకూ గణనీయమైన బహుమతులు ఇచ్చారు. సూపర్‌-8 దశకు చేరిన ప్రతి జట్టుకు 3.82 లక్షల డాలర్ల వరకు ప్రైజ్‌మనీ అందింది. విస్తృత ఫార్మాట్ కారణంగా ఆర్థిక లాభాలు మరింత జట్లకు చేరాయి.

Details

భారత్‌కు హోస్ట్‌గా అరుదైన అవకాశం

2026 వరల్డ్‌కప్‌లో భారత్ హోస్ట్ దేశంగా విజేతగా నిలిచే తొలి జట్టుగా అవతరించే అవకాశం ఉండటం ఈ టోర్నీపై ఆసక్తిని మరింత పెంచుతోంది. ఈ మెగా టోర్నీకి భారత్‌లో ఐదు, శ్రీలంకలో మూడు కీలక వేదికలు ఎంపికయ్యాయి. టోర్నీ ఫార్మాట్ 2024 ఎడిషన్ మాదిరిగానే కొనసాగనుంది. మొత్తం 20 జట్లను నాలుగు గ్రూపులుగా విభజిస్తారు. ప్రతి గ్రూప్‌లో ఐదు జట్లు ఉంటాయి. గ్రూప్ దశలో టాప్‌-2లో నిలిచిన జట్లు సూపర్‌-8 దశకు చేరుకుంటాయి. అక్కడ రెండు గ్రూపులుగా విభజించి సెమీఫైనల్స్‌కు అర్హత సాధించాల్సి ఉంటుంది.

Details

డిఫెండింగ్ ఛాంపియన్‌గా బరిలోకి భారత్

భారత జట్టు డిఫెండింగ్ ఛాంపియన్‌గా 2026 వరల్డ్‌కప్‌లో అడుగుపెట్టనుంది. 2024లో భారత్ రెండోసారి టీ20 వరల్డ్‌కప్‌ను గెలిచి, ఇంగ్లాండ్‌, వెస్టిండీస్‌ సరసన నిలిచింది. ఇప్పటివరకు ఏ జట్టూ వరుసగా రెండు టీ20 వరల్డ్‌కప్‌లు గెలవలేదు. హోస్ట్ దేశంగా ఏ జట్టూ టైటిల్‌ సాధించలేదు ఈ నేపథ్యంలో 2026 టోర్నీ భారత్‌కు చారిత్రాత్మక అవకాశంగా మారింది.

Details

ఇప్పటివరకు టీ20 వరల్డ్‌కప్ విజేతలు

భారత్ - 2007, 2024 పాకిస్తాన్ - 2009 ఇంగ్లాండ్ - 2010, 2022 వెస్టిండీస్ - 2012, 2016 శ్రీలంక - 2014 ఆస్ట్రేలియా - 2021