ప్రపంచ కప్ జట్టులోకి స్టార్ స్పిన్నర్ రవిచంద్రన్ అశ్విన్.. చెప్పకనే చెప్పేసిన కెప్టెన్ రోహిత్
ఈ వార్తాకథనం ఏంటి
టీమిండియా స్టార్ స్పిన్నర్ రవిచంద్రన్ అశ్విన్ జట్టులోకి గ్రాండ్ ఎంట్రీ ఇవ్వనున్నారు. ఈ మేరకు ఆస్ట్రేలియాతో జరగనున్న వన్డే సిరీస్‌కు ఎంపికైన అశ్విన్, వరల్డ్ కప్ సైతం ఆడనున్నట్లు తెలుస్తోంది. గాయపడ్డ అక్షర్ పటేల్ స్థానాన్ని భర్తీ చేయనున్నట్లు సమాచారం. ఇటీవలే భారత కెప్టెన్ రోహిత్ శర్మ చేసిన వ్యాఖ్యలు సైతం దీనికి బలాన్ని అందిస్తున్నాయి. సోమవారం సెలక్షన్ కమిటీ ప్రకటించిన జాబితాలో 37 ఏళ్ల అశ్విన్ తిరిగి జట్టులోకి ప్రవేశించారు. ఈ క్రమంలోనే ఆస్ట్రేలియాతో మూడు వన్డేలకు ఎంపికయ్యాడు. స్పిన్ ఆల్ రౌండర్‌గా రవిచంద్రన్ అశ్విన్ ఎల్లప్పుడూ జట్టు దృష్టిలో ఉంటారని, ఆసియా కప్ ముగిసిన సందర్భంలో రోహిత్ అన్నారు. ఈ నేపథ్యంలోనే తరచూగా అతడితో టచ్‌లో ఉంటానని చెప్పుకొచ్చారు.
DETAILS
అదే జరిగితే ప్రపంచ కప్ జట్టులోకి రానున్న అశ్విన్
ఇప్పటివరకు 113 వన్డే మ్యాచులు ఆడిన అశ్విన్ 151 వికెట్లు నేలకూల్చాడు. గతేడాది జనవరిలో చివరిసారిగా వన్డే మ్యాచ్ ఆడాడు. బ్యాటింగ్‌లోనూ 86.96 స్ట్రైక్ రేటుతో 707 పరుగులు చేశాడీ స్పిన్ వీరుడు. అన్నింటినీ దృష్టిలో పెట్టుకుని అశ్విన్‌ను టీమిండియా యజమాన్యం ఆస్ట్రేలియాతో జరిగే వన్డే సిరీస్‌కు సెలెక్ట్ చేయడం గమనార్హం. అక్షర్ పటేల్ జట్టుకు దూరమైతే, అశ్విన్ వరల్డ్ కప్ జట్టులోనూ చేరడం లాంఛనమే కానుంది. దీంతో కుల్‌దీప్ యాదవ్, రవీంద్ర జడేజా, రవిచంద్రన్ అశ్విన్‌లు భారత స్పిన్ విభాగాన్ని నిర్వహించనున్నారు. ఈ నెల 22, 24, 27లో భారత్-ఆస్ట్రేలియా జట్ల మధ్య వన్డేలు జరగనున్నాయి. మరోవైపు అక్టోబర్ 5 నుంచి వన్డే వరల్డ్ కప్ ప్రారంభం కానుంది.