IPL Records: ఆ రికార్డ్ బద్దలు కొట్టిన చిచ్చర పిడుగులు.. వైభవ్ జోడీ యమ డేంజర్!
ఈ వార్తాకథనం ఏంటి
గువాహటిలో రాయల్ ఛాలెంజర్స్ బెంగళూరుతో జరగనున్న కీలక మ్యాచ్కు ముందు, రాజస్థాన్ రాయల్స్ ఓపెనర్లు సంచలన రికార్డుతో అందరి దృష్టిని ఆకర్షించారు. రాజస్థాన్ రాయల్స్ జోడీ కేవలం 248 బంతుల్లోనే 500 పరుగుల భాగస్వామ్యాన్ని పూర్తి చేసి, ఐపీఎల్ చరిత్రలో అత్యంత వేగంగా ఈ మైలురాయిని అందుకున్న భారత ఓపెనింగ్ జోడీగా రికార్డు సృష్టించింది. ముంబయి ఇండియన్స్ తో జరిగిన గత మ్యాచ్లో ఈ జోడీ బ్యాటింగ్ బౌలర్లకు నిజమైన భయంకర అనుభవంగా మారింది. 11 ఓవర్ల పరిమితి మ్యాచ్లో 15 ఏళ్ల వైభవ్ సూర్యవంశీ కేవలం 14 బంతుల్లో 39 పరుగులు చేసి మెరుపులు మెరిపించాడు. మరోవైపు యశస్వి జైస్వాల్ 32 బంతుల్లో 77 పరుగులతో విరుచుకుపడ్డాడు.
వివరాలు
సెహ్వాగ్-గంభీర్ 10 ఏళ్ల రికార్డు బద్దలు
గతంలో ఢిల్లీ ఫ్రాంచైజీ తరపున వీరేంద్ర సెహ్వాగ్ , గౌతమ్ గంభీర్ జోడీ 309 బంతుల్లో 500 పరుగుల భాగస్వామ్యాన్ని నమోదు చేసి దశాబ్ద కాలంగా రికార్డు నిలబెట్టింది. ఆ రికార్డును వైభవ్-యశస్వి జోడీ కేవలం 248 బంతుల్లోనే అధిగమించడం విశేషం. అయితే ఓవరాల్ ఐపీఎల్ చరిత్రలో అత్యంత వేగవంతమైన 500 పరుగుల భాగస్వామ్య రికార్డు మాత్రం సన్రైజర్స్ హైదరాబాద్ ఓపెనర్లు ట్రావిస్ హెడ్, అభిషేక్ శర్మ పేరిటే ఇంకా కొనసాగుతోంది.
వివరాలు
బౌలర్లకు భయంకర జోడీగా RR ఓపెనర్లు
ఈ సీజన్లో రాజస్థాన్ రాయల్స్ ఆడిన మూడు మ్యాచ్ల్లోనూ ఈ ఓపెనింగ్ జోడీ కనీసం 50పైగా భాగస్వామ్యాలను నమోదు చేయడం ప్రత్యేకత. యువ సంచలనం వైభవ్ సూర్యవంశీ ఇప్పటివరకు 10 ఐపీఎల్ మ్యాచ్ల్లో 374 పరుగులు సాధించాడు. అతని స్ట్రైక్ రేట్ 218.72గా ఉండగా, ఇందులో 35 బంతుల్లో చేసిన సెంచరీ కూడా ఉంది. ఇక యశస్వి జైస్వాల్ 69 మ్యాచ్ల్లో 2,356 పరుగులతో తన స్థిరమైన ప్రదర్శనను కొనసాగిస్తున్నాడు.