Sinquefield Cup 2025: సింక్విఫీల్డ్ కప్‌లో గుకేశ్ డ్రా.. నాలుగో స్థానానికి ప్రగ్యానంద
ఈ వార్తాకథనం ఏంటి
సెయింట్ లూయిస్‌లో జరుగుతున్న సింక్విఫీల్డ్ కప్ 2025లో బుధవారం భారత చెస్‌ ఆటగాళ్లకు పెద్ద విజయాలు లభించలేదు. ప్రపంచ చాంపియన్ డి. గుకేశ్ అమెరికా ఆటగాడు, ప్రపంచ 42వ ర్యాంకర్ సామ్ సెవియన్‌తో డ్రా చేసుకోగా, ఆర్. ప్రగ్యానంద ఆజర్బైజాన్‌కు చెందిన నోడిర్‌బెక్ అబ్దుసత్తరోవ్‌ను ఓడించలేకపోవడంతో లైవ్ రేటింగ్‌లో మూడో స్థానాన్ని కోల్పోయాడు. మొదటి రౌండ్‌లో గుకేశ్‌పై అద్భుత విజయం సాధించి, లైవ్ ర్యాంకింగ్స్‌లో మూడో స్థానానికి ఎగబాకిన ప్రగ్యానంద (20 ఏళ్లు), బుధవారం నల్లపావులతో ఆడినప్పటికీ నోడిర్‌బెక్‌తో డ్రా చేయడంతో తిరిగి నాలుగో స్థానానికి పడిపోయాడు. ఈ స్థానాన్ని అమెరికాకు చెందిన ఫాబియానో కారువానా భర్తీ చేశాడు.
వివరాలు
కారువానా తిరిగి మూడో స్థానంలోకి..
మూడో రౌండ్‌లో అలిరెజా ఫిరూజ్జాపై గెలిచిన కారువానా, తన మూడో స్థానాన్ని తిరిగి సాధించుకున్నాడు. ఆ రౌండ్‌లో గెలుపు సాధించిన ఏకైక ఆటగాడిగా నిలిచాడు. మిగతా నాలుగు గేములు డ్రాగా ముగిశాయి. మూడో రౌండ్‌ తర్వాత ప్రగ్యానంద, కారువానా, లెవాన్ అరోనియన్‌.. ముగ్గురూ చెరో రెండు పాయింట్లతో జాయింట్ లీడర్లుగా ఉన్నారు. గుకేశ్, ఫిరూజ్జా, వెస్లీ సో, మాక్సీమ్ వాచియర్-లాగ్రావ్, సెవియన్‌లు 1.5 పాయింట్లతో రెండో స్థానంలో బరిలో ఉన్నారు. జాన్-క్రిజిస్టోఫ్ డూడా 1 పాయింట్‌తో మూడో స్థానంలో ఉండగా, నోడిర్‌బెక్‌కు ఇప్పటివరకు సగం పాయింట్ మాత్రమే ఉంది. ప్రపంచ 5వ ర్యాంకర్ గుకేశ్‌కి సెవియన్‌పై విజయం సాధించే అవకాశం ఉన్నా,అది సాకారం కాలేదు.
వివరాలు
నిరాశపరిచిన గుకేశ్ డ్రా
నల్ల పావులతో ఆడిన గుకేశ్,సిసిలియన్ డిఫెన్స్ ఓపెనింగ్‌లో కొంత ఒత్తిడి సృష్టించినప్పటికీ, ఆట 44 మూవ్స్ తర్వాత డ్రాగా ముగిసింది. "బ్లాక్‌తో డ్రా రావడం ఎప్పుడూ మంచిదే. కొంత ఒత్తిడి ఉన్నా,గెలిచే అవకాశం పెద్దగా రాలేదు. సెవియన్ చాలా బలమైన ఆటగాడు. 2023లో షార్జాలో కూడా అతనితో ఆడాను,అప్పట్లో కూడా సిసిలియన్‌తోనే డ్రా అయ్యింది,"అని మ్యాచ్ తర్వాత గుకేశ్ తెలిపారు. తదుపరి రౌండ్‌లో ఫ్రాన్స్ స్టార్ మ్యాక్సీమ్ వాచియర్-లాగ్రావ్ (MVL)తో తలపడనున్న గుకేశ్, "MVL గేమ్స్ ఎప్పుడూ చాలా ఎగ్జైటింగ్‌గా ఉంటాయి.రేపు మంచి గేమ్ ఆడాలి ఏం జరుగుతుందో చూద్దాం," అన్నారు. ఇక నాలుగో రౌండ్‌లో ప్రగ్యానంద సెవియన్‌తో తలపడనున్నాడు. ప్రపంచ చాంపియన్‌ని డ్రాలో నిలిపిన సెవియన్ ఈ మ్యాచ్‌కు ఉత్సాహంగా దిగనున్నాడు.