Gaza - Israel: గాజా హ్యుమానిటేరియన్ జోన్‌పై ఇజ్రాయిల్ దాడి.. 40 మంది మృతి..60 మందికి గాయలు
ఈ వార్తాకథనం ఏంటి
పాలస్తీనాలో ఇజ్రాయెల్ దాడులు కొనసాగుతున్నాయి. తాజాగా దక్షిణ పాలస్తీనాలో ఉన్న నిరాశ్రయ ప్రాంతంపై ఇజ్రాయెల్ దాడి చేయడంతో 40 మంది ప్రాణాలు కోల్పోగా.. మరో 60 మంది తీవ్రంగా గాయపడ్డారు.
గాజా సివిల్ డిఫెన్స్ ఈ విషయాన్ని మంగళవారం అధికారికంగా ప్రకటించింది. ఈ దాడి గాజాలోని ఖాన్ యునిస్ పట్టణంలోని అల్ మవాసీ ప్రాంతంపై జరిగింది.
ఇజ్రాయెల్ సైన్యం ఈ ప్రాంతాన్ని గతంలో సురక్షితమైనదిగా గుర్తించిందని, ఇక్కడ దాడులు జరగదని చెప్పినప్పటికీ, దాడికి పాల్పడడం గమనార్హం.
అయితే ఇజ్రాయెల్ సైన్యం హమాస్ ఉగ్రవాద కేంద్రంపై దాడి చేసినట్లు వివరణ ఇచ్చింది. ఈ ప్రాంతంలో దాదాపు 10,000 మంది పాలస్తీనియన్లు ఆశ్రయం పొందుతున్నారని తెలుస్తోంది.
వివరాలు
దాడిలో 20-40 టెంట్లు ధ్వంసమై, భారీ గుంతలు
రాత్రి సమయంలో జరిగిన ఈ దాడిలో 40 మంది మరణించారని, 60 మంది గాయపడినట్లు గాజా సివిల్ డిఫెన్స్ అధికారి మహ్మద్ అల్ ముఘైర్ ప్రకటించారు.
దాడి అనంతరం 15 మంది కనిపించకుండా పోయారని, వారి కోసం గాలింపు చర్యలు చేపడుతున్నామని తెలిపారు.
హమాస్ ప్రతినిధి మహమూద్ బసల్ ఈ దాడిని హెచ్చరించకుండా జరిపారని, సహాయక చర్యలకు ఇజ్రాయెల్ దాడులు తీవ్ర ఆటంకం కలిగిస్తున్నాయని పేర్కొన్నారు.
దాడిలో 20-40 టెంట్లు ధ్వంసమై, భారీ గుంతలు ఏర్పడ్డాయని అన్నారు.
వివరాలు
నిరాశ్రయుల కేంద్రంలో ఉగ్రవాదులు
ఇజ్రాయెల్ కూడా ఈ దాడిని ధృవీకరించింది. ఖాన్ యునిస్‌లోని హమాస్ ఉగ్రవాదుల కమాండ్ అండ్ కంట్రోల్ సెంటర్‌పై దాడి చేశామని, హమాస్ ఉగ్రవాదులను మట్టుబెట్టామని తెలిపింది.
మానవత సహాయ కేంద్రాలను హమాస్ దుర్వినియోగం చేస్తున్నట్లు ఇజ్రాయెల్ ఆరోపించింది.
అయితే హమాస్ మాత్రం ఈ ఆరోపణలను ఖండిస్తూ, నిరాశ్రయుల కేంద్రంలో ఉగ్రవాదులు ఉన్నారని చెప్పడం అసత్యమని పేర్కొంది.