Pakistan : పాకిస్తాన్‌లో ఘోర ప్రమాదం.. బస్సు లోయలోపడి ; 20 మంది మృతి
వాయువ్య పాకిస్తాన్‌లో శుక్రవారం కొండ ప్రాంతం నుండి ప్రయాణీకుల బస్సు లోయలో పడిపోవడంతో కనీసం 20 మంది మరణించారు. గిల్గిత్-బాల్టిస్థాన్ ప్రాంతంలోని డయామర్ జిల్లాలోని కారకోరం హైవేపై ఈ ఘటన చోటుచేసుకుందని పోలీసు అధికారి తెలిపారు. బస్సు రావల్పిండి నుంచి హుంజా వెళ్తోంది.ఈ క్రమంలో డ్రైవర్ వాహనంపై నియంత్రణ కోల్పోయాడు. బస్సులో ఎంతమంది ప్రయాణికులు ఉన్నారనే విషయంపై స్పష్టత లేదని అధికారి తెలిపారు. ఈ ఘటనలో గాయపడిన 15 మందిని చిలాస్‌లోని ఆసుపత్రికి తరలించారు.సహాయక చర్యలు కొనసాగుతున్నాయని, మృతదేహాలను ఆసుపత్రికి తరలిస్తున్నట్లు అధికారి తెలిపారు. మృతుల్లో ముగ్గురు మహిళలు కూడా ఉన్నారని ఆసుపత్రి వర్గాలు తెలిపాయి.క్షతగాత్రులలో పలువురి పరిస్థితి విషమంగా ఉన్నందున మృతుల సంఖ్య మరింత పెరిగే అవకాశం ఉందని అధికారులు తెలిపారు.
ప్రమాదంపై గిల్గిత్ బాల్టిస్థాన్ సీఎం విచారం
ఈ ఘటనపై గిల్గిత్ బాల్టిస్థాన్ ముఖ్యమంత్రి హాజీ గుల్బర్ ఖాన్ విచారం వ్యక్తం చేశారు. గాయపడిన వారికి తక్షణ వైద్య సహాయం అందించాలని ఆదేశించారు. ప్రమాదం తర్వాత చిలాస్ ఆసుపత్రిలో అత్యవసర పరిస్థితిని ప్రకటించామని గిల్గిత్-బాల్టిస్థాన్ ప్రభుత్వ ప్రతినిధి ఫైజుల్లా ఫరక్ తెలిపారు.
