Bangladesh: బంగ్లాదేశ్‌లో పరిస్థితి విషమం.. హై అలర్ట్ ప్రకటించిన BSF.. అంతర్జాతీయ సరిహద్దులో నిఘా
బంగ్లాదేశ్‌లో హింసాకాండ నేపథ్యంలో ప్రధాని షేక్ హసీనా రాజీనామా చేసి ఆర్మీ హెలికాప్టర్‌లో దేశం విడిచిపెట్టారు. మరోవైపు భారత్ అప్రమత్తమైంది. సరిహద్దు భద్రతా దళం (BSF) భారత్-బంగ్లాదేశ్ అంతర్జాతీయ సరిహద్దులో హై అలర్ట్ జారీ చేయడం ద్వారా నిఘా పెంచింది. టైమ్స్ ఆఫ్ ఇండియా ప్రకారం, 4,096 కి.మీ పొడవైన సరిహద్దులో జాగ్రత్తలు తీసుకోవాలని BSF ఆదేశాలు ఇచ్చింది. అలాగే, అన్ని భద్రతా విభాగాలు అప్రమత్తంగా ఉండాలని కోరారు.
కోల్‌కతా చేరుకున్న బీఎస్ఎఫ్ డైరెక్టర్ జనరల్
భారత్-బంగ్లాదేశ్ సరిహద్దు భద్రతను సమీక్షించేందుకు బీఎస్ఎఫ్ డైరెక్టర్ జనరల్ (యాక్టింగ్) దల్జీత్ సింగ్ చౌదరి, ఆయనతోపాటు సీనియర్ అధికారులు కోల్‌కతా చేరుకున్నారు. భారతదేశం,బంగ్లాదేశ్ సరిహద్దులు ఒకదానికొకటి అనుసంధానించబడి ఉన్నాయి. బంగ్లాదేశ్ నుంచి చొరబాటుదారులు భారత్‌లోకి ప్రవేశించారనే వార్తలు చాలాసార్లు వెలుగులోకి వచ్చాయి. ప్రస్తుత పరిణామాలను సద్వినియోగం చేసుకుని దుండగులు, ఉగ్రవాదులు భారత్‌లోకి ప్రవేశించే అవకాశం ఉంది.
ప్రధాని నివాసంలోకి ఆందోళనకారులు
బంగ్లాదేశ్‌లో పరిస్థితి మరింత దిగజారుతోంది. ప్రధాని అధికారిక నివాసం గణ భవన్‌లోకి వేలాది మంది ఆందోళనకారులు ప్రవేశించి నినాదాలు చేస్తున్నారు. ప్రధాని హసీనా రాజీనామా చేయాలని ఆందోళనకారులు డిమాండ్ చేస్తున్నారు. బంగ్లాదేశ్ ఆర్మీ చీఫ్ ఆందోళనకారుల నుండి శాంతి కోసం విజ్ఞప్తి చేయడానికి దేశాన్ని ఉద్దేశించి ప్రసంగించారు. ఆయా ప్రాంతాల్లో కర్ఫ్యూ కొనసాగుతోంది. హింసలో ఇప్పటివరకు 300 మందికి పైగా మరణించగా, వందలాది మంది గాయపడిన విషయం తెలిసిందే.
