China: టీఆర్‌ఎఫ్‌పై అమెరికా నిర్ణయానికి మద్దతుగా చైనా సంచలన ప్రకటన!
ఈ వార్తాకథనం ఏంటి
ఏప్రిల్ 22న జమ్ముకశ్మీర్‌లోని పహల్గామ్ వద్ద జరిగిన ఉగ్రదాడిలో 26 మంది అమాయకులు ప్రాణాలు కోల్పోయారు. ఈ దాడికి పాల్పడిన ఉగ్రవాద సంస్థ ది రెసిస్టెన్స్ ఫ్రంట్ (TRF)ను అమెరికా తాజాగా అంతర్జాతీయ ఉగ్రవాద సంస్థగా గుర్తించింది. టీఆర్‌ఎఫ్‌ అనేది పాకిస్థాన్ ఆధారిత లష్కరే తోయ్బాకి ముసుగు సంస్థగా పనిచేస్తోందని అమెరికా విదేశాంగ మంత్రి మార్కో రూబియో స్పష్టం చేశారు. ఈ నిర్ణయాన్ని భారత్ స్వాగతించింది. ఈ నేపథ్యంలో ఆశ్చర్యకరంగా చైనా కూడా అమెరికా నిర్ణయానికి మద్దతు తెలిపింది. చైనా విదేశాంగ మంత్రిత్వ శాఖ ప్రతినిధి లిన్ జియాన్ స్పందిస్తూ - తమ దేశం అన్ని రూపాల్లోని ఉగ్రవాదాన్ని వ్యతిరేకిస్తుందని పేర్కొన్నారు.
Details
పొరుగు దేశాలన్నీ శాంతి, స్థిరత్వానికి కట్టుబడి ఉండాలి
పహల్గామ్‌లో జరిగిన దాడిని ఖండిస్తూ ప్రాంతీయ భద్రతను కాపాడేందుకు అన్ని దేశాలు కలిసి పనిచేయాలనే పిలుపునిచ్చారు. పొరుగు దేశాలన్నీ శాంతి, స్థిరత్వానికి కట్టుబడి ఉండాలనే సూచన చేశారు. ఇదిలా ఉండగా ఇటీవల భారత విదేశాంగ మంత్రి ఎస్. జైశంకర్ చైనాలో పర్యటించారు. ఈ సందర్భంగా ఇరు దేశాల మధ్య ద్వైపాక్షిక సంబంధాలపై కీలక చర్చలు జరిగాయి. ఆ చర్చలు విజయవంతంగా ముగియడంతో, భారత్-చైనా సంబంధాలు మెరుగుపడుతున్నాయనే సంకేతాలుగా ఈ మద్దతు భావించబడుతోంది. పహల్గామ్ దాడి అనంతరం భారత్ పాకిస్థాన్‌పై కఠినమైన చర్యలు ప్రారంభించింది.
Details
భారీ స్థాయిలో సర్జికల్ దాడులు
మే 7న 'ఆపరేషన్ సిందూర్' పేరిట భారీ స్థాయిలో సర్జికల్ దాడులు నిర్వహించింది. ఇందులో 100 మంది ఉగ్రవాదులు హతమయ్యారని, పాకిస్థాన్‌లోని స్థావరాలు కూడా ధ్వంసమైనట్టు సమాచారం. దాంతో ఇరు దేశాల మధ్య ఉద్రిక్తతలు తీవ్రస్థాయికి చేరుకున్నాయి. అయితే ఈ ఉద్రిక్తతల నడుమే, రెండు దేశాలు కాల్పుల విరమణకు సిద్ధమయ్యాయి. ప్రస్తుతం పరిసరాల్లో శాంతి వాతావరణం నెలకొంటోంది. అమెరికా, చైనా లాంటి దేశాల నుంచి భారత చర్యలకు మద్దతు లభించడం, భారత అంతర్జాతీయ మద్దతు స్థితిని మరింత బలోపేతం చేస్తోంది.