Donald Trump: ఉక్రెయిన్ కంటే రష్యాతో డీల్‌ చేయడం చాలా సులభం : ట్రంప్
ఈ వార్తాకథనం ఏంటి
రష్యా-ఉక్రెయిన్‌ల మధ్య కొనసాగుతున్న యుద్ధాన్ని ముగించేందుకు అమెరికా మాజీ అధ్యక్షుడు డొనాల్డ్ ట్రంప్ తీవ్రంగా ప్రయత్నిస్తున్న విషయం తెలిసిందే. ఈ క్రమంలో మాస్కోను ఉద్దేశించి ఆసక్తికర వ్యాఖ్యలు చేశారు.
శుక్రవారం వైట్‌హౌస్‌లో నిర్వహించిన విలేకరుల సమావేశంలో ట్రంప్ మాట్లాడారు. ఉక్రెయిన్‌కు అంత బలం లేదని, కానీ వారితో వ్యవహరించడం చాలా క్లిష్టంగా మారిందన్నారు.
రష్యాతో ఒప్పందం చేయడం చాలా సులభమని, పుతిన్‌పై తనకు విశ్వాసం ఉందన్నారు. అతనితో మంచి సంబంధాలున్నాయని, పుతిన్ ఈ యుద్ధాన్ని ముగించాలని కోరుకుంటున్నారని వెల్లడించారు.
రాత్రి సమయంలో మాస్కో దళాలు కీవ్‌పై భీకర దాడులు జరపడానికి గల కారణం తనకు అర్థమైందని తెలిపారు. ఆ స్థితిలో ఎవరు ఉన్నా అదే చేసేవారని భావిస్తున్నట్టు తెలిపారు.
Details
మాస్కోపై బ్యాంకింగ్ ఆంక్షలు, సుంకాలు విధించే అవకాశం
శాంతి ఒప్పందానికి అంగీకరించే ముందు ఉక్రెయిన్ భద్రతా హామీ కోసం ఒత్తిడి తెస్తుందని ట్రంప్ తెలిపారు. ఇది కాల్పుల విరమణ, శాంతి ఒప్పందాల్లో అమెరికా ప్రమేయాన్ని తగ్గించే ప్రమాదం ఉందని హెచ్చరించారు.
రష్యా-ఉక్రెయిన్ యుద్ధాన్ని ముగించేందుకు ట్రంప్ యత్నాలు కొనసాగిస్తున్నారు. ఇటీవల వైట్‌హౌస్‌లో ఉక్రెయిన్ అధ్యక్షుడు వోలొదిమిర్ జెలెన్‌స్కీతో భేటీ అయ్యారు.
ఈ సమావేశంలో ఇద్దరి మధ్య తీవ్ర వాగ్వాదం చోటు చేసుకుంది. ఇది ప్రపంచవ్యాప్తంగా చర్చనీయాంశంగా మారింది.
శాంతి సాధనకు అవసరమైన చర్చలు జరిపేందుకు సిద్ధంగా ఉన్నామని, బలమైన తుది ఒప్పందం కోసం అమెరికాతో కలిసి పనిచేస్తామని జెలెన్‌స్కీ ప్రకటించారు.
ఉక్రెయిన్‌పై రష్యా దాడులు ముమ్మరంగా కొనసాగుతున్న తరుణంలో, మాస్కోపై బ్యాంకింగ్ ఆంక్షలు, సుంకాలు విధించే అంశాన్ని పరిశీలిస్తున్నట్టు ట్రంప్ తెలిపారు.