Israel-Hezbollah: హసన్ నస్రల్లా వారసుడు హషేమ్ సఫీద్దీన్ ని అంతం చేశాం: ఇజ్రాయెల్ సైన్యం
ఇజ్రాయెల్ చేతిలో హిజ్బుల్లాకు మరో పెద్ద దెబ్బ తగిలింది. ఆ సంస్థ అధినేత హసన్ నస్రల్లా హత్య తర్వాత అతని బంధువు హషీమ్ సఫీద్దీన్‌ను వారసుడిగా భావించారు. ఈ సమయంలో ఇజ్రాయెల్ దాడుల్లో సఫీద్దీన్ మరణించినట్లు అంతర్జాతీయ మీడియా కథనాలు తెలిపాయి. తాజాగా ఇజ్రాయెల్ దళాలు ఈ వార్తను ధృవీకరించాయి. ఈ విషయంపై ఐడీఎఫ్‌ అధికారిక ప్రకటన విడుదల చేసింది. "మూడు వారాల క్రితం జరిగిన దాడిలో హెజ్‌బొల్లా కార్యనిర్వాహక మండలి అధిపతి,జిహాద్ కౌన్సిల్ సభ్యుడు హషీమ్ సఫీద్దీన్ మరణించాడు.అతనితో పాటు హెజ్‌బొల్లా ఇంటెలిజెన్స్ డైరెక్టరేట్ అధిపతి అలీ హుస్సేన్‌ హజిమా,ఇతర కమాండర్లు కూడా మృతి చెందారని ధృవీకరించాం,"అని ఐడీఎఫ్‌ పేర్కొంది.
సఫీద్దీన్‌ను ఉగ్రవాదిగా ప్రకటించిన అమెరికా
అదే సమయంలో దాడి ప్రాంతంలో 25మందికి పైగా హెజ్‌బొల్లా మిలిటెంట్లు ఉన్నట్లు ఏరియల్ ఇంటెలిజెన్స్ వెల్లడించింది. లెబనాన్‌లోని దాహియాలో ఉన్న ఓ బంకర్‌లో సీనియర్ హెజ్‌బొల్లా నేతలతో హషీమ్ సమావేశం నిర్వహించారన్న సమాచారంతో ఇజ్రాయెల్ ఈ దాడులు చేసింది. ఈ దాడుల్లో లెబనీస్ గూఢాచార విభాగం అధిపతి హుస్సేన్‌ అలీ హజిమా,సఫీద్దీన్ మరణించారని అప్పట్లో అంతర్జాతీయ మీడియా పేర్కొంది. తాజాగా ఐడీఎఫ్‌ దీనిని ధృవీకరించింది.కానీ హెజ్‌బొల్లా ఈ విషయంపై ఇప్పటివరకు ఎలాంటి అధికారిక ప్రకటన చేయలేదు. సఫీద్దీన్ హెజ్‌బొల్లా కార్యనిర్వాహక మండలి అధిపతిగా,జిహాద్ కౌన్సిల్ సభ్యుడిగా ఉన్నారు. 2017లో సఫీద్దీన్‌ను అమెరికా ఉగ్రవాదిగా ప్రకటించింది.నస్రల్లా మరణం తర్వాత హెజ్‌బొల్లా పగ్గాలు ఆయనకే ఇవ్వనున్నట్లు వార్తలు వచ్చాయి. ఇజ్రాయెల్ దాడుల్లో ఆయన మరణించడం గమనార్హం.
