Nikhil Gupta: పన్నూన్‌ హత్య కుట్రలో నా పాత్ర ఉంది.. శిక్షకు సిద్ధమన్న నిఖిల్‌ గుప్తా!
ఈ వార్తాకథనం ఏంటి
అమెరికాలో ఖలిస్థానీ వేర్పాటువాది గురుపత్వంత్‌ సింగ్‌ పన్నూన్‌ హత్యకు కుట్ర పన్నిన కేసులో భారతీయుడు నిఖిల్‌ గుప్తా తన ప్రమేయాన్ని అంగీకరించాడు. ఈ కేసులో తాను చేసిన తప్పులకు ఎలాంటి శిక్ష విధించినా ఎదుర్కొనేందుకు సిద్ధంగా ఉన్నట్లు వెల్లడించాడు. ఈ మేరకు అమెరికా జిల్లా జడ్జి విక్టర్‌ మారెరోకు లేఖ రాశాడు. న్యూయార్క్‌ కోర్టు నవంబర్‌ 20న ఈ కేసులో గుప్తాకు శిక్ష ఖరారు చేయనుంది.
వివరాలు
తన చర్యలపై పశ్చాత్తాపం
జడ్జికి రాసిన లేఖలో నిఖిల్‌ గుప్తా తన చర్యలపై విచారం వ్యక్తం చేశాడు. తన కోసం, కుటుంబం కోసం, సమాజం కోసం మంచి వ్యక్తిగా మారాలని కోరుకుంటున్నట్లు పేర్కొన్నాడు.
ఈ కుట్రలో తాను ఒంటరిగానే వ్యవహరించానని లేఖలో అంగీకరించాడు. తన తప్పులకు తగిన శిక్షను స్వీకరించేందుకు సిద్ధంగా ఉన్నట్లు తెలిపాడు.
గురుపత్వంత్‌ సింగ్‌ పన్నూన్‌ హత్యకు జరిగిన కుట్రలో గుప్తా పాత్రపై అమెరికా అటార్నీ కార్యాలయం గతంలో వివరాలు వెల్లడించింది.
పన్నూన్‌కు సంబంధించిన వ్యక్తిగత సమాచారాన్ని అందించడంతో పాటు, హత్య ప్రణాళికకు సంబంధించిన వివరాలను ఎప్పటికప్పుడు తెలియజేసినట్లు పేర్కొంది.
వివరాలు
ఏకాంత నిర్బంధంలో యోగా, ధ్యానం
ఏకాంత నిర్బంధంలో గడిపిన సమయాన్ని కూడా గుప్తా తన లేఖలో ప్రస్తావించాడు. ఆ సమయంలో ధ్యానం చేయడం, యోగా సాధన చేయడం ప్రారంభించినట్లు తెలిపాడు.
ప్రస్తుతం మనుషులు, జంతువులు సహా అవసరంలో ఉన్నవారికి సాయం చేయడంపై దృష్టి సారిస్తున్నట్లు పేర్కొన్నాడు.
తన చర్యలు తప్పేనని అంగీకరిస్తూనే, న్యాయపరమైన ప్రాతినిధ్యం కల్పించినందుకు, తన తప్పులను సరిదిద్దుకునే అవకాశం ఇచ్చినందుకు న్యాయస్థానానికి కృతజ్ఞతలు తెలిపాడు.