US Investment Visas: అమెరికాలో పెట్టుబడులకు భారతీయుల హవా.. ఈబీ-5 వీసాలకు భారీ డిమాండ్‌
ఈ వార్తాకథనం ఏంటి
అగ్రరాజ్యం అమెరికాలో పెట్టుబడులు పెట్టే దిశగా భారతీయులు అంతకంతకూ ఆసక్తి చూపుతున్నారు. ఉద్యోగాల కోసం అవసరమైన హెచ్‌1బీ వీసాల లభ్యత తగ్గుతున్న తరుణంలో, వ్యాపార పెట్టుబడుల ద్వారా శాశ్వత నివాసం పొందేందుకు సహాయపడే ఈబీ-5 వీసాల (EB-5 Visas) పట్ల ఆసక్తి మాత్రం కొనసాగుతోంది. త్వరలో అధ్యక్షుడు ట్రంప్‌ ప్రకటించిన గోల్డ్‌కార్డ్‌లతో ఈ విభాగాన్ని మరింత విస్తరించనున్నారు. తాజాగా వెలువడిన డేటా ప్రకారం 2024 ఏప్రిల్‌ నుంచి భారతీయులలో ఈబీ-5 వీసాల దరఖాస్తుల సంఖ్య భారీగా పెరిగింది. 2025 ఆర్థిక సంవత్సరంలో (అక్టోబర్‌ 2024-జనవరి 2025 మధ్యకాలంలో) భారతీయుల నుంచి 1,200కు పైగా ఐ-526ఈ పిటిషన్లు వచ్చాయని యునైటెడ్‌ స్టేట్స్‌ ఇమిగ్రేషన్‌ ఫండ్‌ (USIF) చీఫ్‌ మార్కెటింగ్‌ ఆఫీసర్‌ నికోలస్‌ మాస్ట్రోన్నీ-3 వెల్లడించారు.
Details
పెండింగ్‌లో 1.1 కోట్ల దరఖాస్తులు
ఇతర వీసాల ప్రక్రియలలో భారీగా బ్యాక్‌లాగ్‌ ఉండటమే ఈబీ-5కు డిమాండ్‌ పెరగడానికి ప్రధాన కారణంగా నిపుణులు చెబుతున్నారు. ముఖ్యంగా హెచ్‌1బీ, గ్రీన్‌కార్డుల మంజూరులో ఎదురవుతున్న కఠినత వల్ల వేగంగా నివాసం పొందే మార్గంగా చాలామంది ఈ రూట్‌ను ఎంచుకుంటున్నారు. ప్రస్తుతం అమెరికా ఇమిగ్రేషన్‌ వ్యవస్థలో సుమారు 1.1 కోట్ల దరఖాస్తులు పెండింగ్‌లో ఉన్నాయని సమాచారం. 'ఇన్వెస్ట్‌ ఇన్‌ ది యూఎస్‌ఏ' సంస్థ డేటా ప్రకారం 2024 ఆర్థిక సంవత్సరంలో భారతీయులకు 1,428 ఈబీ-5 వీసాలు జారీ కాగా, గతేడాది ఇది కేవలం 815 మాత్రమే. అంటే, ఒకే ఏడాదిలో దాదాపు రెట్టింపు పెరుగుదల కనిపిస్తోంది. ఇకపోతే, అమెరికా ప్రభుత్వం గ్రీన్‌కార్డ్‌ జారీపై నిబంధనలను మరింత కఠినతరం చేసింది.
Details
ఈ కొత్త నిబంధనల ప్రకారం
యూఎస్‌ సిటిజన్‌షిప్‌ అండ్‌ ఇమిగ్రేషన్‌ సర్వీసెస్‌ (USCIS) తాజాగా ప్రకటించిన మార్గదర్శకాలు 2025 ఆగస్టు 1 నుంచి అమల్లోకి వచ్చాయి. ఇవి ఇప్పటికే పెండింగ్‌లో ఉన్న దరఖాస్తులు, అలాగే కొత్త దరఖాస్తులకూ వర్తిస్తాయి. కుటుంబ సభ్యులకు ఇచ్చే వీసాలకు సంబంధించి స్క్రీనింగ్‌ & వెట్టింగ్‌ ప్రక్రియను మరింత కఠినతరం చేశారు. నకిలీ వివాహాల ద్వారా అమెరికాలోకి ప్రవేశించే వారిని అడ్డుకోవడం దీని ముఖ్య ఉద్దేశం. దరఖాస్తుదారులు వివాహ సంబంధిత పూర్తి సమాచారం సమర్పించాల్సి ఉంటుంది. ఇందులో జాయింట్‌ ఫైనాన్షియల్‌ స్టేట్‌మెంట్‌లు, కుటుంబ సభ్యుల అభినందన పత్రాలు, ఫొటోలు తదితర ఆధారాలు కావాల్సి ఉంటుంది.
Details
పర్సనల్ ఇంటర్వ్యూకు హాజరు కావాల్సిందే
అంతేకాకుండా, వీసా దరఖాస్తుదారులు పర్సనల్ ఇంటర్వ్యూకు హాజరుకావాల్సి ఉంటుంది. స్పాన్సర్‌ గతంలో ఎవరికైనా స్పౌస్‌ వీసా ఇచ్చి, అప్పుడు రికార్డుల్లో తేడాలు ఉన్నా వాటిపై దర్యాప్తు తీవ్రంగా ఉంటుంది. ఈ కొత్త మార్గదర్శకాలతో అర్హత ఉన్న వారికే గ్రీన్‌కార్డులు అందేలా చేసేందుకు ప్రభుత్వం కృషి చేస్తోంది. మరింత పారదర్శకత, భద్రతను దృష్టిలో ఉంచుకునే ఈ విధానాన్ని రూపొందించినట్లు యూఎస్‌సీఐఎస్‌ తెలిపింది.