Iran- Israel: ఇజ్రాయెల్ ప్రతీకార దాడులు చేపడితే.. దానికి పూర్తి బాధ్యత అమెరికాదే.. ఇరాన్ హెచ్చరిక
ఈ వార్తాకథనం ఏంటి
ఇజ్రాయెల్, ఇరాన్ మధ్య యుద్ధ ఉద్రిక్తతలు ఎక్కువవుతున్నాయని తాజా పరిణామాలు సూచిస్తున్నాయి.
హిజ్బొల్లా అధినేత నస్రల్లా మరణం తర్వాత, ఈ ఏడాది అక్టోబరు 1న, ఇరాన్ ఇజ్రాయెల్‌పై భారీ క్షిపణి దాడులు జరిపిన విషయం తెలిసిందే.
ఈ దాడులకు ప్రతీకారంగా, ఇజ్రాయెల్ కూడా ప్రతిస్పందన చర్యలకు సిద్ధమవుతోందని వార్తలు వస్తుండడంతో పశ్చిమాసియాలో పరిస్థితులు మరింత ఉద్రిక్తంగా మారాయి.
ఈ నేపథ్యంలో, ఇరాన్‌కి చెందిన కీలక దౌత్యవేత్త అమీర్ సయూద్ ఇరావని, ఇజ్రాయెల్ తాము జరిపిన దాడులకు ప్రతీకారంగా చర్యలు చేపడితే, దానికి అమెరికా పూర్తిగా బాధ్యత వహించాల్సి ఉంటుందని వ్యాఖ్యానించారు.
వివరాలు
ఇజ్రాయెల్ ప్రతీకార చర్య.. మరింత ఉద్రిక్తంగా అక్కడి ప్రాంతంలో పరిస్థితులు
ఐక్యరాజ్య సమితి చీఫ్ ఆంటోనియా గుటెరస్,భద్రతా మండలి స్విస్ ప్రెసిడెన్సీలకు లేఖ రాసిన ఇరావని,ఇజ్రాయెల్ చేపట్టే చర్యలు అంతర్జాతీయ చట్టాలకు విరుద్ధంగా ఉంటాయని, అమెరికా మద్దతివ్వడం ఆందోళనకరమని అభిప్రాయపడ్డారు.
ఇదే సమయంలో, అమెరికా అధ్యక్షుడు జో బైడెన్ ఇటీవలి వ్యాఖ్యలు ఈ పరిణామాలను మరింత రగిలించాయని ఇరావని వ్యాఖ్యానించారు.
ఇరాన్‌పై ఇజ్రాయెల్ చేసే చట్టవిరుద్ధ దాడులకు అమెరికా మద్దతు ఇస్తే, దానికి పూర్తి బాధ్యత వారిదేనని ఆయన స్పష్టం చేశారు.
ఇరాన్, అక్టోబరు 1న ఇజ్రాయెల్‌పై బాలిస్టిక్ క్షిపణి దాడులు జరిపింది.ఈ దాడులలో కొన్ని లక్ష్యాలను చేరుకున్నాయి,కానీ మిగిలిన క్షిపణులను ఇజ్రాయెల్ ఎయిర్ డిఫెన్స్ వ్యవస్థలు అడ్డుకున్నాయి.
ఇప్పుడు ఇజ్రాయెల్ ప్రతీకార చర్యలకు సిద్ధమవుతుండడంతో, ఈ ప్రాంతంలో పరిస్థితులు మరింత ఉద్రిక్తంగా మారాయి.