Iran: ట్రంప్ను చంపిన వారికి 10 మిలియన్ డాలర్లు.. ఇరాకీ సాయుధ గ్రూప్ సంచలన ప్రకటన
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్ను హత్య చేసిన వారికి 10 మిలియన్ డాలర్లు (సుమారు రూ.96 కోట్లు) బహుమతిగా అందజేస్తామని ఇరాక్కు చెందిన ఓ సాయుధ సంస్థ ప్రకటించినట్లు వెలువడిన వార్తలు అంతర్జాతీయంగా చర్చనీయాంశంగా మారాయి. ఈ విషయాన్ని ఇరాన్ ప్రభుత్వ వార్తా సంస్థ ఐఆర్ఎన్ఏ, రష్యా ప్రభుత్వ మీడియా ఆర్టీ తమ కథనాల్లో వెల్లడించాయి. తమను "ఇస్లామిక్ రెసిస్టెన్స్ ఇన్ ఇరాక్"గా పేర్కొంటున్న ఈ సంస్థ తాజాగా ఈ ప్రకటన చేసినట్లు నివేదికలు వెల్లడించాయి. ఐసిస్ ఉగ్రవాదులతో జరిగిన పోరాటాల్లో మరణించిన తమ కమాండర్లపై ట్రంప్ అవమానకరంగా, రెచ్చగొట్టే విధంగా వ్యాఖ్యానించారని ఆరోపించిన ఆ గ్రూప్, అందుకే ఈ బహుమతిని ప్రకటించినట్లు తెలిపింది.
వివరాలు
పశ్చిమాసియా ప్రాంతంలో ఆందోళనలు మరింత పెరిగే అవకాశం
అయితే, ప్రకటించిన 10 మిలియన్ డాలర్ల బహుమతిని ఎలా అందజేస్తారు? దానికి సంబంధించిన విధివిధానాలు ఏమిటి? అనే అంశాలపై ఆ సంస్థ ఎలాంటి వివరాలు వెల్లడించలేదు.
అలాగే, ఈ ప్రకటన నిజమేనని స్వతంత్రంగా ధ్రువీకరించలేకపోయామని ఐఆర్ఎన్ఏ, ఆర్టీ తమ కథనాల్లో స్పష్టం చేశాయి.
ఈ ప్రకటన వెలుగులోకి రావడంతో ఇప్పటికే ఉద్రిక్త పరిస్థితులు నెలకొన్న పశ్చిమాసియా ప్రాంతంలో ఆందోళనలు మరింత పెరిగే అవకాశం ఉందని విశ్లేషకులు భావిస్తున్నారు.
ఇదిలా ఉండగా,ఈ అంశంపై అమెరికాకు చెందిన కన్జర్వేటివ్ కార్యకర్త లారా లూమర్ స్పందించారు.
ట్రంప్ హత్యకు ఇరాకీ ఇస్లామిక్ రెసిస్టెన్స్ ప్రకటించిన 10 మిలియన్ డాలర్ల బహుమతి విషయాన్ని రష్యా ప్రభుత్వ మీడియా ప్రచారం చేస్తోందని ఆమె ఎక్స్ వేదికగా విమర్శించారు.
వివరాలు
అధికారిక ప్రకటన విడుదల చేయని వైట్ హౌస్,అమెరికా దర్యాప్తు సంస్థలు
అంతేకాకుండా, "రష్యా తమకు మిత్రదేశం కాదనే విషయాన్ని రోజురోజుకు మరింత స్పష్టంగా నిరూపించుకుంటోంది" అని ఆమె తన పోస్టులో పేర్కొన్నారు.
కాగా, ట్రంప్కు సంబంధించిన ఈ హత్యా బెదిరింపుల వార్తలపై వైట్ హౌస్ కానీ, అమెరికా దర్యాప్తు సంస్థలు కానీ ఇప్పటివరకు ఎలాంటి అధికారిక ప్రకటన విడుదల చేయలేదు.