Netanyahu: మమ్దానీ హెచ్చరికలకు నెతన్యాహు సవాల్.. న్యూయార్క్కు వస్తానని స్పష్టం
ఈ వార్తాకథనం ఏంటి
న్యూయార్క్ మేయర్ జోహ్రాన్ మమ్దానీ చేసిన అరెస్టు వ్యాఖ్యలపై ఇజ్రాయెల్ ప్రధాని బెంజమిన్ నెతన్యాహు ఘాటుగా స్పందించారు. తనను యుద్ధ నేరస్థుడిగా అభివర్ణిస్తూ న్యూయార్క్కు వస్తే అరెస్ట్ చేయడానికి ప్రయత్నిస్తామని మమ్దానీ చేసిన వ్యాఖ్యలను ఆయన తీవ్రంగా ఖండించారు. సెప్టెంబర్లో జరగనున్న ఐక్యరాజ్యసమితి (యూఎన్) సాధారణ సభ సమావేశాలకు తాను తప్పకుండా న్యూయార్క్కు హాజరవుతానని నెతన్యాహు స్పష్టం చేశారు. ఎలాంటి హెచ్చరికలు, బెదిరింపులు తన నిర్ణయాన్ని మార్చలేవని, తాను వెనక్కి తగ్గే ప్రసక్తే లేదని పేర్కొన్నారు.
వివరాలు
మమ్దానీ ఆరోపణలు ద్వేషాన్ని రెచ్చగొట్టేలా ఉన్నాయి: నెతన్యాహు
గాజా యుద్ధానికి సంబంధించి అంతర్జాతీయ క్రిమినల్ కోర్టు (ICC)తనపై జారీ చేసిన అరెస్టు వారెంట్ను ప్రస్తావిస్తూ మమ్దానీ ఇటీవల నెతన్యాహును యుద్ధ నేరస్థుడిగా పేర్కొన్నారు.
ఆయన న్యూయార్క్కు వస్తే అరెస్టు చేసే అవకాశాలను పరిశీలిస్తామని వెల్లడించారు.
అయితే, అనంతరం అలాంటి అరెస్టు చేపట్టేందుకు న్యూయార్క్ నగర పాలక సంస్థకు నేరుగా చట్టబద్ధమైన అధికారం లేదని కూడా ఆయన అంగీకరించారు.
ఈ వ్యాఖ్యలపై స్పందించిన నెతన్యాహు.. మమ్దానీ ఆరోపణలు ద్వేషాన్ని రెచ్చగొట్టేలా ఉన్నాయని విమర్శించారు.
తనపై ఐసీసీ చేసిన ఆరోపణలకు ఎలాంటి ఆధారాలు లేవని,అవి పూర్తిగా రాజకీయ ప్రేరేపిత చర్యలేనని ఆయన పేర్కొన్నారు.
యూఎన్ సాధారణ సభలో పాల్గొనేందుకు తాను న్యూయార్క్కు వస్తానని, ఎలాంటి ఒత్తిళ్లు లేదా బెదిరింపులకు తలొగ్గబోనని మరోసారి స్పష్టం చేశారు.