New Jersey: న్యూజెర్సీ రాష్ట్రంలో కార్చిచ్చు బీభత్సం.. 45 చదరపు కిలోమీటర్ల పరిధిలోని అటవీ ప్రాంతం కాలి బూడిద
ఈ వార్తాకథనం ఏంటి
అమెరికాలోని న్యూజెర్సీ రాష్ట్రంలో కార్చిచ్చు తీవ్ర రూపం దాల్చింది. రాష్ట్రంలోని పైన్ బారెన్స్ ప్రాంతంలో పుట్టిన మంటలు విస్తరిస్తుండగా, ఇప్పటికే దాదాపు 45 చదరపు కిలోమీటర్ల విస్తీర్ణంలో అటవీ ప్రాంతం మంటలకు ఆహుతయ్యింది.
వేగంగా వీచుతున్న గాలుల కారణంగా మంటలు మరింత విస్తరిస్తుండటంతో అగ్నిమాపక సిబ్బంది తీవ్రంగా శ్రమిస్తున్నారు.
దావాగ్ని అదుపులోకి తెచ్చే ప్రయత్నాల్లో అగ్నిమాపక సిబ్బంది
పైన్ బారెన్స్‌లో మంటలు వేగంగా వ్యాపించడంతో పొగలు భారీగా ఆవిరైపోతున్నాయి.
అగ్నిమాపక సిబ్బంది భూభాగంలోనే కాకుండా, చిన్న తరహా విమానాల ద్వారా కూడా మంటలను నియంత్రించేందుకు ప్రయత్నిస్తున్నారు.
కానీ వేగంగా వీచుతున్న గాలుల ప్రభావంతో మంటలు అదుపులోకి రాకపోవడంతో పరిస్థితి కష్టతరమవుతోంది. ఇది ఫైర్ సిబ్బందికి ఒక పెద్ద సవాలుగా మారింది.
వివరాలు
జనాభా తరలింపు, ఆస్తుల నష్టం
ఈ కార్చిచ్చు కారణంగా సమీప ప్రాంతమైన లేసీ, ఓషన్ టౌన్‌షిప్ ప్రాంతాలకు చెందిన సుమారు 5,000 మందిని సురక్షిత ప్రాంతాలకు తరలించారు.
మంటలు జనావాసాల వరకు వ్యాపించడంతో పలు ఇళ్లు, వాహనాలు పూర్తిగా దగ్ధమయ్యాయి.
అయితే ఈ ఘటనలో ఎటువంటి ప్రాణ నష్టం జరుగలేదని అధికారులు స్పష్టం చేశారు.
ఈ వారాంతంలో వర్షం కురిసే అవకాశముందని వాతావరణ శాఖ అధికారులు వెల్లడించగా, వర్షం కారణంగా మంటలు కొంతమేర తగ్గుతాయని అంచనా వేస్తున్నారు.
వివరాలు
ఇది రెండో అతిపెద్ద కార్చిచ్చుగా గుర్తింపు
గత 20 ఏళ్లలో న్యూజెర్సీలో చోటుచేసుకున్న కార్చిచ్చులలో ఇది రెండవ అతిపెద్దదని అధికారులు తెలిపారు.
2007లో సంభవించిన కార్చిచ్చు అతి పెద్దదని, అప్పుడు 67 చదరపు కిలోమీటర్ల అటవీ ప్రాంతం పూర్తిగా కాలిపోయిందని చెప్పారు.
పైన్ బారెన్స్‌లో ఈ తరహా కార్చిచ్చులు సాధారణంగా సంభవిస్తుంటాయని అధికారులు గుర్తు చేశారు.
వివరాలు
దక్షిణ కొరియాలోనూ అగ్ని కరాళనృత్యం
ఇక మరోవైపు దక్షిణ కొరియాలో కూడా కార్చిచ్చు ఉద్ధృతి కొనసాగుతోంది.
అక్కడి దావానలం కారణంగా ఇప్పటివరకు 24 మంది ప్రాణాలు కోల్పోయారు. మంటలను అదుపులోకి తీసుకొచ్చేందుకు వేలాది మంది అగ్నిమాపక సిబ్బంది పనిచేస్తున్నారు.
గత శుక్రవారం ప్రారంభమైన ఈ కార్చిచ్చు, దక్షిణ కొరియాలో ఇప్పటివరకు సంభవించిన అనేక కార్చిచ్చుల కంటే తీవ్రతరమైన నష్టం కలిగించిందని తాత్కాలిక అధ్యక్షుడు హాన్ డక్-సూ తెలిపారు.
బలమైన గాలుల కారణంగా మంటలను నియంత్రించడంలో అగ్నిమాపక సిబ్బందికి భారీ ఇబ్బందులు ఎదురవుతున్నాయని పేర్కొన్నారు.
దాదాపు 4,650 మంది అగ్నిమాపక సిబ్బంది, సైనికులు, ఇతర సహాయక సిబ్బంది కలిసి 130 హెలికాప్టర్ల సహాయంతో మంటల్ని అదుపు చేసేందుకు యత్నిస్తున్నట్టు తెలిపారు.