North Korea: ఉత్తరకొరియాలో కొత్త విధ్వంసక నౌక ప్రారంభం.. కిమ్ జోంగ్ ఉన్‌ కీలక ప్రకటన
ఈ వార్తాకథనం ఏంటి
ఉత్తర కొరియా అధిపతి కిమ్ జోంగ్ ఉన్‌ (Kim Jong Un) అత్యాధునిక విధ్వంసక నౌకను ప్రారంభించారు. అమెరికా, దాని మిత్రదేశాలు సంయుక్తంగా సైనిక విన్యాసాలు, క్షిపణి ప్రయోగాలు నిర్వహిస్తున్న వేళ.. వాటిని ఎదుర్కొనేందుకు కిమ్ తన అణు సామర్థ్యాన్ని పెంపొందిస్తున్నట్లు కనిపిస్తోంది. శుక్రవారం నాంపోలోని పశ్చిమ పోర్టులో ఈ కార్యక్రమం జరిగింది. 5 వేల టన్నుల సామర్థ్యం కలిగిన ఈ విధ్వంసక నౌకను ప్రారంభించినట్లు అక్కడి మీడియా వెల్లడించింది. ఉత్తరకొరియా (North Korea) నౌకాదళ బలోపేతానికి ఇది మరో కీలకమైన అడుగుగా భావిస్తున్నారు. ఈ సందర్భంగా కిమ్ మాట్లాడుతూ.. అణు సామర్థ్య బాలిస్టిక్‌, క్రూయిజ్‌ క్షిపణులతో పాటు వివిధ ఆయుధ వ్యవస్థలను నిర్వహించేందుకు ఈ నౌకను రూపొందించినట్లు తెలిపారు.
Details
అణ్వస్త్ర వ్యూహాలను తీవ్రంగా ఖండించిన కిమ్
వచ్చే ఏడాది ప్రారంభంలో ఈ నౌకను అధికారికంగా నౌకాదళానికి అప్పగించనున్నట్లు ప్రకటించారు. దక్షిణ కొరియాతో కలిసి అమెరికా చేపడుతున్న అణ్వస్త్ర వ్యూహాలను తీవ్రంగా ఖండించిన కిమ్.. అవి యుద్ధానికి సన్నాహక చర్యలేనని విమర్శించారు. భౌగోళిక రాజకీయ సంక్షోభం నేపథ్యంలో సమయానుగుణంగా, నిర్ణయాత్మకంగా స్పందించనున్నట్లు హామీ ఇచ్చారు. కిమ్ ప్రారంభించిన ఈ యుద్ధ నౌకపై దక్షిణ కొరియా ఇప్పటివరకు ఎలాంటి అధికారిక ప్రకటన చేయలేదు. కొరియా ద్వీపకల్పంలో ఇప్పటికే ఉద్రిక్తతలు పెరుగుతున్న వేళ కిమ్ తీసుకున్న ఈ చర్య ఆందోళన కలిగిస్తోంది. 2019లో అప్పటి అమెరికా అధ్యక్షుడు ట్రంప్, కిమ్‌ల భేటీ జరిగిన సంగతి తెలిసిందే. ఆ సమయంలో అణు నిరాయుధీకరణపై చర్చలు సాగినా, అవి విఫలమయ్యాయి. దీంతో ఇద్దరి మధ్య దూరం పెరిగింది.
Details
కిమ్‌తో మంచి సంబంధాలు ఉన్నాయి : ట్రంప్
బైడెన్‌ అధ్యక్షత చేపట్టిన తరువాత ఈ సంబంధాలు మరింత బలహీనమయ్యాయి. తాజా పరిణామాల మధ్య, కిమ్ అమెరికాపై కఠిన వైఖరి అవలంబిస్తున్నట్లు తెలుస్తోంది. ట్రంప్‌తో వ్యక్తిగత సంబంధాలను కొనసాగించకూడదని ఆయన నిర్ణయించుకున్నట్లు సమాచారం. అయితే ఇటీవల ట్రంప్ మాట్లాడుతూ, కిమ్‌తో తాను ఇప్పటికీ మంచి సంబంధాలు కొనసాగిస్తున్నానని తెలిపారు. కిమ్‌ను 'న్యూక్లియర్ పవర్' అంటూ పొగిడారు. దక్షిణ కొరియా-అమెరికా సైనిక విన్యాసాలు, ఉత్తర కొరియా క్షిపణి ప్రయోగాలతో కొరియా ద్వీపకల్పం ఎప్పుడూ ఉద్రిక్తంగా మారుతోంది. దక్షిణ కొరియాలోని బుసాన్ పోర్టులో ఇటీవల అమెరికా విమాన వాహక నౌక మోహరించడం కూడా కిమ్ ప్రభుత్వ ఆగ్రహానికి కారణమైంది. ఈ నేపథ్యంలో కిమ్ సోదరి కిమ్ యో జోంగ్ అమెరికాను ఉద్ధరించి చర్యలు మానుకోవాలని హెచ్చరించారు.