Page Loader
హోమ్ / వార్తలు / అంతర్జాతీయం వార్తలు / Pahalgam terror attack: పహల్గాం దాడి ఎఫెక్టు.. పాకిస్థాన్ యూట్యూబ్ ఛానళ్లపై నిషేధం
Pahalgam terror attack: పహల్గాం దాడి ఎఫెక్టు.. పాకిస్థాన్ యూట్యూబ్ ఛానళ్లపై నిషేధం
పహల్గాం దాడి ఎఫెక్టు.. పాకిస్థాన్ యూట్యూబ్ ఛానళ్లపై నిషేధం

Pahalgam terror attack: పహల్గాం దాడి ఎఫెక్టు.. పాకిస్థాన్ యూట్యూబ్ ఛానళ్లపై నిషేధం

వ్రాసిన వారు Jayachandra Akuri
Apr 28, 2025
11:16 am
ఈ వార్తాకథనం ఏంటి

భారత్‌-పాకిస్థాన్‌ మధ్య ఉద్రిక్తతలు కొనసాగుతున్న వేళ, కేంద్ర ప్రభుత్వం మరో కీలక చర్య తీసుకుంది. పాకిస్థాన్‌కు చెందిన పలు యూట్యూబ్‌ ఛానళ్ల ప్రసారాలను భారత్‌లో నిషేధించింది. పాక్‌ న్యూస్‌, ఎంటర్‌టైన్‌మెంట్‌ మీడియా సంస్థలకు చెందిన 16 యూట్యూబ్‌ ఛానళ్లపై నిషేధం విధించింది. ఈ జాబితాలో డాన్‌ న్యూస్‌, జియో న్యూస్‌, సామా టీవీ వంటి ప్రముఖ మీడియా ఛానళ్లతో పాటు కొంతమంది జర్నలిస్టుల ఖాతాలు కూడా ఉన్నాయి. మాజీ క్రికెటర్‌ షోయబ్‌ అక్తర్‌ నిర్వహిస్తున్న ఛానల్‌ ప్రసారాలు కూడా భారత్‌లో కనిపించటం లేదు. ప్రస్తుతం ఈ ఛానళ్లను యూట్యూబ్‌లో తెరవగానే ఇందులోని కంటెంట్ అందుబాటులో లేదు. జాతీయ భద్రత దృష్ట్యా కేంద్ర ప్రభుత్వ ఆదేశాల మేరకు ఈ కంటెంట్‌ను నిరోధించామనే సందేశం కనిపిస్తోంది.

Details

పాకిస్థాన్ ప్రభుత్వానికి చెందిన ఎక్స్ ఖాతా నిషేధం

ఇదివరకు కూడా పాకిస్థాన్ ప్రభుత్వానికి చెందిన అధికారిక 'ఎక్స్‌' ఖాతాను భారత్‌లో నిలిపివేసిన సంగతి తెలిసిందే. పాక్‌కు చెందిన ఈ యూట్యూబ్‌ ఛానళ్లపై భారత్‌కు వ్యతిరేకంగా రెచ్చగొట్టే వీడియోలు, మతపరమైన సున్నితమైన కంటెంట్‌, తప్పుదోవ పట్టించే కథనాలను ప్రసారం చేస్తున్నారన్న ఆరోపణలపై ఈ నిషేధం అమలు చేసినట్లు అధికార వర్గాలు వెల్లడించాయి. పహల్గాం దాడి నేపథ్యంలో జమ్ముకశ్మీర్‌లో భద్రతా చర్యలు మరింత ముమ్మరంగా కొనసాగుతున్నాయి. ఉగ్ర నెట్‌వర్క్‌ను ఛేదించేందుకు స్థానిక పోలీస్‌ అధికారులు విస్తృత సోదాలు నిర్వహిస్తున్నారు.

Details

దోడాలోని పలు నివాసాల్లో విస్తృతంగా తనిఖీలు

ఇప్పటికే పలువురు ఉగ్రవాదుల ఇళ్లను పేల్చిన భద్రతా దళాలు, తాజాగా దోడాలోని పలు నివాసాల్లో విస్తృతంగా తనిఖీలు చేస్తున్నారు. ఏప్రిల్‌ 22న జమ్ముకశ్మీర్‌లోని పహల్గామ్‌లో జరిగిన ఉగ్ర దాడిలో 26 మంది పర్యాటకులు ప్రాణాలు కోల్పోయారు. ఈ ఘటనతో భారత్‌, పాకిస్థాన్‌ మధ్య ఉద్రిక్తతలు మరింత పెరిగాయి. సీమాంతర ఉగ్రవాదాన్ని పూర్తిగా నియంత్రించేవరకు పాక్‌పై కఠిన చర్యలు కొనసాగించాలని భారత్‌ నిర్ణయించింది. ఇందులో భాగంగా పాక్ జాతీయులను దేశం నుంచి పంపించడం వంటి కీలక నిర్ణయాలు తీసుకుంది.

ట్విట్టర్ పోస్ట్ చేయండి

యూట్యూబ్ ఛానళ్లపై నిషేధం