పాకిస్థాన్: ఇమ్రాన్ ఖాన్ అరెస్టుకు రంగం సిద్ధం; నాన్-బెయిలబుల్ వారెంట్ జారీ
ఈ వార్తాకథనం ఏంటి
పాకిస్థాన్ మాజీ ప్రధాని ఇమ్రాన్ ఖాన్‌ను అరెస్టు చేసేందుకు రంగం సిద్ధమైంది. మహిళా జడ్జిని బెదిరించినందుకు ఇమ్రాన్ ఖాన్‌పై నాన్-బెయిలబుల్ వారెంట్ జారీ అయ్యింది. ఇమ్రాన్ ఖాన్‌ను అరెస్ట్ చేసేందుకు ఇస్లామాబాద్ పోలీసులు లాహోర్ చేరుకున్నారు. ఇస్లామాబాద్ పోలీసులు ఇమ్రాన్‌ను అరెస్టు చేయడానికి 24గంటల్లో ఖాన్ నివాసానికి వెళ్లనున్నట్లు స్థానిక మీడియా సంస్థలు చెబుతున్నారు. ఇప్పటికే ఇస్లామాబాద్ పోలీసులు ప్రత్యేక హెలికాప్టర్‌లో లాహోర్ చేరుకున్నారు. లాహోర్ పోలీసు అధికారులతో సమావేశమయ్యారు. పంజాబ్ రేంజర్స్, ఫెడరల్ పారామిలిటరీ దళం కూడా అరెస్ట్‌లో పోలీసులకు సహాయం చేయడానికి సిద్ధంగా ఉంది. తోషాఖానా నుంచి బహుమతులను చాలా తక్కువ ధరకు కొనుగోలు చేసి వాటిని విక్రయించడం ద్వారా భారీగా ఆర్థిక ప్రయోజనాలను ఇమ్రాన్ పొందినట్లు అభియోగాలు ఎదుర్కొంటున్నారు.
పాకిస్థాన్
కోర్టుకు హాజరు కాకపోవడంతో జడ్జి ఆగ్రహం
గతేడాది ఆగస్టులో తన స్పెషల్ అసిస్టెంట్ గిల్‌కు సంఘీభావంగా ఇమ్రాన్ ర్యాలీ నిర్వహించారు. ఈ సందర్భంగా ఇమ్రాన్ జడ్జి జేబా చౌదరిని బెదిరించినట్లు మాట్లాడారు. ఆమె జాగ్రత్తగా ఉండాలని, లేకుంటే తాను చర్యలు తీసుకోవాల్సి వస్తుందని హెచ్చరించారు. ఆ తర్వాత తాను జడ్జికి క్షమాపణలు చెప్పాలనుకుంటున్నట్లు ఖాన్ కోర్టులో పిటిషన్ దాఖలు చేశారు. ఈ వ్యవహారంలో సోమవారం కోర్టుకు హాజరు కావాల్సి ఉండగా, ఆయన రాలేదు. ఆగ్రహం వ్యక్తం చేసిన కోర్టు ఇమ్రాన్‌పై నాన్-బెయిలబుల్ వారెంట్ జారీ చేసింది. తోషాఖానా కేసుకు సబంధించి కూడా ఇమ్రాన్ ఖాన్ అరెస్టులను తప్పించుకున్నాడు. ఈ నెల ప్రారంభంలో పోలీసులు ఇమ్రాన్‌ను అరెస్టు చేసేందుకు అతని ఇంటికి చేరుకున్నప్పుడు వందలాది మంది ఆయన అనుచరులు అడ్డుకున్నారు.