Loading...
Donald Trump Assassination Plot: ట్రంప్ హత్యకు ఇరాన్‌తో కలిసి కుట్ర.. పాక్ వ్యక్తికి 27 ఏళ్ల జైలు శిక్ష!
ట్రంప్ హత్యకు ఇరాన్‌తో కలిసి కుట్ర.. పాక్ వ్యక్తికి 27 ఏళ్ల జైలు శిక్ష!

Donald Trump Assassination Plot: ట్రంప్ హత్యకు ఇరాన్‌తో కలిసి కుట్ర.. పాక్ వ్యక్తికి 27 ఏళ్ల జైలు శిక్ష!

వ్రాసిన వారు Jayachandra Akuri
Nov 18, 2026
09:30 am

ఈ వార్తాకథనం ఏంటి

అమెరికా అధ్యక్షుడు డొనాల్డ్ ట్రంప్‌ను హత్య చేసేందుకు కుట్ర పన్నిన కేసులో పాకిస్థాన్‌కు చెందిన అసిఫ్ మర్చంట్‌కు అమెరికా న్యాయస్థానం భారీ శిక్ష విధించింది. ఇరాన్‌కు చెందిన ఇస్లామిక్ రివల్యూషనరీ గార్డ్ కార్ప్స్ (IRGC) ఆదేశాల మేరకు అమెరికా ప్రభుత్వ ఉన్నతాధికారులను హత్య చేసేందుకు ప్రయత్నించినట్లు నిర్ధారణ కావడంతో అతడికి 27 ఏళ్ల 6 నెలల జైలు శిక్ష ఖరారు చేసింది. మొత్తం 330 నెలల పాటు జైలులో ఉండాలని ఆదేశించింది. అమెరికా న్యాయ శాఖ (Department of Justice) వెల్లడించిన వివరాల ప్రకారం.. 48 ఏళ్ల అసిఫ్ మర్చంట్‌పై నమోదైన కేసులో 2026 మార్చిలో జ్యూరీ అతడిని దోషిగా నిర్ధారించింది.

వివరాలు

ఖాసీం సులేమానీ హత్యకు ప్రతీకారంగా కుట్ర

2020 జనవరిలో అమెరికా జరిపిన డ్రోన్ దాడిలో ఇరాన్‌కు చెందిన మాజీ IRGCకమాండర్ ఖాసీం సులేమానీ హతమయ్యాడు.

ఈ ఘటనకు ప్రతీకారం తీర్చుకోవాలనే ఉద్దేశంతో ఇరాన్ ఈ హత్యా కుట్రకు ప్రణాళిక రూపొందించినట్లు అమెరికా దర్యాప్తు సంస్థలు ఆరోపించాయి.

అసిఫ్ మర్చంట్ స్వచ్ఛందంగా IRGCలో చేరి, అక్కడ శిక్షణ పొందినట్లు అమెరికా న్యాయ శాఖ వెల్లడించింది.

అనంతరం అమెరికాకు వెళ్లి అక్కడి రాజకీయ నాయకులు, ప్రభుత్వ ఉన్నతాధికారులను హత్య చేసేందుకు వ్యక్తులను నియమించుకోవాలని అతడికి ఆదేశాలు అందినట్లు తెలిపింది.

ఈ కేసుపై అమెరికా అటార్నీ జనరల్ టాడ్ బ్లాంచ్ స్పందించారు. అధ్యక్షుడు ట్రంప్‌తో పాటు ఇతర అమెరికా ప్రభుత్వ ప్రముఖులపై హత్యాయత్నానికి కుట్ర పన్నిన విదేశీ ఏజెంట్‌కు తగిన శిక్ష పడిందని పేర్కొన్నారు.

వివరాలు

15 సార్లు టెహ్రాన్‌కు వెళ్లిన మర్చంట్

అమెరికా నాయకులపై విదేశీ ఉగ్రవాద కుట్రలను ఏమాత్రం సహించబోమని స్పష్టం చేశారు.

అమెరికా న్యాయ శాఖ వివరాల ప్రకారం.. 2022 ప్రాంతంలో అసిఫ్ మర్చంట్‌కు IRGCతో సంబంధాలు ఏర్పడ్డాయి. మతపరమైన యాత్రల కోసం ఇరాన్‌కు వెళ్లిన సమయంలో తన బంధువు ద్వారా యూసుఫ్ మెర్హర్దాద్ అనే వ్యక్తికి పరిచయమయ్యాడు.

అతడే IRGC తరఫున మర్చంట్‌కు మార్గనిర్దేశం చేసినట్లు దర్యాప్తులో వెల్లడైంది.

2023 నుంచి సుమారు ఏడాదిన్నర కాలంలో మర్చంట్ దాదాపు 15 సార్లు ఇరాన్ రాజధాని టెహ్రాన్‌కు వెళ్లి తన హ్యాండ్లర్‌ను కలిసినట్లు అధికారులు తెలిపారు.

ఈ సమావేశాల్లో నిఘా నుంచి తప్పించుకునే పద్ధతులపై అతడికి శిక్షణ ఇచ్చినట్లు ఆరోపించారు. అమెరికాకు వెళ్లి హత్యా ప్రణాళికను అమలు చేయాలని సూచించినట్లు వెల్లడించారు.

ADVERTISEMENT

వివరాలు

విచారణ సందర్భంగా నేరాన్ని అంగీకరించిన నిందితుడు

అమెరికాలో హత్యకు పాల్పడే వ్యక్తులు నేర చరిత్ర కలిగినవారు లేదా మాఫియా సభ్యులై ఉండాలని అతడికి సూచించినట్లు విచారణలో తేలింది.

రాజకీయ ర్యాలీ జరుగుతున్న సమయంలో లక్ష్యంగా చేసుకున్న వ్యక్తిని హతమార్చాలని కూడా ఆదేశించినట్లు అధికారులు పేర్కొన్నారు.

ఈ కుట్రలో తన అంతిమ లక్ష్యం అధ్యక్షుడు డొనాల్డ్ ట్రంప్ అని మర్చంట్ విచారణ సందర్భంగా అంగీకరించినట్లు అమెరికా న్యాయ శాఖ తెలిపింది.

2024 ఏప్రిల్‌లో ఇరాన్‌లో వారం రోజుల పాటు గడిపిన అనంతరం మర్చంట్ అమెరికాకు చేరుకున్నాడు. అక్కడ తనకు పరిచయమున్న ఓ వ్యక్తి సహాయం కోరాడు.

ADVERTISEMENT

వివరాలు

FBI ఇన్‌ఫార్మర్‌గా మారిన పరిచయస్తుడు

అయితే ఆ వ్యక్తి వెంటనే FBI అధికారులకు సమాచారం అందించడంతో, ఆ తర్వాత FBIకి ఇన్‌ఫార్మర్‌గా పనిచేశాడు.

కేసు విచారణలో భాగంగా మర్చంట్ తన కుట్రకు సంబంధించిన కొన్ని వివరాలను వీడియోలో వివరించినట్లు అధికారులు వెల్లడించారు.

అనంతరం హత్యకు పాల్పడే వ్యక్తులను నియమించుకునేందుకు ప్రయత్నించాడు.

అయితే అతడు సంప్రదించిన వ్యక్తులు వాస్తవానికి FBI అండర్‌కవర్ ఏజెంట్లు. వారిని మర్చంట్ మూడుసార్లు కలిశాడు. విదేశాల్లోని వ్యక్తులతో కలిసి పనిచేస్తున్నానని, ఓ రాజకీయ నాయకుడిని హత్య చేయించాలని భావిస్తున్నానని వారితో చెప్పినట్లు విచారణలో వెల్లడైంది.

ఈ కుట్ర కోసం ముందస్తు చెల్లింపుగా 5,000 డాలర్లు కూడా అందించాడు. ఈ మొత్తాన్ని విదేశాల్లో ఉన్న తన బంధువుల సహాయంతో సమకూర్చుకున్నట్లు అధికారులు తెలిపారు.

వివరాలు

ట్రంప్ ర్యాలీలపై గూగుల్ మ్యాప్స్‌లో సెర్చ్

2026 జూలై 12న టెక్సాస్‌లోని రిచ్‌మండ్‌లో అసిఫ్ మర్చంట్‌ను FBI అధికారులు అరెస్టు చేశారు. అమెరికా నుంచి వెళ్లేందుకు విమానాశ్రయానికి బయలుదేరబోతున్న సమయంలో అతడిని అదుపులోకి తీసుకున్నారు.

అతడి ల్యాప్‌టాప్‌, మొబైల్ ఫోన్లు, సోషల్ మీడియా ఖాతాలను పరిశీలించిన అధికారులు కీలక ఆధారాలను గుర్తించారు.

2024 అమెరికా అధ్యక్ష ఎన్నికలు, డొనాల్డ్ ట్రంప్‌కు సంబంధించిన అంశాలపై మర్చంట్ ఆసక్తి చూపినట్లు ఆధారాలు లభించాయని తెలిపారు.

ట్రంప్ ఎన్నికల ప్రచార ర్యాలీలకు సంబంధించిన ఇంటర్నెట్ సెర్చ్‌లు, న్యూజెర్సీలో జరిగిన ట్రంప్ ర్యాలీ ప్రాంతానికి సంబంధించిన గూగుల్ మ్యాప్స్ సెర్చ్‌ను కూడా గుర్తించినట్లు వెల్లడించారు.

అలాగే ఖాసీం సులేమానీని ప్రశంసిస్తూ, ట్రంప్‌, అమెరికాకు వ్యతిరేకంగా సోషల్ మీడియాలో పోస్టులు చేసినట్లు దర్యాప్తులో బయటపడింది.

వివరాలు

విదేశీ కుట్రలకు గట్టి హెచ్చరిక

అసిఫ్ మర్చంట్‌కు శిక్ష విధించడంపై అమెరికా న్యాయ శాఖ అధికారులు స్పందించారు.

విదేశీ శక్తుల తరఫున అమెరికాలో ఉగ్రవాద చర్యలకు పాల్పడేందుకు ప్రయత్నించే వారికి ఈ తీర్పు గట్టి హెచ్చరికగా నిలుస్తుందని పేర్కొన్నారు.

మర్చంట్‌కు విధించిన శిక్షతో ఇకపై అమెరికాపై దాడులకు కుట్రలు పన్నే అవకాశం ఉండదని న్యూయార్క్ తూర్పు జిల్లా అటార్నీ జోసెఫ్ నోసెల్లా జూనియర్ వ్యాఖ్యానించారు.

ADVERTISEMENT