LAC: రోడ్లు, విమానాశ్రయాలు, హెలీప్యాడ్లు.. ఎల్ఏసీ వద్ద చైనా భారీ ఎత్తున నిర్మాణాలు.. పెంటగాన్ సంచలన నివేదిక
ఈ వార్తాకథనం ఏంటి
భారత సరిహద్దు వాస్తవ నియంత్రణ రేఖ(LAC) వద్ద చైనా చేపడుతున్న నిర్మాణాలు, ఆ దేశ సైనిక శక్తిపై అమెరికా రక్షణ శాఖ పెంటగాన్ సంచలన నివేదికను వెల్లడించింది.
ఎల్ఏసీ వద్ద భారీగా మౌలిక వసతులను నిర్మిస్తున్నట్లు పేర్కొంది. అందులో రోడ్లు, విమానాశ్రయాలు, హెలీప్యాడ్లు, భూగర్భ నీటి నిల్వ సౌకర్యాలు, ఎయిర్‌ఫీల్డ్‌లు, సైనిక స్థావరాలను చైనా ఏర్పాటు చేస్తున్నట్లు చెప్పింది.
భారతదేశం నుంచి ముప్పును ఎదుర్కొనేందుకు చైనా బంకర్లు, సొరంగాలు, రోడ్ల విస్తరణ స్పెషల్ ఫోకస్ పెట్టింది. ముఖ్యంగా లద్ధాఖ్ సరిహద్దులో చైనా తన సైనిక పెంచుకుంటోంది.
గాల్వాన్ వద్ద 2020లో భారత్-చైనా మధ్య ప్రతిష్టంభన మొదలైంది. ఆ తర్వాత నుంచి భారత్ సరిహద్దులో సైనికులను సరిహద్దుకు తరలించేందుకు మౌలిక వసతులను నిర్మిస్తోంది.
చైనా
అణ్వాయుధాలను 1000కి పెంచుకోవాలని చూస్తున్న చైనా
గత ఏడాది కాలంలో చైనా అణ్వాయుధాల సంఖ్యను పెంచుకుందని పెంటగాన్ తన నివేదికలో పేర్కొంది. ఇప్పుడు దాని వద్ద 500 న్యూక్లియర్ వార్ హెడ్స్ ఉన్నాయి.
2030 నాటికి చైనా 1000 అణ్వాయుధాలను తయారు చేయాలని లక్ష్యంగా పెట్టుకుందని పెంటగాన్ చెప్పింది.
పెంగటాన్ నివేదిక ప్రకారం, 3,488 కి.మీ పొడవైన ఎల్ఏసీ వద్ద చైనీస్ వెస్ట్రన్ థియేటర్ కమాండ్‌ను ఈ ఏడాది చివరి నాటికి విస్తరించాలని చైనా భావిస్తోంది.
గతేడాది, ఎల్ఏసీ పశ్చిమ సెక్టార్‌లోని లడఖ్ వైపు రిజర్వ్‌లో నాలుగు కంబైన్డ్-ఆర్మ్స్ బ్రిగేడ్‌(సీఏబీ)లను నిర్మించింది.
సిక్కిం, అరుణాచల్ ప్రదేశ్ సరిహద్దుల దగ్గర చైనా కూడా 3 సీఏబీలను మోహరించింది. అంతేకాకుండా, ఉత్తరాఖండ్, హిమాచల్ సమీపంలోనూ సీఏబీను ఏర్పాటు చేస్తోంది.
చైనా
డోక్లామ్ నీటి నిల్వ సౌకర్యాలు, పాంగోంగ్ సరస్సుపై వంతెన
డోక్లామ్ సమీపంలో చైనా భూగర్భ నిల్వ సౌకర్యాలను నిర్మించిందని పెంటగాన్ పేర్కొంది.
అలాగే ఎల్ఏసీ మూడు సెక్టార్లలో కొత్త రోడ్లను చైనా నిర్మించింది. పాంగోంగ్ సరస్సుపై రెండో వంతెనను కూడా నిర్మించినట్లు నివేదిక వెల్లడించింది.
భూటాన్‌తో వివాదాస్పద ప్రాంతాల్లో చైనా గ్రామాలను కూడా నిర్మించినట్లు పెంటగాన్ పేర్కొంది.
ఇండో-పసిఫిక్ ప్రాంతంలో మరో దేశం ప్రవేశాన్ని అడ్డుకునేందుకు చైనా భారీగా సైనిక సామర్థ్యాన్ని పెంచుకుంటోందని నివేదిక వెల్లడించింది.
భూమి, సముద్రం, వాయు మార్గాల్లోనే కాకుండా, అణు, అంతరిక్షం, ఎలక్ట్రానిక్, సైబర్‌స్పేస్‌లలో కూడా చైనా తన యుద్ధ సామర్థ్యాన్ని భారీగా పెంచుకుంటుందని నివేదికలో వివరించింది.
చైనా
ప్రపంచ స్థాయి నెంబర్ 1 మిలటరీ నిర్మాణంపై చైనా ఫోకస్
పెంటగాన్ నివేదిక ప్రకారం, చైనాను 2049 నాటికి ప్రపంచ స్థాయి నెంబర్ 1 మిలిటరీగా చేయాలని అధ్యక్షుడు జిన్‌పింగ్ లక్ష్యంగా పెట్టుకున్నారు.
చైనా ఇప్పటికే ప్రపంచంలోనే అతిపెద్ద నౌకాదళాన్ని కలిగి ఉంది. ఇందులో 370 యుద్ధనౌకలు జలాంతర్గాములు ఉన్నాయి.
ఈ క్రమంలో బలమైన ఆర్మీ వ్యవస్థను నిర్మించేందుకు ఫోకస్ పెట్టినట్లు తెలుస్తోంది.
ఈ ప్రణాళికలో భాగంగానే భారత్ నుంచి భవిష్యత్ ముప్పును నివారించేందుకు లద్ధాఖ్ నుంచి అరుణాచల్‌ప్రదేశ్‌ వరకు ఎల్ఏసీ మీదుగా గ్రామాల ఏర్పాటు పేరుతో సైనిక స్థావరాలను నిర్మిస్తోంది.
ఈ గ్రామాలు సైనిక స్థావరాలుగా ఉపయోగపడే విధంగా మౌలిక సదుపాయాలను చైనా నిర్మిస్తోంది.
చైనా
ఎల్ఏసీ పొడవునా 628 గ్రామాలను నిర్మిస్తున్న చైనా
ఎల్ఏసీ వద్ద చైనా వాచ్ టవర్లు, పెద్ద గోదాములు, కాంక్రీట్ నిర్మాణాలు చేపడుతోంది. ఈ విషయాన్ని కేంద్ర ప్రభుత్వానికి ఏజెన్సీలు వివరించాయి.
ప్రభుత్వ వర్గాల ప్రకారం, చైనా 3,488కి.మీ పొడవైన ఎల్ఏసీ సమీపంలో 'జియోకాంగ్' పేరుతో 628గ్రామాలను నిర్మిస్తోంది. జియోకాంగ్ అంటే చైనీస్ భాషలో 'సంపన్నమైనది' అర్థం.
ఈ 628 గ్రామాల్లో ఉత్తరాఖండ్, సిక్కిం, అరుణాచల్ ప్రదేశ్ సరిహద్దులో ఉన్నాయి. ఈ గ్రామాల్లో మానిటరింగ్ పోస్టులు, వాటర్ స్టోరేజీ, హెలిప్యాడ్‌లు వంటి సౌకర్యాలు కల్పించారు.
వివాదాస్పద అక్సాయ్ చిన్ ప్రాంతంలో చైనా సొరంగాలను కూడా నిర్మిస్తున్నట్లు పెంటగాన్ నివేదిక వెల్లడించింది.
దాదాపు 11 సొరంగాలను నిర్మించినట్లు మాక్సర్ ఉపగ్రహ చిత్రాల ద్వారా వెల్లడైంది. సైనికులు, ఆయుధాల భద్రత కోసం వీటిని నిర్మిస్తున్నట్లు సమచారం.