Ukraine: ఉక్రెయిన్ జైలుపై రష్యా వైమానిక దాడి.. 17 మంది మృతి, 80 మందికి పైగా గాయాలు
ఈ వార్తాకథనం ఏంటి
రష్యా-ఉక్రెయిన్ మధ్య పోరు కొనసాగుతోంది. ఈ క్రమంలో సోమవారం అర్ధరాత్రి మాస్కో వైమానిక దళాలు ఉక్రెయిన్‌లోని ఓ జైలుపై బాంబు దాడులకు పాల్పడ్డాయని ఉక్రెయిన్ అధికారులు ఆరోపించారు. ఈ దాడిలో కనీసం 17 మంది ప్రాణాలు కోల్పోగా, మరో 80 మందికి పైగా గాయపడ్డారని వెల్లడించారు. ఈ ఘటన ఉక్రెయిన్‌లోని ఆగ్నేయ జపోర్జియా ప్రాంతంలో చోటుచేసుకున్నదని అధికారులు తెలిపారు. బిలెన్‌కివ్స్కా ప్రాంతంలోని మరో నివాస ప్రాంతం కూడా ఈ దాడుల ప్రభావాన్ని ఎదుర్కొనాల్సి వచ్చిందని పేర్కొన్నారు. దాడుల్లో 17 మంది మరణించగా, 42 మంది ఖైదీలు తీవ్రంగా గాయపడ్డారని వివరించారు. వీరిలో జైలు సిబ్బంది ఒకరు కూడా గాయపడ్డారు. దాడుల కారణంగా జైలులోని డైనింగ్ హాల్, పరిపాలనా విభాగం,క్వారంటైన్ భవనాలు పూర్తిగా ధ్వంసమయ్యాయి.
వివరాలు
జైలు నుంచి ఎవరూ పరారవ్వలేదు
మరో మూడు అంతస్తుల భవనం కొంత మేరకు ధ్వంసమైందని వెల్లడించారు. అంతేకాకుండా, ప్రసూతి ఆసుపత్రిని కలుపుకొని పలు ఆసుపత్రుల వైద్య సదుపాయాలు కూడా తీవ్రంగా దెబ్బతిన్నాయని చెప్పారు. ఈ దాడుల కారణంగా ఖైదీలెవరూ జైలు నుంచి బయటపడలేదని అధికారులు స్పష్టం చేశారు. రష్యా తీరును కీవ్ ఘాటుగా ఖండించింది. పౌరుల కోసం ఉన్న మౌలిక సదుపాయాలపై ఈ విధంగా దాడులు చేయడం అంతర్జాతీయ చట్టాలకు విరుద్ధమని అధికారులు అభిప్రాయపడ్డారు. ఇదిలా ఉంటే, రష్యా డ్రోన్ దాడులను ఉక్రెయిన్ వైమానిక దళాలు అడ్డుకున్నాయి. తాజా దాడుల్లో రష్యా ప్రయోగించిన 32 డ్రోన్‌లను తామస్థిరపరిచినట్లు వారు తెలిపారు.
వివరాలు
శాంతిచర్చలకు 10-12 రోజుల గడువు
ఇప్పటి వరకూ రష్యా-ఉక్రెయిన్ మధ్య యుద్ధం తీవ్రంగా సాగుతూనే ఉంది. ఇటీవల డ్రోన్ దాడుల సంఖ్య పెరగడంతో ఉద్రిక్తతలు మరింత ముదిరాయి. ఈ నేపథ్యంలో అమెరికా అధ్యక్షుడు డొనాల్డ్ ట్రంప్ యుద్ధాన్ని ముగించి శాంతి స్థాపించేందుకు చొరవ తీసుకుంటున్నారు. ఇందులో భాగంగా, రష్యా అధ్యక్షుడు వ్లాదిమిర్ పుతిన్‌కు శాంతిచర్చల కోసం గతంలో 50 రోజుల గడువు ఇచ్చారు. అయితే తాజాగా ఆ గడువును తగ్గించి, మరో 10 నుంచి 12 రోజుల వ్యవధిలోనే శాంతిచర్చలు ప్రారంభించకపోతే, రష్యాపై మరింత ఆంక్షలు, దిగుమతి సుంకాలు విధిస్తామని హెచ్చరించారు.