Russia-Ukraine: నిషేధిత రసాయన ఆయుధాలతో ఉక్రెయిన్‌పై దాడికి దిగిన రష్యా..!
ఈ వార్తాకథనం ఏంటి
రష్యా-ఉక్రెయిన్ దేశాల మధ్య గతకొంతకాలంగా కొనసాగుతున్న యుద్ధ ఉద్రిక్తతలు తాజాగా మరింత భయంకరంగా మారుతున్న సూచనలు కనిపిస్తున్నాయి. తాజాగా ఓ సంచలనకరమైన విషయం వెలుగులోకి వచ్చింది. ఉక్రెయిన్‌ను అదుపులోకి తేవాలన్న ఉద్దేశంతో రష్యా నిషేధిత రసాయన ఆయుధాలను వినియోగించినట్టు వార్తలు చెబుతున్నాయి. ఈ విషయాన్ని నెదర్లాండ్స్‌కు చెందిన ఇంటెలిజెన్స్‌ అండ్‌ సెక్యూరిటీ సర్వీసెస్‌ వెల్లడించడంతో అంతర్జాతీయంగా ఆందోళన మొదలైంది. ఈ రసాయన ఆయుధాల వాడకానికి సంబంధించిన ఆధారాలను ది హేగ్‌లో పనిచేస్తున్న డచ్‌ గూఢచార సంస్థలు సేకరించాయని సమాచారం. ఉక్రెయిన్‌లోని కీవ్‌ సైనికులను లక్ష్యంగా చేసుకుని రష్యా ఈ రసాయనాలను దాడులకు ఉపయోగిస్తోందని డచ్‌ రక్షణ మంత్రి రూబెన్‌ బ్రెకెల్‌మాన్స్‌ వెల్లడించారు.
వివరాలు
మొదటి ప్రపంచయుద్ధంలో ఉపయోగించిన క్లోరోపిక్రిన్‌ రసాయనం
ఈ ఘటనలపై తీవ్రంగా స్పందించిన ఆయన మాస్కోపై మరింత గట్టి ఆంక్షలు విధించాల్సిన అవసరం ఉందని కోరారు. ఇటువంటి చర్యల వల్ల రెండు దేశాల మధ్య ఉద్రిక్తతలు మరింత పెరిగే అవకాశం ఉందని ఆయన హెచ్చరించారు. మొదటి ప్రపంచయుద్ధంలో జర్మనీ మొదటగా ఉపయోగించిన క్లోరోపిక్రిన్‌ అనే రసాయనాన్ని ఇప్పుడు రష్యా ఉపయోగిస్తున్నట్లు వెల్లడించారు. డచ్‌ మిలిటరీ ఇంటెలిజెన్స్‌ విభాగాధిపతి పీటర్‌ రీసింక్‌ ప్రకారం.. డచ్‌ నిఘా సంస్థలకు అందిన సమాచారం ఆధారంగా వారు స్వంతంగా నిర్వహించిన దర్యాప్తులో ఈ వివరాలు బయటపడినట్టు తెలిపారు.
వివరాలు
2,500 మంది వరకు గాయపడినట్టు ఉక్రెయిన్ ఆరోగ్యశాఖ
ఈ రసాయన ఆయుధాల వాడకంతో ఉక్రెయిన్‌లో ఇప్పటివరకు ముగ్గురు ప్రాణాలు కోల్పోయినట్టు రూబెన్‌ ఆరోపించారు. అలాగే, సుమారు 2,500 మంది వరకు గాయపడినట్టు ఉక్రెయిన్ ఆరోగ్యశాఖ అందించిన నివేదికల్లో వెల్లడైందని చెప్పారు. ఈ రసాయన దాడులు కేవలం ఉక్రెయిన్‌కే కాకుండా ఇతర దేశాలకు కూడా భయానక ప్రభావాలు చూపే అవకాశం ఉందని ఆయన హెచ్చరించారు. అందువల్ల రష్యాపై మరింత ఒత్తిడి తీసుకురావాలని, దీని కోసం విస్తృత స్థాయిలో ఆంక్షలు విధించాలని ఆయన అభిప్రాయపడ్డారు. తాజాగా అందిన ఇంటెలిజెన్స్‌ నివేదికను డచ్‌ పార్లమెంటులో త్వరలో ప్రవేశపెట్టనున్నట్టు తెలిపారు. ఇలాంటి ఆరోపణలు గతేడాది కూడా వచ్చాయి. అమెరికా అధికారికంగా రష్యా ఉక్రెయిన్‌పై ఆధిపత్యం కోసం నిషేధిత రసాయనమైన క్లోరోపిక్రిన్‌ను వాడుతున్నట్టు ఆరోపించింది.
వివరాలు
రసాయనాయుధాల వినియోగానికి రష్యా ప్రత్యేక ఏజెంట్లను వినియోగిస్తోందన్న అనుమానాలు
అయితే అప్పుడు రష్యా ఈ ఆరోపణలను ఖండించింది. తాజాగా మళ్లీ ఇటువంటి ఆరోపణలు వెలుగులోకి రాగానే, రష్యా రక్షణ మంత్రిత్వశాఖ దీనిపై స్పందించింది. తమ దేశం ఎలాంటి నిషేధిత రసాయన ఆయుధాలు ఉపయోగించలేదని స్పష్టం చేసింది. ఇలాంటివి అసలు ఉక్రెయిన్‌నే చేస్తున్నదని ఎదురుదాడికి దిగింది. రష్యా విదేశాంగ శాఖ ప్రతినిధి మరియా జఖరోవా మాట్లాడుతూ.. ఫెడరల్‌ సెక్యూరిటీ అధికారులు ఉక్రెయిన్ తూర్పు ప్రాంతంలో క్లోరోపిక్రిన్‌ కలిగిన పేలుడు పరికరాల నిల్వలను గుర్తించారని చెప్పారు. అలాగే ఈ రసాయనాయుధాల వినియోగానికి రష్యా ప్రత్యేక ఏజెంట్లను వినియోగిస్తోందన్న అనుమానాలు వ్యక్తమవుతున్నాయి. అంతేకాకుండా ఈ ఆయుధాల తయారీకి భారీగా పెట్టుబడులు పెట్టినట్టు, దీనికి కావాల్సిన నిపుణులను నియమించేందుకు కొత్త శాస్త్రవేత్తలను కూడా నియమిస్తున్నట్టు సమాచారం అందుతోంది.