Trump: ట్రంప్ ప్రభుత్వం కీలక నిర్ణయం.. 1.75 లక్షలకు పైగా విదేశీ వీసాలు రద్దు
ఈ వార్తాకథనం ఏంటి
అమెరికా ప్రభుత్వం విదేశీ పౌరులకు సంబంధించి కీలక నిర్ణయం తీసుకుంది. జాతీయ భద్రతకు ముప్పు, చట్టాల ఉల్లంఘన తదితర కారణాలను చూపుతూ విదేశీయులకు గతంలో జారీ చేసిన 1,75,000కు పైగా వీసాలను రద్దు చేసినట్లు ప్రకటించింది. అధ్యక్షుడు డొనాల్డ్ ట్రంప్ నేతృత్వంలోని ప్రభుత్వం కొనసాగిస్తున్న వీసా సమీక్ష ప్రక్రియలో భాగంగానే ఈ చర్యలు చేపట్టినట్లు అమెరికా విదేశాంగ శాఖ సోమవారం విడుదల చేసిన 'ఫ్యాక్ట్ షీట్'లో వెల్లడించింది.
వివరాలు
నేరాలు, ఇమ్మిగ్రేషన్ ఉల్లంఘనలపై చర్యలు
నేరపూరిత కార్యకలాపాలకు పాల్పడటం, ఇమ్మిగ్రేషన్ నిబంధనలను ఉల్లంఘించడం, మోసాలకు పాల్పడటం, అమెరికా జాతీయ భద్రతకు విఘాతం కలిగించడం, అమెరికన్లపై హింసను ప్రేరేపించడం వంటి అంశాలను వీసాల రద్దుకు ప్రధాన కారణాలుగా ప్రభుత్వం పేర్కొంది.
దర్యాప్తు సంస్థల నుంచి అందిన సమాచారాన్ని పరిశీలించిన అనంతరం అత్యధిక సంఖ్యలో వీసాల రద్దు ప్రక్రియ చేపట్టినట్లు తెలిపింది.
ఈ చర్యలకు గురైన కేసుల్లో డ్రైవింగ్ అండర్ ఇన్ఫ్లుయెన్స్ (DUI), దాడులు, చోరీలు, మాదకద్రవ్యాల విక్రయాలు వంటి నేరాలకు సంబంధించినవి ప్రధానంగా ఉన్నట్లు అమెరికా విదేశాంగ శాఖ వివరించింది.
వివరాలు
తీవ్రమైన నేరాల కేసుల్లో తక్షణ రద్దు
వీసాల రద్దుకు సంబంధించి మరికొన్ని తీవ్రమైన కేసులను కూడా అమెరికా విదేశాంగ శాఖ తన ఫ్యాక్ట్ షీట్లో ప్రస్తావించింది.
అత్యాచారం, కిడ్నాపింగ్, మానవ అక్రమ రవాణా, చిన్నారులపై లైంగిక వేధింపులు వంటి తీవ్రమైన నేరాలకు పాల్పడిన విదేశీయుల వీసాలను వెంటనే రద్దు చేసినట్లు పేర్కొంది.
అంతేకాకుండా, తమ పిల్లలకు అమెరికా పౌరసత్వం కల్పించాలనే ఉద్దేశంతో మాత్రమే అమెరికాకు వచ్చే 'బర్త్ టూరిజం'కు సంబంధించిన వీసాలపైనా చర్యలు తీసుకున్నట్లు వెల్లడించింది.
కొన్ని దేశాల పౌరుల వీసాలపైనా వేటు
అమెరికా విదేశాంగ విధానానికి సంబంధించిన అంశాలను కూడా వీసాల రద్దులో పరిగణనలోకి తీసుకున్నట్లు విదేశాంగ మంత్రి మార్కో రూబియో తెలిపారు.
ఈ క్రమంలో క్యూబా,ఇరాన్,లావోస్,కువైట్కు చెందిన పలువురు వ్యక్తుల వీసాలను రద్దు చేసినట్లు ఆయన వివరించారు.
వివరాలు
'వీసా హక్కు కాదు.. ప్రత్యేక అవకాశం'
అమెరికా వీసా అనేది ఎవరికీ హక్కుగా లభించేది కాదని, అది కేవలం ఒక ప్రత్యేక అవకాశం మాత్రమేనని అమెరికా విదేశాంగ శాఖ స్పష్టం చేసింది.
ఇమ్మిగ్రేషన్ వ్యవస్థను దుర్వినియోగం చేసే వ్యక్తుల నుంచి అమెరికా సమాజాన్ని కాపాడేందుకు అవసరమైన కఠిన చర్యలు కొనసాగుతాయని హెచ్చరించింది.
అదే సమయంలో వీసా ఉన్నంత మాత్రాన అమెరికాలోకి ప్రవేశించే హక్కు లభించదని స్పష్టం చేసింది.
వీసా అనేది అమెరికా భూభాగంలోకి ప్రవేశించేందుకు అనుమతి కోరే అవకాశం మాత్రమేనని తెలిపింది.
ఒక వ్యక్తిని దేశంలోకి అనుమతించాలా? వద్దా? అనే తుది నిర్ణయం మాత్రం అమెరికా ఇమ్మిగ్రేషన్ అధికారులదేనని విదేశాంగ శాఖ పేర్కొంది.