Trump-Musk: ట్రంప్ పాలనలో మస్క్ జోక్యం.. డెమోక్రాట్లు చేస్తున్న విమర్శలకు.. కాబోయే అధ్యక్షుడి సమాధానం ఇదే!
రెండోసారి అధ్యక్ష పదవిని చేపట్టేందుకు సిద్ధమైన రిపబ్లికన్‌ నేత డొనాల్డ్‌ ట్రంప్ తన కార్యవర్గంలో టెస్లా అధినేత ఎలాన్ మస్క్‌కు కీలకమైన బాధ్యతలు అప్పగించడం తెలిసిందే. అదనంగా, ట్రంప్ తీసుకుంటున్న కీలక నిర్ణయాల్లో మస్క్ ప్రభావం కనిపించడంతో, "ఎలాన్ మస్క్ అమెరికా అధ్యక్షుడు అవుతారా?" అనే ప్రశ్నలు ఉత్పన్నమవుతున్నాయి. ఈ విషయంపై ట్రంప్ స్పందిస్తూ, ఎలాన్ మస్క్ అధ్యక్షుడు కావడం సాధ్యమేమీ కాదని స్పష్టంగా వ్యాఖ్యానించారు.
అమెరికాలో ఎలాన్ మస్క్ జన్మించలేదు కాబట్టి ప్రెసిడెంట్ కాలేడు: ట్రంప్
రిపబ్లికన్‌ కాన్ఫరెన్స్‌ సందర్భంగా ట్రంప్ మాట్లాడుతూ, ''ఎలాన్ మస్క్ అధ్యక్షుడు కాలేరని నేను చెప్పగలను. ఎందుకంటే ఆయన ఈ దేశంలో జన్మించలేదు,'' అని పేర్కొన్నారు. దక్షిణాఫ్రికాలో జన్మించిన మస్క్ ప్రస్తుతం టెస్లా, స్పేస్‌ఎక్స్‌ సంస్థలను నడిపిస్తున్నా, అమెరికా రాజ్యాంగం ప్రకారం అధ్యక్ష పదవికి అర్హత పొందే వ్యక్తి అమెరికాలో జన్మించి ఉండాలి.
