Donald Trump: క్యూబాకు చమురు విక్రయిస్తే.. టారిఫ్లు తప్పవు: ట్రంప్
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్ క్యూబాను లక్ష్యంగా చేసుకుని మరో కీలక నిర్ణయం తీసుకున్నారు. క్యూబాకు చమురు సరఫరా చేసే ఏ దేశమైనా సరే భారీ టారిఫ్లు విధిస్తామని ఆయన హెచ్చరించారు. ఈ మేరకు సంబంధిత ఉత్తర్వులపై ట్రంప్ సంతకం చేశారు. క్యూబా విషయంలో జాతీయ అత్యవసర పరిస్థితి కింద ఈ ఉత్తర్వులు జారీ చేసినట్లు వైట్హౌస్ ప్రకటించింది. క్యూబా ప్రభుత్వం అమెరికా జాతీయ భద్రతకు, అలాగే విదేశాంగ విధానానికి తీవ్ర ముప్పుగా మారిందని ట్రంప్ పేర్కొన్నారు. తాజా ఉత్తర్వులు శుక్రవారం అర్ధరాత్రి నుంచి అమల్లోకి రానున్నాయి. ఈ నిర్ణయం వల్ల ముఖ్యంగా మెక్సికోపై అమెరికా ఒత్తిడి మరింత పెరిగే అవకాశం ఉందని విశ్లేషకులు అంటున్నారు.
వివరాలు
కెనడా విమానాలపై 50శాతం టారిఫ్లు..!
క్యూబా ప్రభుత్వానికి దూరంగా ఉండాలంటూ ట్రంప్ ఇప్పటికే మెక్సికోపై ఒత్తిడి తెస్తున్నారు. ఈ నేపథ్యంలో ఇటీవల మెక్సికో అధ్యక్షురాలు క్లాడియా షేన్బామ్ మాట్లాడుతూ క్యూబాకు చమురు రవాణాను తాత్కాలికంగా నిలిపివేస్తున్నట్లు తెలిపారు. అయితే ఈ నిర్ణయం అమెరికా ఒత్తిడి కారణంగా తీసుకున్నది కాదని ఆమె స్పష్టం చేశారు. ఇదిలా ఉండగా, అమెరికా-కెనడాల మధ్య సంబంధాలు మరింత ఉద్రిక్తంగా మారుతున్నాయి. కెనడాపై మరోసారి ట్రంప్ టారిఫ్ల హెచ్చరికలు చేశారు. అమెరికాకు దిగుమతి అయ్యే కెనడాకు చెందిన విమానాలపై 50 శాతం టారిఫ్లు విధిస్తామని ఆయన ప్రకటించారు. జార్జియా కేంద్రంగా పనిచేస్తున్న అమెరికా సంస్థ గల్ఫ్స్ట్రీమ్ ఏరోస్పేస్ తయారు చేసిన జెట్లకు సర్టిఫికేషన్ ఇవ్వడానికి కెనడా నిరాకరించిందని ట్రంప్ ట్రూత్ సోషల్లో వెల్లడించారు.
వివరాలు
కెనడా విమానాలపై 50శాతం టారిఫ్లు..!
ఈ అంశాన్ని వెంటనే సరిచేయకపోతే టారిఫ్లు తప్పవని ఆయన హెచ్చరించారు. అయితే ఈ వ్యాఖ్యలపై కెనడా ఇప్పటివరకు స్పందించలేదు. ఇదే క్రమంలో, ఇటీవల చైనాతో వాణిజ్య ఒప్పందం కుదుర్చుకుంటే ఆ దేశం నుంచి వచ్చే దిగుమతులపై 100 శాతం సుంకాలు విధిస్తామని ట్రంప్ హెచ్చరించిన విషయం తెలిసిందే. ఇప్పుడు మరోసారి ఇలాంటి బెదిరింపులు చేయడం రాజకీయంగా, వాణిజ్యపరంగా ప్రాధాన్యం సంతరించుకుంది.