United States: భారత్కు అమెరికా భారీ రక్షణ మద్దతు.. రూ.3,700 కోట్ల ప్యాకేజీకి ఆమోదం
ఈ వార్తాకథనం ఏంటి
భారత్-అమెరికా వ్యూహాత్మక సంబంధాలు మరింత బలపడుతున్నాయి. భారత సైనిక సామర్థ్యాల పెంపునకు తోడ్పడే రెండు కీలక రక్షణ సహకార ప్రతిపాదనలకు అమెరికా ఆమోదం తెలిపింది. మొత్తం 428.2 మిలియన్ డాలర్లు (సుమారు రూ.3,700 కోట్లు) విలువైన ఈ ప్యాకేజీలు భారత భూసేన, వైమానిక దళాల నిర్వహణ సామర్థ్యాలను మరింత బలోపేతం చేయనున్నాయి. ఇండో-పసిఫిక్ ప్రాంతంలో భారత్ను అత్యంత ముఖ్య భాగస్వామిగా అమెరికా మరోసారి గుర్తించింది.
వివరాలు
కాంగ్రెస్కు ప్రతిపాదనలు
అమెరికా రక్షణ భద్రతా సహకార సంస్థ (డీఎస్సీఏ) ఈ రెండు ప్రతిపాదనలను అమెరికా కాంగ్రెస్ పరిశీలనకు పంపించింది. అయితే ఈ ఒప్పందాల్లో కొత్త ఆయుధాల కొనుగోలు లేదు. ఇప్పటికే భారత సైన్యంలో వినియోగంలో ఉన్న ఎం777ఏ2 అల్ట్రా లైట్ హోవిట్జర్లు, ఏహెచ్-64ఈ అపాచీ దాడి హెలికాప్టర్ల నిర్వహణ, విడిభాగాల సరఫరా, సాంకేతిక సహాయం, శిక్షణ వంటి అంశాలకే పరిమితమైంది. ఎం777 హోవిట్జర్లకు అధిక కేటాయింపు మొత్తం ప్యాకేజీలో 230 మిలియన్ డాలర్ల విలువైన భాగం ఎం777ఏ2 అల్ట్రా లైట్ హోవిట్జర్ల నిర్వహణ కోసం కేటాయించారు. ఇందులో విడిభాగాల సరఫరా,మరమ్మతులు,సాంకేతిక సేవలు,సిబ్బందికి శిక్షణ,ఫీల్డ్ సపోర్ట్, లాజిస్టిక్స్ సేవలు ఉన్నాయి.
వివరాలు
అపాచీ హెలికాప్టర్లకు సాంకేతిక మద్దతు
సరిహద్దు ప్రాంతాల్లో వేగంగా మోహరించే సామర్థ్యం కలిగిన ఈ హోవిట్జర్లు భారత సైన్యంలో కీలక ఆయుధాలుగా గుర్తింపు పొందాయి. వాటి సామర్థ్యాన్ని మరింత మెరుగుపరచడమే ఈ ప్యాకేజీ లక్ష్యంగా ఉంది. మరో 198.2 మిలియన్ డాలర్ల విలువైన ప్యాకేజీ ఏహెచ్-64ఈ అపాచీ హెలికాప్టర్ల కోసం మంజూరైంది. ఈ నిధులతో ఇంజినీరింగ్ సేవలు, సాంకేతిక మద్దతు, శిక్షణ కార్యక్రమాలు, లాజిస్టిక్స్ సహాయం, అవసరమైన సాంకేతిక డేటా అందించనున్నారు. యుద్ధ పరిస్థితుల్లో కీలక పాత్ర పోషించే అపాచీ హెలికాప్టర్ల సామర్థ్యాన్ని కొనసాగించడంలో ఈ సహకారం ఉపయోగపడనుంది.
వివరాలు
భారత్ కీలక భాగస్వామి: అమెరికా
ఈ ఆమోదాల నేపథ్యంలో అమెరికా రక్షణ శాఖ కీలక వ్యాఖ్యలు చేసింది. ఇండో-పసిఫిక్ ప్రాంతంలో శాంతి, రాజకీయ స్థిరత్వం, ఆర్థికాభివృద్ధికి భారత్ ప్రధాన శక్తిగా ఎదుగుతోందని పేర్కొంది. ప్రస్తుతంతో పాటు భవిష్యత్ భద్రతా సవాళ్లను సమర్థంగా ఎదుర్కొనేందుకు ఈ మద్దతు తోడ్పడుతుందని వెల్లడించింది. అలాగే ప్రాంతీయ భద్రతా ముప్పులను ఎదుర్కొనే భారత్ సామర్థ్యం మరింత పెరుగుతుందని అభిప్రాయపడింది.
వివరాలు
బలపడుతున్న ద్వైపాక్షిక రక్షణ బంధం
గత రెండు దశాబ్దాలుగా భారత్-అమెరికా రక్షణ సంబంధాలు వేగంగా విస్తరిస్తున్నాయి. 2008లో దాదాపు శూన్య స్థాయిలో ఉన్న ద్వైపాక్షిక రక్షణ వాణిజ్యం ప్రస్తుతం 20 బిలియన్ డాలర్లకు చేరుకుంది. సంయుక్త సైనిక విన్యాసాలు, రక్షణ సాంకేతిక పరిజ్ఞాన మార్పిడి, వ్యూహాత్మక సహకారం కూడా గణనీయంగా పెరిగాయి. తాజా రక్షణ ప్యాకేజీల ఆమోదం రెండు దేశాల మధ్య పెరుగుతున్న పరస్పర విశ్వాసానికి మరో నిదర్శనంగా విశ్లేషకులు భావిస్తున్నారు.