Bangladesh: అమెరికా-బంగ్లాదేశ్ మధ్య కీలక వాణిజ్య ఒప్పందం..19 శాతానికి తగ్గిన సుంకాలు
ఈ వార్తాకథనం ఏంటి
అమెరికా-బంగ్లాదేశ్ మధ్య కీలకమైన వాణిజ్య ఒప్పందం కుదిరింది. ఈ ఒప్పందం మేరకు బంగ్లాదేశ్ నుంచి అమెరికాకు వెళ్లే ఎగుమతులపై విధించే సుంకాలను 19 శాతానికి తగ్గిస్తున్నట్టు ప్రకటించారు. వాషింగ్టన్ డీసీలో సోమవారం ఇరు దేశాల ప్రతినిధులు 'యునైటెడ్ స్టేట్స్-బంగ్లాదేశ్ రెసిప్రోకల్ ట్రేడ్ అగ్రిమెంట్'పై సంతకాలు చేశారు. ఈ ఒప్పందం ద్వారా రెండు దేశాల ఎగుమతిదారులకు ఇప్పటివరకు లేని కొత్త అవకాశాలు అందుబాటులోకి వస్తాయని వైట్ హౌస్ ఒక ప్రకటనలో వెల్లడించింది.
వివరాలు
అమెరికా కాటన్తో తయారైన వస్త్రాలకు సున్నా సుంకం వెసులుబాటు
ఈ ఒప్పందంలో మరో ముఖ్యమైన అంశం కూడా ఉంది. అమెరికా నుంచి దిగుమతి చేసుకున్న పత్తి, ఇతర ఫైబర్ను ఉపయోగించి బంగ్లాదేశ్లో తయారైన వస్త్రాలకు అమెరికా మార్కెట్లో సుంకం లేకుండా ప్రవేశం కల్పించనున్నారు. దీని వల్ల బంగ్లాదేశ్ ఆర్థిక వ్యవస్థకు వెన్నెముకగా నిలిచిన రెడీమేడ్ గార్మెంట్స్ రంగానికి భారీ ఊరట లభిస్తుందని అంచనా వేస్తున్నారు. ఈ విషయాన్ని బంగ్లాదేశ్ తాత్కాలిక ప్రభుత్వ ప్రధాన సలహాదారు మహ్మద్ యూనస్ స్పష్టం చేశారు.
వివరాలు
సుంకాల తగ్గింపునకు బదులుగా అమెరికా ఉత్పత్తులకు బంగ్లాలో ప్రాధాన్యం
గత ఏడాది ఏప్రిల్లో ప్రారంభమైన సుదీర్ఘ చర్చల అనంతరం ఈ ఒప్పందం ఖరారైంది. మొదట బంగ్లాదేశ్ ఎగుమతులపై అమెరికా 37 శాతం వరకు సుంకాలు విధించాలని ప్రతిపాదించగా, చర్చల ఫలితంగా వాటిని ముందుగా 20 శాతానికి, తాజాగా 19 శాతానికి తగ్గించారు. ఈ సుంకాల తగ్గింపుకు ప్రతిగా బంగ్లాదేశ్ కూడా కొన్ని అమెరికా పారిశ్రామిక, వ్యవసాయ ఉత్పత్తులకు తమ మార్కెట్లో ప్రత్యేక ప్రాధాన్యం ఇవ్వనుంది. అయితే ఈ ఒప్పందం పూర్తిస్థాయిలో అమల్లోకి రావాలంటే ఇరు దేశాలు అధికారిక నోటిఫికేషన్లు జారీ చేయాల్సి ఉంటుంది.