KC-135 Aircraft: ఖతార్ గగనతలంలో అమెరికా 'గ్యాస్ స్టేషన్' మిస్సింగ్..!
ఈ వార్తాకథనం ఏంటి
పశ్చిమాసియాలో ఉద్రిక్త పరిస్థితులు కొనసాగుతున్న వేళ అమెరికాకు మరో ఎదురుదెబ్బ తగిలినట్లు సమాచారం. ఆ దేశ సైనిక విమానాలకు గాల్లోనే ఇంధనం నింపే కీలక ట్యాంకర్ విమానం ఖతార్ గగనతలంలో రాడార్తో సంబంధాలు కోల్పోయినట్లు వెల్లడైంది. అమెరికా వాయుసేనకు చెందిన బోయింగ్ కే సీ-135 స్ట్రాటోట్యాంకర్ యునైటెడ్ అరబ్ ఎమిరేట్స్లోని అల్ దఫ్రా వైమానిక స్థావరం నుంచి బయలుదేరింది. పర్షియన్ గల్ఫ్ మీదుగా ప్రయాణిస్తుండగా ఈ విమానం అత్యవసర సంకేతాన్ని పంపినట్లు ఇరాన్కు చెందిన వార్తా సంస్థ పేర్కొంది. సాధారణంగా అత్యవసర పరిస్థితుల్లోనే ఇలాంటి సంకేతాన్ని ప్రసారం చేస్తారని తెలిపింది.
వివరాలు
ఇరాన్-అమెరికా మధ్య ఉన్న ఉద్రిక్తతలతో.. ఈ ఘటనకు సంబంధం ఉందా
పశ్చిమాసియా ఘర్షణల నేపథ్యంలో అక్కడ మోహరించిన యుద్ధ విమానాలకు నిరంతరం ఇంధనం అందించేందుకు ఈ ట్యాంకర్ను వినియోగిస్తున్నారు. దీని సహాయంతో యుద్ధవిమానాలు, బాంబర్లు, ఇతర సైనిక విమానాలు ఎక్కువసేపు గాల్లోనే కొనసాగగలుగుతాయి. తాజా ఘటనలో ఈ విమానం అత్యవసరంగా దిగేందుకు ప్రయత్నిస్తున్న సమయంలో కొంతసేపు గుండ్రంగా తిరిగినట్లు ఫ్లైట్రాడార్24 డేటాలో కనిపించింది అయితే ఈ పరిస్థితి ఎందుకు ఏర్పడింది అనే విషయం ఇంకా వెల్లడికాలేదు. ఇదే సమయంలో ఇరాన్-అమెరికా మధ్య ఉన్న ఉద్రిక్తతలతో ఈ ఘటనకు సంబంధం ఉందా అనే ప్రశ్నలు తలెత్తుతున్నాయి. అయితే ఈ ఘటనపై ఇరాన్ ఎలాంటి అధికారిక ప్రకటన చేయలేదు. పూర్తి వివరాలు వెల్లడయ్యే వరకు అనుమానాలు కొనసాగుతున్నాయి.