USA: అమెరికా ట్రెజరీ డిపార్ట్‌మెంట్‌పై చైనా సైబర్ దాడులు
ఈ వార్తాకథనం ఏంటి
అగ్రరాజ్యం అమెరికా (USA) చైనాపై తీవ్ర ఆరోపణలు చేసింది. వాషింగ్టన్ ప్రకటన ప్రకారం, బీజింగ్ (China) తమ ట్రెజరీ డిపార్ట్‌మెంట్ (US Treasury) పై సైబర్ దాడులకు పాల్పడిందని గుర్తించినట్లు తెలిపింది.
హ్యాకర్లు వర్క్‌స్టేషన్లలో కీలకమైన పత్రాలను దొంగిలించేందుకు ప్రయత్నించారని పేర్కొంది.
ఈ విషయాన్ని కాంగ్రెస్‌కు రాసిన లేఖలో వెల్లడించినట్లు ఒక మీడియా సంస్థ వెల్లడించింది.
ఈ సైబర్ దాడి డిసెంబర్ ప్రారంభంలో చోటుచేసుకుంది. థర్డ్ పార్టీ సైబర్ సెక్యూరిటీ సేవల ప్రొవైడర్ అయిన బియాండ్ ట్రస్ట్ నెట్‌వర్క్‌లో లోపాలను వినియోగించి హ్యాకర్లు వర్క్‌స్టేషన్లు, ముఖ్యమైన పత్రాలను యాక్సెస్ చేసినట్లు గుర్తించారు.
డిసెంబర్ 8న బియాండ్ ట్రస్ట్ అప్రమత్తమై ఈ విషయాన్ని ట్రెజరీ విభాగానికి తెలియజేసినట్లు అధికారి వెల్లడించారు.
వివరాలు
ఖండించిన బీజింగ్ రాయబార కార్యాలయం
అనంతరం ఈ విషయాన్ని సైబర్ సెక్యూరిటీ అండ్ ఇన్‌ఫ్రాస్ట్రక్చర్ సెక్యూరిటీ ఏజెన్సీ (CISA), ఎఫ్‌బీఐ దృష్టికి తీసుకెళ్లినట్లు పేర్కొన్నారు.
దీనిపై ఎఫ్‌బీఐ అధికారులు స్పందించలేదు. వాషింగ్టన్‌లోని బీజింగ్ రాయబార కార్యాలయం ఈ ఆరోపణలను ఖండిస్తూ, "మాపై చేస్తున్న నిరాధార ఆరోపణలను గట్టిగా వ్యతిరేకిస్తున్నాం" అని వ్యాఖ్యానించింది.
ఇదే సమయంలో, జార్జియాలోని బియాండ్ ట్రస్ట్ కూడా సైబర్ దాడిపై స్పందించకపోయినా, వారి వెబ్‌సైట్‌లో ఇటీవల కస్టమర్ల భద్రతకు ముప్పు ఏర్పడిన ఘటనలను గుర్తించామని పేర్కొంది.
దీనిపై దర్యాప్తు జరుగుతోందని వివరించింది. "బియాండ్ ట్రస్ట్ తెలిపిన భద్రతా సంఘటన ట్రెజరీ నివేదించిన హ్యాకింగ్ ఘటనకు సమీపంగా ఉన్నట్లు కనిపిస్తోంది, కానీ దీనిపై మరింత విచారణ అవసరం" అని సైబర్ సెక్యూరిటీ కంపెనీ అధికారి పేర్కొన్నారు.