Trump: సుప్రీంకోర్టు సుంకాలను తగ్గిస్తే.. అమెరికా పేద స్థితికి వెళ్లిపోతుంది: ట్రంప్ కీలక వ్యాఖ్యలు
ఈ వార్తాకథనం ఏంటి
ఇటీవల అమెరికా ఫెడరల్ అప్పీల్ కోర్టు సుంకాలు చట్ట విరుద్ధమని సంచలన తీర్పును ఇచ్చింది. ఈ తీర్పును న్యాయమూర్తులు 7-4 తేడాతో ప్రకటించారు. తీర్పుపై అప్పట్లోనే అధ్యక్షుడు డొనాల్డ్ ట్రంప్ తీవ్ర ఆగ్రహం వ్యక్తం చేశారు. న్యాయమూర్తులపై ఆయన "రాడికల్ లెఫ్ట్ గ్రూప్" అనే లేబుల్ కూడా వేసారు. తాజాగా అప్పీల్ కోర్టు తీర్పుపై ట్రంప్ ప్రభుత్వంసవాల్ చేస్తూ సుప్రీంకోర్టును ఆశ్రయించింది. అయితే సుప్రీంకోర్టులో కూడా అనుకున్న ఫలితాలు రాకపోవచ్చనే పరిస్థితులు కనిపిస్తున్నాయి. ఈ సందర్భంలో ట్రంప్ మాట్లాడుతూ, సుప్రీంకోర్టు సుంకాలను తగ్గించినా లేదా రద్దు చేసినా, అమెరికా నమ్మశక్యం కాని పేద స్థితికి వెళ్లిపోతుందని వ్యాఖ్యానించారు. చాలా నష్టం జరుగుతుందని తెలిపారు.
వివరాలు
ఏదైనా మార్పు జరిగితే దేశం నష్టపోవాల్సి వస్తుంది: ట్రంప్
ఇప్పటికే EU, జపాన్, దక్షిణ కొరియాతో వాణిజ్య ఒప్పందాలు జరిగాయని, ఏదైనా మార్పు జరిగితే దేశం నష్టపోవాల్సి వస్తుందని అన్నారు. అలాగే, సమాఖ్య చట్టం ప్రకారం విస్తృత వాణిజ్య జరిమానాలు విధించే అధ్యక్షుడి అధికారాన్ని ధృవీకరించేలా త్వరిత తీర్పు ఇవ్వాలని ట్రంప్ ప్రభుత్వం న్యాయమూర్తులను కోరింది. ట్రంప్ చెప్పినట్టుగా, సుప్రీంకోర్టులో కేసు గెలిచినట్లయితే అమెరికా ధనవంతులుగా మారే అవకాశం ఉంటుంది; లేదంటే దేశం తీవ్రమైన పేదరికంలోకి వెళ్ళిపోతుంది.
వివరాలు
సుప్రీంకోర్టును ఆశ్రయించిన ట్రంప్ ప్రభుత్వం
ఇటీవల ట్రంప్ కొన్ని దేశాలపై సుంకాలు విధించారు. దీని కారణంగా ఆ దేశాల నుంచి తీవ్ర వ్యతిరేకత వ్యక్తమైంది. ప్రారంభంలో 90 రోజుల వాయిదా ఇచ్చారు, తరువాత అమల్లోకి తెచ్చారు. ప్రత్యేకంగా భారత్‌పై 25% సుంకం విధించగా, రష్యాతో సంబంధం కారణంగా మరొక 25% సుంకం కూడా జోడించగా, ఫలితంగా భారత్‌పై మొత్తం 50% సుంకం విధించబడింది. కానీ, ఈ సుంకాలను అమెరికా ఫెడరల్ అప్పీల్ కోర్టు చట్ట విరుద్ధమని తేల్చి తప్పుపట్టింది. దీనిని సవాల్ చేస్తూ ట్రంప్ ప్రభుత్వం సుప్రీంకోర్టును ఆశ్రయించింది. ఈ తీర్పుపై ఆధారపడి, భవిష్యత్తులో తదుపరి పరిణామాలుంటాయి.