Sheikh Hasina: హసీనా రాక వెనుక అసలేం జరిగింది? భారత్‌ కీలక వివరణ!
ఈ వార్తాకథనం ఏంటి
బంగ్లాదేశ్‌లో 2024 ఆగస్టులో షేక్‌ హసీనా ప్రభుత్వం కూలిపోవడంతో ఆమె దేశం విడిచి భారత్‌కు వచ్చిన విషయం తెలిసిందే. ఆ సమయంలో హసీనాకు భారత్‌ ఆశ్రయం కల్పించడంపై భారత హైకమిషనర్‌ దినేశ్‌ త్రివేది తాజాగా కీలక వ్యాఖ్యలు చేశారు. పొరుగు దేశంగా ఆ సమయంలో హసీనాను భారత్‌ అంగీకరించడం తమ బాధ్యతేనని ఆయన పేర్కొన్నారు. అప్పటికి ఆమె బంగ్లాదేశ్‌ ప్రధానమంత్రిగానే ఉన్నారని, అందువల్ల భారత్‌కు పెద్దగా ప్రత్యామ్నాయం లేదని చెప్పారు. ఢాకాలో శనివారం జరిగిన 'బే ఆఫ్‌ బెంగాల్‌ కన్వర్సేషన్‌ 2026' కార్యక్రమంలో దినేశ్‌ త్రివేది ఈ వ్యాఖ్యలు చేశారు. ''ఆ సమయంలో ఆమె బంగ్లాదేశ్‌ ప్రధానమంత్రిగానే ఉన్నారు.
వివరాలు
చట్టపరమైన ప్రక్రియలో హసీనా అప్పగింత
మాకు పెద్దగా ప్రత్యామ్నాయం లేదు. పొరుగు దేశంగా వాస్తవ పరిస్థితిని అంగీకరించి ఆమెకు ఆశ్రయం కల్పించడం మా బాధ్యత'' అని ఆయన అన్నారు.
ఒకవేళ హసీనా విమానానికి భారత్‌ ల్యాండింగ్‌ అనుమతి ఇవ్వకపోయి ఉంటే పరిస్థితి ఎలా మారేదో చెప్పలేమని పేర్కొన్నారు.
హసీనాను తిరిగి బంగ్లాదేశ్‌కు పంపించే విషయంలో భారత్‌ ఎలాంటి గడువును నిర్ణయించలేదని దినేశ్‌ త్రివేది స్పష్టం చేశారు. ఆమె అప్పగింతకు సంబంధించి బంగ్లాదేశ్‌ చేసిన అభ్యర్థన ప్రస్తుతం చట్టపరమైన ప్రక్రియలో పరిశీలనలో ఉందన్నారు.
వివరాలు
న్యాయస్థానాలు కూడా భాగమే
ఈ అంశంపై భారత ప్రభుత్వం బంగ్లాదేశ్‌కు ఇదే విషయాన్ని స్పష్టం చేసిందని తెలిపారు.
అప్పగింత ప్రక్రియ చట్టబద్ధమైనదని, నిర్దిష్ట విధానం ప్రకారం కొనసాగుతోందని, ఈ ప్రక్రియలో న్యాయస్థానాలు కూడా భాగమని వివరించారు.
అందువల్ల హసీనా తిరిగి బంగ్లాదేశ్‌కు వెళ్లే తేదీని ఎవరూ నిర్ణయించలేరని పేర్కొన్నారు.
వివరాలు
2024 ఆగస్టు 5న భారత్‌కు..
షేక్‌ హసీనాను భారత వాయుసేన లేదా భారత సైన్యం భారత్‌కు తీసుకురాలేదని కూడా త్రివేది స్పష్టం చేశారు.
2024 ఆగస్టు 5న ఆమె బంగ్లాదేశ్‌కు చెందిన సైనిక విమానంలో భారత్‌కు చేరుకున్నారని తెలిపారు.
ఆ సమయంలో నిరసనకారులు ఆమె అధికారిక నివాసం వైపు కదులుతుండటంతో బంగ్లాదేశ్‌ సైన్యం ఆధ్వర్యంలోని భద్రతా సిబ్బంది హసీనాను అక్కడి నుంచి తరలించారు.
బంగ్లాదేశ్‌లో నెలకొన్న విషాదకర పరిస్థితుల కారణంగానే ఈ పరిణామాలు చోటుచేసుకున్నాయని త్రివేది అన్నారు. ఇలాంటి పరిస్థితులు ప్రపంచంలో ఎక్కడా మళ్లీ తలెత్తకూడదని పేర్కొన్నారు.
వివరాలు
మహమ్మద్‌ యూనస్‌ నేతృత్వంలో తాత్కాలిక ప్రభుత్వం
హసీనా ప్రభుత్వం కూలిపోయిన అనంతరం మహమ్మద్‌ యూనస్‌ నేతృత్వంలో తాత్కాలిక ప్రభుత్వం 2024 ఆగస్టు 8న బాధ్యతలు చేపట్టింది.
సుమారు ఏడాదిన్నర పాటు ఈ ప్రభుత్వం దేశాన్ని పాలించింది. ఈ కాలంలో హసీనా అప్పగింత డిమాండ్‌, మైనారిటీలపై దాడులపై ఆందోళనలు, చైనాతో బంగ్లాదేశ్‌ సంబంధాలు పెరగడం వంటి అంశాల కారణంగా భారత్‌-బంగ్లాదేశ్‌ సంబంధాలు గణనీయంగా దెబ్బతిన్నాయి.
2025లో హసీనాపై ప్రత్యేక న్యాయస్థానం ఆమె గైర్హాజరీలో విచారణ జరిపి మరణశిక్ష విధించింది.
ఆమె పార్టీ అవామీ లీగ్‌ను కూడా తాత్కాలిక ప్రభుత్వం రద్దు చేసింది. అనంతరం దౌత్యపరమైన నోట్‌ ద్వారా హసీనాను అప్పగించాలని భారత్‌ను కోరింది.
వివరాలు
భారత్‌-బంగ్లాదేశ్‌ సంబంధాల్లో కొనసాగుతున్న ఉద్రిక్తత
ఫిబ్రవరిలో అధికారంలోకి వచ్చిన తారిఖ్‌ రెహ్మాన్‌ నేతృత్వంలోని బంగ్లాదేశ్‌ నేషనలిస్ట్‌ పార్టీ ప్రభుత్వం కూడా అవామీ లీగ్‌పై నిషేధాన్ని కొనసాగిస్తూ.. హసీనాను అప్పగించాలని భారత్‌ను పలుమార్లు కోరింది.
ఈ అంశం ఇరు దేశాల మధ్య కొనసాగుతున్న ఉద్రిక్తతకు ప్రధాన కారణాల్లో ఒకటిగా మారింది. తారిఖ్‌ రెహ్మాన్‌ భారత్‌ పర్యటనపై కూడా ఈ పరిణామాల ప్రభావం పడింది.
గత నెల జరిగిన బ్రిక్స్‌ సదస్సుకు భారత్‌ ఆయనను ఆహ్వానించింది.
ఫిబ్రవరిలో ఆయన ప్రధానిగా బాధ్యతలు చేపట్టిన సమయంలోనూ ప్రత్యేక ద్వైపాక్షిక ఆహ్వానం ఇచ్చింది. అయితే ఆయన బ్రిక్స్‌ సదస్సుకు హాజరుకాలేదు. ఇప్పటివరకు న్యూఢిల్లీకి కూడా రాలేదు.
వివరాలు
ఇప్పటివరకూ తేదీ ఖరారు కాలేదు
తారిఖ్‌ రెహ్మాన్‌ భారత్‌ పర్యటనపై చర్చల్లో పురోగతి సాధించేందుకు సానుకూలంగా ఉన్నామని బంగ్లాదేశ్‌ పేర్కొన్నప్పటికీ.. ఇప్పటివరకు తేదీ ఖరారు కాలేదు.
ఇదిలా ఉండగా, భారత్‌-బంగ్లాదేశ్‌ సంబంధాలు మూడో దేశంతో బంగ్లాదేశ్‌ సంబంధాలపై ఆధారపడి ఉండవని కూడా త్రివేది పేర్కొన్నారు.
ఇదిలా ఉండగా.. ఆగస్టు 5న న్యూఢిల్లీ నుంచి షేక్‌ హసీనా నిర్వహించిన వర్చువల్‌ మీడియా సమావేశం కూడా ఇరు దేశాల మధ్య ఉద్రిక్తతలను పెంచింది.
డిసెంబర్‌లో తాను బంగ్లాదేశ్‌కు తిరిగి వెళ్లాలని నిర్ణయించుకున్నట్లు ఆమె ప్రకటించారు.
దేశాన్ని సరైన మార్గంలో నడిపించేందుకు ప్రజలతో కలిసి ఉండాలనే ఉద్దేశంతో స్వదేశానికి వెళ్తానని ఆమె చెప్పారు. తనకు జైలు శిక్ష లేదా మరణశిక్ష విధించే అవకాశం ఉన్నప్పటికీ తాను వెనక్కి తగ్గబోనని పేర్కొన్నారు.
వివరాలు
డిసెంబర్‌లో స్వయంగా బంగ్లాదేశ్‌కు వెళ్తానన్న హసీనా
భారత మీడియాకు ఇచ్చిన తొలి టెలిఫోన్‌ ఇంటర్వ్యూలోనూ హసీనా ఇదే విషయాన్ని వెల్లడించారు.
తన అప్పగింత అంశాన్ని తారిఖ్‌ రెహ్మాన్‌ భారత్‌ పర్యటనతో ముడిపెట్టడాన్ని కూడా హసీనా ప్రశ్నించారు. డిసెంబర్‌లో తానే స్వయంగా బంగ్లాదేశ్‌కు తిరిగి వెళ్తానని చెప్పారు.
అదే సమయంలో బంగ్లాదేశ్‌లో విద్యుత్‌, గ్యాస్‌ కొరత, ఎరువుల కొరత, జీవన వ్యయ సంక్షోభం నెలకొన్న సమయంలో చైనా నుంచి 2.3 బిలియన్‌ డాలర్ల విలువైన యుద్ధ విమానాలను కొనుగోలు చేయాలని బంగ్లాదేశ్‌ ప్రభుత్వం తీసుకున్న నిర్ణయాన్ని కూడా హసీనా ప్రశ్నించారు.
ప్రస్తుతం హసీనా అప్పగింత అంశం చట్టపరమైన ప్రక్రియలో ఉండటంతో.. ఆమెను ఎప్పుడు బంగ్లాదేశ్‌కు పంపుతారనే దానిపై ఎలాంటి కాలపరిమితిని భారత్‌ ప్రకటించలేదు.