Trump Tariffs: సుంకాలపై 90 రోజుల బ్రేక్‌.. డొనాల్డ్ ట్రంప్ నిర్ణయానికి కారణం ఏమై ఉండొచ్చు..!
ఈ వార్తాకథనం ఏంటి
ప్రతీకార సుంకాల విధానంతో అంతర్జాతీయంగా సంచలనం రేపిన అమెరికా అధ్యక్షుడు డొనాల్డ్ ట్రంప్ అనూహ్యంగా వెనక్కి తగ్గారు.
చైనాను మినహాయించి మిగతా అనేక దేశాలపై టారిఫ్‌ ల అమలును 90 రోజుల పాటు నిలిపివేస్తున్నట్టు ప్రకటించారు.
ఇప్పటివరకు "తగ్గేదేలే" అనే ధోరణితో ముందుకు సాగిన ట్రంప్ ఇంత అనూహ్యంగా ఎందుకు మారిపోయారు?
ఈ మార్పుకు కారణం 'బాండ్ మార్కెట్' అని ఆర్థిక నిపుణులు విశ్లేషిస్తున్నారు.
ఏప్రిల్ 2న ట్రంప్ భారత్‌తో పాటు ప్రపంచంలోని అనేక దేశాలపై భారీ స్థాయిలో ప్రతీకార సుంకాలు విధించారు.
ఈ నిర్ణయంతో ప్రపంచ మార్కెట్లు తీవ్ర ఒడిదుడుకులకు లోనయ్యాయి. వాణిజ్య యుద్ధ భయాలు నెలకొన్నాయి.
వివరాలు
ఇది సంపద సృష్టించుకునే సమయం
అంతర్జాతీయ స్థాయిలో మాంద్యం వచ్చే ప్రమాదం ఉందని నిపుణులు హెచ్చరించారు.
రిపబ్లికన్ పార్టీలోని నాయకులు, కార్పొరేట్ రంగ ప్రతినిధులు కూడా ఇదే సూచనలు చేశారు.
అయినప్పటికీ ట్రంప్ మాత్రం తాను తీసుకున్న నిర్ణయం తీరని రీతిలో సరైందని గట్టి ధీమాతో కొనసాగారు.
"ఇది సంపద సృష్టించుకునే సమయం" అంటూ సుంకాల విధానాన్ని సమర్థించుకున్నారు.
ఎవరు నచ్చచెప్పినా వినలేదు. కానీ చివరికి ఆశ్చర్యంగా 90 రోజుల విరామాన్ని ప్రకటించారు.
వివరాలు
ఆ ఒక్క కారణం వల్లేనా..?
ట్రంప్ నిర్ణయం వెనుక ప్రధాన కారణం 'బాండ్ మార్కెట్' అని తెలుస్తోంది.
యూఎస్ ట్రెజరీ మార్కెట్‌లో కనిపించిన ప్రతికూల పరిణామాల నేపథ్యంలో ఆందోళన మొదలైంది.
అమెరికా ట్రెజరీ సెక్రటరీ స్కాట్ బెసెంట్ ఈ విషయాన్ని ట్రంప్ దృష్టికి తీసుకెళ్లినట్టు సమాచారం.
ట్రెజరీ మార్కెట్‌లో భారీ అమ్మకాల ప్రభావం పట్ల వైట్‌హౌస్ ఆర్థిక సలహాదారులు కూడా అధ్యక్షుడికి స్పష్టమైన నివేదిక ఇచ్చినట్టు చెబుతున్నారు.
విరామం ప్రకటించిన అనంతరం ట్రంప్ మీడియాతో మాట్లాడుతూ బాండ్ మార్కెట్‌పై వ్యాఖ్యలు చేయడం విశేషం.
"బాండ్ మార్కెట్ చాలా ఆసక్తికరంగా ఉంది. ప్రస్తుతం అది గొప్ప స్థితిలో ఉంది. కానీ దాని భవిష్యత్తు గురించి ప్రజలు గందరగోళంలో ఉన్నారు. కొంతమంది అసంతృప్తిగా ఉన్నారు" అని ట్రంప్ అన్నారు.
వివరాలు
బాండ్ మార్కెట్ అంటే ఏమిటి?
బాండ్లు అంటే దీర్ఘకాలికంగా రాబడి ఇచ్చే, తక్కువ రిస్క్ ఉన్న పెట్టుబడి మార్గం.
సంస్థలు బాండ్ల రూపంలో నిధులు సేకరించి, ఒక నిర్దిష్ట కాలానికి ఒక నిర్దిష్ట వడ్డీ రేటుతో మదుపుదారులకు తిరిగి చెల్లిస్తాయి.
స్టాక్స్‌కి, బాండ్లకు మధ్య ముఖ్యమైన తేడా ఏమిటంటే.. స్టాక్ హోల్డర్లు కంపెనీలో ఈక్విటీ వాటాదారులైతే, బాండ్ హోల్డర్లు రుణదారులుగా (క్రెడిటర్స్) ఉంటారు.
ప్రభుత్వాలు, కార్పొరేట్ సంస్థలు ఇలా రెండింటూ బాండ్లు జారీ చేస్తూ ఉంటాయి.
ప్రభుత్వ బాండ్లకు సార్వభౌమ హామీ ఉంటుంది, కనుక అవి మదుపుదారులకు భద్రతతో కూడిన పెట్టుబడి అవకాశంగా మారుతాయి.