Tesla Model Y: టెస్లా ముంబై షోరూమ్ ప్రారంభం.., ₹60L ధరతో మోడల్ Y విడుదల..

వ్రాసిన వారు Sirish Praharaju

Jul 15, 2025

11:15 am

ఈ వార్తాకథనం ఏంటి

ఎలాన్ మస్క్‌కి చెందిన టెస్లా సంస్థ భారతదేశ మార్కెట్‌లోకి అధికారికంగా ప్రవేశించింది. ముంబై నగరంలో తన తొలి షోరూమ్‌ను ఈ రోజు టెస్లా ప్రారంభించింది. మొదటిగా టెస్లా తన మోడల్ Y అనే ఎలక్ట్రిక్ కారును విక్రయించనుంది. ఈ మోడల్ ప్రపంచవ్యాప్తంగా టెస్లా అమ్మకాలలో అత్యధికంగా అమ్ముడైన కారుగా నిలిచింది. భారత మార్కెట్‌లో ఈ మోడల్ RWD (రియర్ వీల్ డ్రైవ్) వేరియంట్‌తో పాటు,లాంగ్-రేంజ్ RWD వేరియంట్ రూపాల్లో వినియోగదారులకు అందుబాటులోకి రానుంది. RWD వేరియంట్ ప్రారంభ ధర రూ. 59.89 లక్షలుగా నిర్ణయించగా, లాంగ్-రేంజ్ వేరియంట్ ధర రూ. 67.89 లక్షలుగా నిర్ణయించారు. ఆన్-రోడ్ ధరలు పరిశీలిస్తే, RWD వేరియంట్ ధర రూ. 61.07 లక్షలకు చేరుకుంటుంది.

వివరాలు

కార్ల ధరల్లో 18 శాతం జీఎస్టీతో పాటు రూ.50,000 అడ్మినిస్ట్రేషన్, సర్వీస్ ఫీజులు

లాంగ్-రేంజ్ వేరియంట్ విషయంలో ఆన్-రోడ్ ధర రూ. 69.15 లక్షలకు పెరుగుతుంది. టెస్లా అధికారిక వెబ్‌సైట్ ప్రకారం, కార్ల ధరల్లో 18 శాతం జీఎస్టీతో పాటు రూ.50,000 అడ్మినిస్ట్రేషన్, సర్వీస్ ఫీజులు కూడా కలిపి లెక్కించనున్నారు. కస్టమర్లు తమ అవసరాలకు అనుగుణంగా కారును కస్టమైజ్ చేసుకునే అవకాశాన్ని కూడా టెస్లా అందిస్తోంది. దీనివల్ల ఆన్-రోడ్ ధరల్లో మార్పులు చోటుచేసుకుంటాయి. ఉదాహరణకు,ఫుల్ సెల్ఫ్ డ్రైవింగ్ (FSD) యాడ్-ఆన్ ఎంపిక చేసుకునే కస్టమర్లు అదనంగా రూ. 6 లక్షలు చెల్లించాల్సి ఉంటుంది. అమెరికాలో మోడల్ Y ప్రారంభ ధర సుమారు $44,990 (సుమారు రూ. 38.63 లక్షలు), చైనాలో 263,500 యువాన్లు (సుమారు రూ. 31.57 లక్షలు),జర్మనీలో 45,970 యూరోలు (సుమారు రూ. 46.09 లక్షలు).

వివరాలు

కారులో వెనక భాగంలో ఎలక్ట్రిక్ మోటార్

కానీ, భారతదేశంలో మాత్రం ఈ కార్ ధరలు అత్యంత ఖరీదైనవిగా ఉన్నాయి. ముఖ్యంగా దిగుమతి పన్నులు, లాజిస్టిక్స్ ఖర్చుల వల్ల ధరలు పెరిగినట్లు చెప్పొచ్చు. భారతీయ మార్కెట్‌లో టెస్లా మోడల్ Y రియర్ వీల్ డ్రైవ్ వేరియంట్ 60 kWh బ్యాటరీతో పాటు పెద్ద 75 kWh బ్యాటరీ ప్యాక్ ఆప్షన్‌లను కలిగి ఉంది. ఈ కారులో వెనక భాగంలో ఎలక్ట్రిక్ మోటార్ అమర్చారు. ఇది సుమారు 295 హెచ్‌పీ శక్తిని ఉత్పత్తి చేస్తుంది. 60 kWh బ్యాటరీ వేరియంట్ ఒక్క ఛార్జ్‌తో సుమారు 500 కి.మీ ప్రయాణించగలదు. లాంగ్-రేంజ్ వేరియంట్ విషయంలో ఒక్క ఛార్జింగ్‌తో 622 కి.మీ దూరాన్ని కవరుచేయగలదు.

వివరాలు

టెస్లా మోడల్ Y మొత్తం 7 రకాల ఎక్స్‌టీరియర్ రంగుల్లో..

టెస్లా మోడల్ Y కారులో ముందువైపు 15.4 అంగుళాల ఇన్ఫోటైన్‌మెంట్ డిస్ప్లే, వెనుకవైపు 8 అంగుళాల డిస్ప్లే ఏర్పాటు చేశారు. పవర్ అడ్జస్టబుల్ ఫ్రంట్ సీట్లు, స్టీరింగ్ కాలమ్, డ్యూయల్-జోన్ ఆటోమేటిక్ క్లైమేట్ కంట్రోల్, 19 అంగుళాల క్రాస్‌ఫ్లో వీల్స్, ఫిక్స్‌డ్ గ్లాస్ రూఫ్, పవర్ రియర్ లిఫ్ట్‌గేట్ వంటి అనేక ఆకర్షణీయ ఫీచర్లు ఇందులో ఉన్నాయి. మొత్తంగా టెస్లా మోడల్ Y మొత్తం 7 రకాల ఎక్స్‌టీరియర్ రంగుల్లో వినియోగదారులకు లభించనుంది.