Centre to Slash Fuel Rates: వాహనదారులకు అలెర్ట్..త్వరలోనే తగనున్న ఇంధన ధరలు..కేంద్రం కీలక ప్రకటన
భారతదేశంలోని వాహనదారులకు త్వరలో శుభవార్త అందనుందనే సంకేతాలు కనిపిస్తున్నాయి. కేంద్ర ప్రభుత్వం పెట్రోల్, డీజిల్ ధరలను తగ్గించేందుకు యోచిస్తున్నట్లు విశ్వసనీయ వర్గాల సమాచారం పేర్కొంటోంది. ఈ వార్త గురువారం నాడు పలు ఆంగ్ల టెలివిజన్ ఛానెళ్ల ద్వారా వెలువడింది. అయితే, ఇప్పటి వరకు ధరల తగ్గింపుపై ప్రభుత్వం నుండి అధికారిక ప్రకటన వెలువడలేదు. గత సార్వత్రిక ఎన్నికల ముందు కూడా కేంద్రం పెట్రోల్, డీజిల్ ధరలను లీటర్‌కు రూ. 2 చొప్పున తగ్గించింది, ఇది దేశవ్యాప్తంగా అమలులోకి వచ్చింది.
అంతర్జాతీయ మార్కెట్లో తగ్గిన చమురు ధరలు
రష్యా-ఉక్రెయిన్ యుద్ధం ప్రారంభ సమయంలో చమురు ధరలు అంతర్జాతీయ మార్కెట్లో పెరిగిపోయాయి. ఈ సందర్భంలో దేశీయ ఆయిల్ కంపెనీలు తమ ధరలను పెంచలేకపోయాయి, కానీ అంతర్జాతీయ ధరలు తగ్గినప్పటికీ, స్థిరంగానే ఉంచుతూ వస్తున్నాయి. ఈ కారణంగా, ఆయిల్ కంపెనీలు భారీగా లాభాలు సాధించాయి. ఇటీవలి కాలంలో, అంతర్జాతీయ మార్కెట్లో చమురు ధరలు మళ్లీ తగ్గుతున్నాయి. లిబియాలో చమురు ఉత్పత్తి, ఎగుమతి సమస్యలు పరిష్కారం కావడం, చైనాలో డిమాండ్ తగ్గడం వంటి అంశాలు ఇందుకు దారితీసాయి. ఈ పరిణామాల ఫలితంగా, బ్రెంట్ క్రూడాయిల్ ధర కూడా జనవరి తర్వాత కనిష్ట స్థాయికి చేరింది, ప్రస్తుతం ఇది బ్యారెల్‌కు 72 డాలర్ల వద్ద ఉంది.
అసెంబ్లీ ఎన్నికల నేపథ్యంలో పెట్రోల్, డీజిల్ ధరలు తగ్గించే అవకాశం
ఈ పరిణామాల నేపథ్యంలో, భారతదేశంలో మహారాష్ట్ర, హరియాణా వంటి రాష్ట్రాల్లో అసెంబ్లీ ఎన్నికలు జరగనున్న నేపథ్యంలో, కేంద్రం పెట్రోల్, డీజిల్ ధరలను తగ్గించే అవకాశం ఉందని విశ్లేషకులు అభిప్రాయపడుతున్నారు.
