Paytm Q2 Results:పేటీఎం క్యూ2 ఫలితాల ప్రకటన.. రూ.928 కోట్ల నికర లాభం
ఈ వార్తాకథనం ఏంటి
పేటియం బ్రాండ్ పేరుతో పరిచయమైన ప్రముఖ ఫిన్‌టెక్ సంస్థ వన్97 కమ్యూనికేషన్స్ నష్టాల నుంచి తిరిగి తేరుకుంది.
2024-25 ఆర్థిక సంవత్సరం రెండో త్రైమాసికం ఫలితాల్లో, సెప్టెంబర్ 30తో ముగిసిన ఈ త్రైమాసికంలో కంపెనీ అద్భుతమైన రీతిలో రూ.928.3 కోట్ల నికర లాభం సాధించింది.
గత ఏడాది ఇదే త్రైమాసికంలో కంపెనీ రూ.290.5 కోట్ల నష్టాలను చవిచూసిన నేపథ్యంలో, లాభాల పథానికి తిరిగి రావడం విశేషం.
వివరాలు
నష్టాల నుంచి తేరుకొని లాభాలు నమోదు
కంపెనీ ఆపరేషన్స్ రెవెన్యూ మాత్రం 34.1 శాతం తగ్గి రూ.1659.5 కోట్లుగా నమోదు కాగా, నికర లాభం పెరిగేందుకు ప్రధాన కారణం ఉన్నట్లు పేటీఎం వెల్లడించింది.
పేటీఎం సినిమాలు,ఈవెంట్ల టికెట్ల బుకింగ్ వ్యాపారాన్ని జొమాటోకు విక్రయించడం వల్లనే రూ.1345 కోట్ల లాభం వచ్చిన్నట్లు తెలిపింది.
దీంతో, నష్టాల నుంచి తేరుకొని లాభాలు నమోదు చేసినట్లు స్పష్టం చేసింది.
ఫైనాన్షియల్ సర్వీసెస్ విభాగం ఆదాయం 9 శాతం పెరిగి రూ.376 కోట్లుగా నమోదు కాగా, పేటీఎం వ్యాపారం సేవల ఆదాయం 34 శాతం పెరిగి రూ.981 కోట్లుగా నమోదైంది.
ఈ క్రమంలో, కంపెనీ ఖర్చులు 17 శాతం తగ్గి రూ.1080 కోట్లకు దిగివచ్చాయని వెల్లడించింది.
వివరాలు
ఆర్‌బిఐ ఆంక్షల కారణంగా పేటీఎంకి ఆర్థిక ఇబ్బందులు
క్యూ2 ఫలితాల ప్రకటన తర్వాత, పేటీఎం షేరు బీఎస్ఈలో 4.73 శాతం నష్టంతో రూ.692.15 వద్ద ముగిసింది.
అలాగే, ఎన్ఎస్ఈలో ఈ షేరు 5.78 శాతం నష్టంతో రూ.684 వద్ద స్థిరపడింది. అయితే, గత ఆరు నెలల్లో ఈ షేరు 81 శాతం మేర లాభం అందించిందని గమనించాలి.
రిజర్వ్ బ్యాంక్ ఆఫ్ ఇండియా (ఆర్‌ బి ఐ) విధించిన ఆంక్షల కారణంగా పేటీఎం ఆర్థిక ఇబ్బందులు ఎదుర్కొంటోంది.
దీనితో, షేరు ధర క్రమంగా పడిపోయింది. కంపెనీ వ్యాపారం కూడా నష్టాన్ని చవిచూసింది.
ఈ నేపథ్యంలో, ప్రముఖ ఆన్‌లైన్ ఫుడ్ డెలివరీ సంస్థ జొమాటోతో చర్చలు ప్రారంభించి, సినిమాలు, ఈవెంట్ల టికెట్ బుకింగ్ వ్యాపారాన్ని జొమాటాకు విక్రయించింది.