UPI Lite: యూపీఐ లైట్ వాలెట్ పరిమితిని రూ.5వేలకు పెంచుతూ ఆర్‌బీఐ నిర్ణయం
యూపీఐ లైట్ (UPI Lite) సంబంధించి రిజర్వ్ బ్యాంక్ ఆఫ్ ఇండియా (RBI) ఒక ముఖ్యమైన ప్రకటన చేసింది. యూపీఐ లైట్ వాలెట్ పరిమితిని రూ. 2,000 నుంచి రూ. 5,000కు పెంచింది. అదేవిధంగా, ఒక్కో లావాదేవీ పరిమితిని రూ. 500 నుంచి రూ. 1,000కు పెంచుతున్నట్లు తెలిపింది. డిజిటల్ చెల్లింపులను వేగవంతం చేసి మరింత ప్రోత్సహించేందుకు ఈ మార్పులు చేయబడినట్లు ఆర్‌ బి ఐ వెల్లడించింది. అక్టోబర్‌లో నిర్వహించిన ఎంపీసీ సమావేశంలో ఈ ప్రకటనను ఆర్‌బీఐ ప్రకటించింది.
పిన్‌ ఎంటర్ చేయకుండానే చిన్న మొత్తంలో పేమెంట్స్‌ చేయడానికి ఉపయోగపడే విధానం
యూపీఐ లైట్ అనేది పిన్‌ ఎంటర్ చేయకుండానే చిన్న మొత్తంలో పేమెంట్స్‌ చేయడానికి ఉపయోగపడే విధానంగా రూపొందించబడింది. ఈ సేవలు ఉపయోగించేందుకు, యూపీఐ లైట్ వాలెట్‌లో ముందుగానే బ్యాలెన్స్‌ చేర్చుకోవాలి. బ్యాంకు ఖాతా నుంచి యూపీఐ ద్వారా ఈ బ్యాలెన్స్‌ను లోడ్ చేసుకోవచ్చు. తదనంతరం, ప్రతి లావాదేవీ సమయంలో పిన్‌ అవసరం లేకుండా స్కాన్ చేసి చెల్లింపులు చేయవచ్చు. ముఖ్యంగా యూపీఐ లైట్‌ను విస్తృతంగా ఉపయోగించే వారికి ఈ నిర్ణయం ఎంతో అనుకూలంగా ఉంటుంది, ఎందుకంటే పదే పదే వాలెట్‌లో మొత్తాన్ని లోడ్ చేయాల్సిన అవసరం తగ్గుతుంది.
