Indian Rupee: రూపాయి పతనంపై ఆర్‌బీఐ జోక్యం చేసుకుంటే.. ఎగుమతులపై ప్రభావం పడే ఛాన్స్..
ఈ వార్తాకథనం ఏంటి
అమెరికా డాలరు బలపడుతున్నందున, భారత రూపాయి దానితో పోలిస్తే క్షీణిస్తోందని రిజర్వ్ బ్యాంక్ ఆఫ్ ఇండియా (ఆర్‌ బి ఐ) మాజీ గవర్నర్ రఘురామ్ రాజన్ అభిప్రాయపడ్డారు.
రూపాయి విలువను కాపాడేందుకు ఆర్‌బీఐ జోక్యం చేసుకుంటే, భారత ఎగుమతులపై ప్రభావం పడే అవకాశం ఉందని హెచ్చరించారు.
ఇందుకు బదులుగా ఉద్యోగాలు సృష్టించడం, దేశీయ వినియోగం పెంచేందుకు మద్దతు ఇచ్చే చర్యలను తీసుకోవాలని ప్రభుత్వానికి ఆయన సూచించారు.
వివరాలు
వివిధ అంశాలపై ఆయన ఏమన్నారంటే..
ట్రంప్ రాకపై: డొనాల్ ట్రంప్ రెండోసారి అమెరికా అధ్యక్షుడిగా బాధ్యతలు చేపట్టిన తర్వాత, ఆయన చేపడుతున్న చర్యలు అంతర్జాతీయ, భారత ఆర్థిక వ్యవస్థకు అనిశ్చితిని కలిగించవచ్చని రఘురామ్ రాజన్ చెప్పారు.
ట్రంప్ తన ఎన్నికల ప్రచారంలో ప్రకటించిన విధానాలకు అనుగుణంగా ఇమిగ్రేషన్, టారిఫ్‌లపై నిర్ణయాలు తీసుకున్నారని చెప్పారు.
ఈ నిర్ణయాలు ప్రపంచ ఆర్థిక వ్యవస్థపై ఎలా ప్రభావం చూపుతాయనేది చాలా కీలకం.
డాలరు బలోపేతంపై: ఇతర కరెన్సీలతో పోలిస్తే అమెరికా డాలరు బలపడడానికి, ట్రంప్ టారిఫ్‌ల హెచ్చరికలు కారణమని రాజన్ అభిప్రాయపడ్డారు.
టారిఫ్‌లు పెంచడం వలన, ఇతర దేశాల నుంచి అమెరికాకు దిగుమతులు తగ్గుతాయి, దీని ద్వారా కరెంట్ ఖాతా లోటు, వాణిజ్య లోటు తగ్గుతుంది.
వివరాలు
ఎగుమతిదార్లకు ఇబ్బందులు
ఈ ప్రభావం వలన ప్రపంచంలో డాలర్ల పరిమాణం తగ్గి, డాలరు బలపడుతుంది.
అలాగే, అమెరికాకు ఎగుమతులు చేసే కంపెనీలు తమ తయారీని అమెరికాలోనే చేయడం ప్రారంభిస్తే, మరింత మూలధనం అమెరికాకు చేరుతుంది, ఇది కూడా డాలరుపై సానుకూల ప్రభావం చూపుతుంది.
ఆర్‌బీఐ చర్యలపై: ఆర్‌బీఐ ఇప్పటిదాకా ఎలాంటి తొందరపాటు చర్యలు తీసుకోలేదు. రూపాయి విలువను నిర్దిష్ట స్థాయిలో ఉంచేందుకు జోక్యం చేసుకోలేదు.
మార్కెట్ పరిస్థితులకు అనుగుణంగా రూపాయి తన స్థాయిని స్వతహాగా నిర్ణయించుకోవడం అర్థవంతమని రాజన్ చెప్పారు.
రూపాయి కదలికలపై ఆర్‌బీఐ జోక్యం చేసుకుంటే, మార్కెట్లో పెద్ద ఊగిసలాటకు దారి తీస్తుందని, దీనివల్ల ఎగుమతిదార్లకు ఇబ్బందులు కలుగుతాయని హెచ్చరించారు.
వివరాలు
బడ్జెట్‌పై:
ఆర్థిక మందగమనంపై ప్రస్తుతం ఆందోళన చెందాల్సిన అవసరం లేదని, సెప్టెంబరు త్రైమాసిక గణాంకాలతో పూర్తిగా పరిస్థితిని అంచనా వేయలేమని రాజన్ చెప్పారు.
ఇటీవలి కొన్నేళ్లలో ఆర్థిక వృద్ధి బలంగా నమోదైనట్లయితే, స్థిరమైన వృద్ధిని కొనసాగించేందుకు భారీ పెట్టుబడులు, వినియోగ వృద్ధి అవసరం. మరిన్ని ఉద్యోగాలు సృష్టించడానికి బడ్జెట్‌లో చర్యలు తీసుకోవాలని ఆయన సూచించారు.
ప్రజల వినియోగం పెరిగితే, కొత్త ప్రైవేటు పరిశ్రమలు ఏర్పడతాయన్నది ఆయన అభిప్రాయం.
ఈ మొత్తం ప్రక్రియ ఒక చక్రంలా పనిచేసి ఆర్థిక సమస్యలను పరిష్కరిస్తుందని రాజన్ తెలిపారు.