Stock Market : భారీ లాభాల్లో ముగిసిన దేశీయ స్టాక్ మార్కెట్లు సూచీలు.. సెన్సెక్స్ 855, నిఫ్టీ 273 పాయింట్లు చొప్పున లాభం
ఈ వార్తాకథనం ఏంటి
స్టాక్ మార్కెట్ సూచీలు వరుసగా ఐదో ట్రేడింగ్ సెషన్‌లో కూడా లాభాల బాటలో కొనసాగాయి. అంతర్జాతీయంగా మార్కెట్లు మిశ్రమ సంకేతాలను ఇవ్వగలిగినా, దేశీయంగా మన మార్కెట్లు మాత్రం బలంగా పరిగెత్తాయి. అమెరికా టారిఫ్‌లపై ఉన్న ఆందోళనలు తగ్గుముఖం పట్టడం, సంస్థల త్రైమాసిక ఫలితాలు ఆశాజనకంగా ఉండటం, విదేశీ ఇన్వెస్టర్ల నుంచి పెట్టుబడులు మళ్లీ రావడం వంటి అంశాలు మార్కెట్‌లో సానుకూల మూడును కలిగించాయి. ఫలితంగా సెన్సెక్స్ మళ్లీ 79,000 మార్కును అధిగమించగా, నిఫ్టీ కూడా 24,000 మార్కు ఎగువన స్థిరపడింది. బ్యాంకింగ్ రంగ షేర్లలో కొనుగోళ్లతో బ్యాంక్ నిఫ్టీ 55,000 మార్కును దాటి 55,304 పాయింట్ల వద్ద సరికొత్త గరిష్ఠ స్థాయిని నమోదు చేసింది.
వివరాలు
855 పాయింట్ల లాభంతో 79,408.50 వద్ద ముగిసింది
రోజు ప్రారంభంలో సెన్సెక్స్ 78,903.09 పాయింట్ల వద్ద (గత ముగింపు 78,553.20)లాభాలతో ట్రేడింగ్‌ను ప్రారంభించింది. ఆపై మొత్తం సెషన్‌లోనూ లాభాల దిశగా కదలికలు కొనసాగించడంతో ఇంట్రాడే గరిష్ఠంగా 79,635.05 పాయింట్లను తాకింది. చివరకు 855 పాయింట్ల లాభంతో 79,408.50 వద్ద ముగిసింది. అలాగే నిఫ్టీ కూడా 273.90 పాయింట్ల లాభంతో 24,125.55 వద్ద స్థిరపడింది. విదేశీ మారకంలో రూపాయి మారకం విలువ డాలరుతో పోలిస్తే 85.13గా నమోదైంది.
వివరాలు
బ్రెంట్ క్రూడ్ ఆయిల్ బ్యారెల్ ధర సుమారు 66 డాలర్లు
సెన్సెక్స్‌కు చెందిన 30 షేర్లలో టెక్ మహీంద్రా, ఇండస్ ఇండ్ బ్యాంక్, పవర్ గ్రిడ్ కార్పొరేషన్, మహీంద్రా అండ్ మహీంద్రా వంటి స్టాక్స్ ఎక్కువగా లాభపడగా, అదానీ పోర్ట్స్, హిందుస్థాన్ యూనిలీవర్, ఐటీసీ, ఏషియన్ పెయింట్స్, నెస్లే ఇండియా వంటి షేర్లు నష్టాలు చవిచూశాయి. అంతర్జాతీయ మార్కెట్‌లో బ్రెంట్ క్రూడ్ ఆయిల్ బ్యారెల్ ధర సుమారు 66 డాలర్ల వద్ద కొనసాగుతుండగా, బంగారం ఔన్సు ధర 3397 డాలర్ల వద్ద రికార్డు స్థాయిలో ఉంది.
వివరాలు
మార్కెట్ లాభాలకు ప్రధాన కారణాలు ఇవే:
హెచ్‌డీఎఫ్‌సీ బ్యాంక్, ఐసీఐసీఐ బ్యాంక్ త్రైమాసిక ఫలితాలు ఆశాజనకంగా ఉండటంతో బ్యాంకింగ్ రంగ షేర్లు బలంగా పటిష్టంగా కనిపించాయి. విదేశీ సంస్థాగత మదుపుదారులు భారత మార్కెట్లపై మళ్లీ నమ్మకాన్ని కలిగి పెట్టుబడులు పెట్టారు. గత వారం కాలంలో మాత్రమే వీరు రూ.8,472 కోట్ల మేర పెట్టుబడులు చేశారు. భారత్, అమెరికా మధ్య త్వరలో ద్వైపాక్షిక వాణిజ్య ఒప్పందం జరిగే అవకాశముందన్న ఊహాగానాలు మదుపర్ల సెంటిమెంట్‌ను మెరుగుపరిచాయి. ఏప్రిల్ 23 నుండి ఈ ఒప్పందంపై రెండు దేశాల మధ్య చర్చలు ప్రారంభం కానున్నాయి. రూపాయి విలువ డాలరుతో పోలిస్తే బలపడుతోంది. నేటి ట్రేడింగ్ సెషన్‌లో రూపాయి 25 పైసలు బలపడడంతో 85.05 వద్ద ట్రేడవుతోంది. అంతేగాక,చమురు ధరలు తగ్గడం కూడా మార్కెట్‌లకు మద్దతు కలిగించింది.