OG: ఓజి సినిమా షూటింగ్ లో అడుగుపెట్టిన ఇమ్రాన్ , ప్రియాంక
పవర్ స్టార్ పవన్ కళ్యాణ్ నటిస్తూ మధ్యలో ఆగిపోయిన సినిమాలను తిరిగి ప్రారంభించారు. హరిహర వీరమల్లు చిత్రానికి సంబంధించి ఇటీవల విజయవాడలో ప్రత్యేకంగా ఏర్పాటు చేసిన సెట్లో కొన్ని రోజుల పాటు షూటింగ్ నిర్వహించారు. పవన్ కళ్యాణ్ అభిమానులు చాలాకాలంగా ఎదురు చూస్తున్న మరో సినిమా "ఓజి" (OG) కూడా ఇప్పుడు ప్రారంభమైంది. ఈ సినిమా షూటింగ్ గత మూడు రోజులుగా హైదరాబాద్‌లోని రామోజీ ఫిల్మ్ సిటీలో జరుగుతోంది, ముఖ్యంగా నైట్ సీన్లను దర్శకుడు సుజీత్ తెరకెక్కిస్తున్నాడు.
నేడు లేదా రేపు షూట్‌లో పవన్ కళ్యాణ్
పవన్ కళ్యాణ్ అభిమానులంతా ప్రస్తుతం "ఓజి" పై ఎక్కువగా దృష్టి సారించారు. ఈ సినిమాలో బాలీవుడ్ నటుడు ఇమ్రాన్ హష్మీ ప్రతినాయకుడి పాత్రలో కనిపించనున్నారు. పవన్ కళ్యాణ్ సరసన ప్రియాంక మోహన్ కథానాయికగా నటిస్తోంది. ప్రస్తుతం జరుగుతున్న షెడ్యూల్‌లో ఇమ్రాన్ హష్మీ, ప్రియాంక మోహన్ కూడా పాల్గొనబోతున్నారు. పవన్ కళ్యాణ్ కూడా నేడు లేదా రేపు షూట్‌లో పాల్గొననున్నారని సమాచారం. ఇమ్రాన్ హష్మీ, పవన్ కళ్యాణ్ కాంబోలో కీలకమైన సీన్లు చిత్రీకరించనున్నారని వార్తలు వినిపిస్తున్నాయి.
త్వరలోనే ఫస్ట్ సింగిల్‌
మరోవైపు,ఈ సినిమా మ్యూజిక్ సిట్టింగ్స్‌ను మ్యూజిక్ డైరెక్టర్ థమన్ ప్రారంభించారు. ఈ సినిమా నుండి ఫస్ట్ సింగిల్‌ను త్వరలోనే విడుదల చేసేందుకు సన్నాహాలు చేస్తున్నారు. తాజాగా "ఓజి" చిత్రానికి సంబంధించిన ప్రత్యేక కవర్ పిక్‌ను మేకర్స్ రిలీజ్ చేశారు. ఈ సినిమాలో పవన్ కళ్యాణ్ గ్యాంగ్‌స్టర్ పాత్రలో కనిపించబోతుండగా, అభిమానులకు వింటేజ్ పవన్ కళ్యాణ్‌ను మళ్లీ చూడగలమనే నమ్మకంతో యూనిట్ ఉంది. ఈ సినిమాలోని హై లెవెల్ యాక్షన్ ఎపిసోడ్స్ పవన్ కళ్యాణ్ అభిమానులకు ఒక మంచి విశేషం కానున్నాయని టాక్ నడుస్తోంది.
