Varanasi: 'వారణాసి' సినిమా కథ లీక్?..కాశీ నుంచి రాజమౌళి స్టోరీ స్టార్ట్
ఈ వార్తాకథనం ఏంటి
సూపర్ స్టార్ మహేష్ బాబు , దర్శక ప్రతిభ ఎస్.ఎస్. రాజమౌళి కలయికలో తెరకెక్కుతున్న భారీ సాహసకథా చిత్రం 'వారణాసి'. చాలా కాలం క్రితమే ఈ సినిమా చిత్రీకరణ ప్రారంభమైంది. హాలీవుడ్ స్థాయిలో నిర్మాణ విలువలతో దీన్ని తీర్చిదిద్దుతున్నారు చిత్రబృందం. 'ఆర్ఆర్ఆర్' వంటి అంతర్జాతీయ విజయానంతరం రాజమౌళి రూపొందిస్తున్న చిత్రం కావడంతో 'వారణాసి'పై ప్రేక్షకుల్లో అపారమైన ఆసక్తి నెలకొంది. అనౌన్స్మెంట్ వీడియో విడుదలైనప్పటి నుంచి ఈ సినిమా ఎలా ఉండబోతోంది? అసలు కథ ఏమిటి? అనే ప్రశ్నలకు సమాధానం కోసం అభిమానులు ఆసక్తిగా ఎదురుచూస్తున్నారు. ఈ నేపథ్యంలో ఇటీవల బయటకు వచ్చిన కథా వివరాలు సోషల్ మీడియాలో విపరీతంగా వైరల్ అవుతున్నాయి.
వివరాలు
కథ ఇదేనా?
ప్రచారంలో ఉన్న కథ ప్రకారం, కాశీ నగరాన్ని నేపథ్యంగా చేసుకుని ఈ చిత్రం సాగుతుంది. ఇందులో ఒక శివభక్తుడు కాలగర్భంలో దాగి ఉన్న అపార శక్తి గల విశ్వ కళాఖండాన్ని వెతికే సాహసయాత్రను ప్రారంభిస్తాడు. ఆధ్యాత్మిక రహస్యాలను వెలికితీస్తూ ముందుకు సాగే ఈ ప్రయాణంలో, అతన్ని నడిపిస్తున్న శక్తుల వెనుక ప్రపంచాధిపత్యం కోసం కుట్ర పన్నే ఒక క్రూర మేధావి ఉన్నాడనే నిజం బయటపడుతుంది. ఆధ్యాత్మికత పేరిట జరుగుతున్న ఈ అంతర్జాతీయ కుట్రను అడ్డుకోవడం తన ధ్యేయమని ఆ భక్తుడు గ్రహిస్తాడు. పవిత్రమైన కాశీ సాక్షిగా, అధికార దాహంతో ఉన్న దుష్టశక్తులకు ఎదురుగా అచంచలమైన భక్తి మధ్య జరిగే ఘర్షణ ఈ చిత్రానికి ప్రధానాంశం.
వివరాలు
నెట్టింట వైరల్ అవుతున్న స్టోరీ ఇదే..
తనను సాధనంగా ఉపయోగించుకోవాలనుకున్న శక్తులను ఎదుర్కొని, ఆ దివ్యశక్తిని ప్రపంచ హితానికి ఎలా మలిచాడనే అంశమే ఈ ఉత్కంఠభరిత కథకు కేంద్రబిందువు. ప్రస్తుతం ఈ కథ సామాజిక మాధ్యమాల్లో విస్తృతంగా వైరల్ అవుతోంది. ఇదే అసలు కథగా తేలితే, భారతీయ సినిమా రంగంలో ఉన్న అన్ని రికార్డులను ఈ చిత్రం అధిగమించే అవకాశముందని భావిస్తున్నారు. అంతేకాకుండా, రూ.2000 కోట్లకు పైగా వసూళ్లు సాధించే చిత్రంగా కూడా ఇది నిలిచే అవకాశం ఉందని అంచనాలు వ్యక్తమవుతున్నాయి. 2027 ఏప్రిల్ 7న విడుదలకు సిద్ధమవుతున్న ఈ చిత్రం ఎలాంటి సంచలనాలు సృష్టిస్తుందో చూడాలి.