ఆర్ఆర్ఆర్ సినిమాకు సంవత్సరం: విడుదల నుండి ఆస్కార్ దాకా ఆర్ఆర్ఆర్ ప్రయాణం
తెలుగు సినిమాకు ఆస్కార్ వస్తుందని కలలో కూడా ఎవ్వరూ ఊహించి ఉండరు. ఊహలకందని విషయాలను తన సినిమాలో చూపించే రాజమౌళి, అవే ఊహలతో ఎవ్వరూ ఊహించని దాన్ని నిజం చేసి చూపించాడు. ఆర్ఆర్ఆర్ లోని నాటు నాటు పాటకు ఆస్కార్ రావడం భారతీయ సినిమాలో ఒక చారిత్రక ఘట్టం. అందుకే రాజమౌళి, ది గ్రేట్ అయ్యాడు. ఈరోజుతో ఆర్ఆర్ఆర్ సినిమా రిలీజై సంవత్సరం పూర్తయ్యింది. ఈ ప్రయాణంలో ఆర్ఆర్ఆర్ సాధించిన ఘనతలు ఎన్నో ఉన్నాయి. అవన్నీ ఆస్కార్ దాకా ఎలా తీసుకెళ్లాయో ఒకసారి చూద్దాం. ఆర్ఆర్ఆర్ మూవీ రిలీజయ్యాక ఇండియాలో మంచి సక్సెస్ అయ్యింది. అటు అమెరికాలో మంచి కలెక్షన్లు వచ్చాయి. కాకపోతే అమెరికాలో ఈసారి అమెరికన్స్ కూడా ఆర్ఆర్ఆర్ ని చూసారు.
ఆర్ఆర్ఆర్ ను నెత్తిన పెట్టుకున్న అమెరికా ఫిలిమ్ జర్నలిస్టులు
అమెరికాలోని సాధారణ జనాలు కాకుండా, హాలీవుడ్ కి చెందిన క్రిటిక్స్ ఆర్ఆర్ఆర్ సినిమాను చూసారు. చూసి ఊరుకోకుండా రివ్యూలు రాసారు, యూట్యూబ్ వీడియోలు చేసారు. ఒకరకంగా చెప్పాలంటే వాళ్ళ వల్లే ఆర్ఆర్ఆర్ కు హాలీవుడ్ లో అంతటి ప్రాచుర్యం లభించింది. ఈ విధంగా హాలీవుడ్ జనాలకు ఆర్ఆర్ఆర్ మీద ఆసక్తి కలిగింది. ఆ ఆసక్తి కారణంగానే నెట్ ఫ్లిక్స్ లో ఆర్ఆర్ఆర్ రిలీజ్ కాగానే ఎగబడి మరీ సినిమా చూశారు ఆర్ఆర్ఆర్ కు ప్రపంచ వ్యాప్తంగా ఆదరణ దక్కడానికి మరో కారణం నెట్ ఫ్లిక్స్ అని చెప్పవచ్చు. నెట్ ఫ్లిక్స్ లో దాదాపు 7వారాల పాటు నంబర్ వన్ లో నిలిచింది ఆర్ఆర్ఆర్. దాంతో ప్రపంచవ్యాప్తంగా ఆర్ఆర్ఆర్ గురించి చర్చ మొదలైంది.
ఎన్ కోర్ ల రూపంలో ఆర్ఆర్ఆర్ కు పెరిగిన ఆదరణ
ప్రపంచవ్యాప్తంగా ఆర్ఆర్ఆర్ గురించి చర్చ జరుగుతున్న సమయంలో, అమెరికాలో ఎన్ కోర్ ల రూపంలో ఆర్ఆర్ఆర్ సినిమాను కేవలం ఒక్కరాత్రి కోసమే థియేటర్లలో ప్రదర్శించారు. ఈ ఎన్ కోర్ లకు మంచి రెస్పాన్స్ రావడంతో, ఆర్ఆర్ఆర్ ను ప్రదర్శించే థియేటర్లు బాగా పెరిగాయి. ఆర్ఆర్ఆర్ ప్రత్యేక ప్రదర్శనలు జరుగుతున్నప్పుడు దర్శకుడు రాజమౌళి హాజరు కావడం, సినిమా గురించి మాట్లాడటం.. మొదలగు విషయాల వల్ల ఆర్ఆర్ఆర్ ఎన్ కోర్ లకు డిమాండ్ పెరిగింది. ఆ తర్వాత జపాన్ లో ఆర్ఆర్ఆర్ విడుదల, అక్కడ ముత్తు కలెక్షన్లను దాటి పోవడం, నాటు నాటు పాటకు సోషల్ మీడియాలో వచ్చిన రెస్పాన్స్, ఇవన్నీ అవార్డులను తెచ్చిపెట్టాయి. ఇదంతా సంవత్సర కాలంపాటు నిర్విరామంగా జరిగింది. అందుకే ఆస్కార్ వచ్చింది.
