బ్రో టీజర్: తెరమీద మామా అల్లుళ్ళ హంగామా షురూ
పవన్ కళ్యాణ్ అభిమానులను నిన్నటిదాకా ఊరిస్తూ వచ్చిన బ్రో సినిమా బృందం, కాస్త ఆలస్యమైనా సరే ఈరోజు టీజర్ ను రిలీజ్ చేసింది. దాదాపు నిమిషం నర నిడివి గల టీజర్ లో పవన్ కళ్యాణ్, సాయి ధరమ్ తేజ్ ని మాత్రమే చూపించారు. సాయి ధరమ్ తేజ్ పాత్ర చీకటిలో చిక్కుకుపోయి అరుస్తూ ఉంటే ఆ పాత్రను కాపాడటానికి వచ్చిన పాత్రలో పవన్ కళ్యాణ్ కనిపిస్తున్నట్టుగా చూపించారు. తమ్ముడు సినిమాలోని లుంగీ గెటప్ లో మరోమారు పవన్ కళ్యాణ్ కనిపించాడు. వేరు వేరు సీన్లలో వేరు వేరు రకాలుగా పవన్ కళ్యాణ్ కనిపిస్తున్నట్టుగా అర్థమవుతోంది. చిన్నపాటి టీజర్ లో పాత్రల లుక్స్, సినిమాలోని కొన్ని యాక్షన్ సీక్వెన్స్ మాత్రమే కనిపించాయి.
అభిమానులకు జోష్ ఇచ్చే అంశాలు
ఈ సినిమాలోని కీలకమైన విషయం ఏదైనా ఉందంటే అది టైమ్. కాలం అనేది గడియారానికి అందని ఇంద్రజాలమని పవన్ కళ్యాణ్ డైలాగ్ చెబుతాడు. టీజర్ లో వచ్చే సాంగ్ కూడా కాలానికి సంబంధించినదే ఉంది. అయితే టీజర్ లో ఎక్కడా అసలు కథేంటనేది అర్థం కాలేదు. ట్రైలర్ రిలీజ్ అయితేనే కథ గురించి క్లారిటీ వస్తుంది. కాకపోతే టీజర్ లో పవన్ అభిమానులకు కావాల్సిన అంశాలు పుష్కలంగా ఉన్నాయి. తమిళంలో విజయం అందుకున్న వినోదయ సీతమ్ సినిమాకు రీమేక్ గా బ్రో తెరకెక్కింది. ఈ సినిమాకు సముద్రఖని దర్శకత్వం వహిస్తున్నాడు. మాటల మాంత్రికుడు త్రివిక్రమ్, స్క్రీన్ ప్లే, డైలాగ్స్ అందించారు.
