ఆస్కార్ తో హైదరాబాద్ చేరుకున్న కీరవాణి, ఒక్క మాటతో అందరినీ కట్టి పడేసిన రాజమౌళి
ఈ వార్తాకథనం ఏంటి
సినిమా సినిమాకు తెలుగు సినిమా స్థాయిని పెంచుకుంటూ, చివరికి ఎవ్వరికీ అందని ఆస్కార్ వరకూ తీసుకెళ్ళిన ఘనుడు రాజమౌళి, అమెరికా నుండి హైదరాబాద్ వచ్చేసారు. ఆస్కార్ వేడుకల తర్వాత ఐదు రోజులకు హైదరాబాద్ చేరుకున్నారు రాజమౌళి. ఎమ్ఎ కీరవాణి, ఆయన సతీమణి శ్రీవల్లి, శ్రీ సింహా, రాజమౌళి కొడుకు కార్తికేయ సహా అందరూ ఈరోజు తెల్లవారు జామున శంషాబాద్ విమానాశ్రయంలో కనిపించారు. ఆర్ఆర్ఆర్ బృందాన్ని చూడగానే, అభిమానులు అందరూ చుట్టు ముట్టారు. అభిమానులతో పాటు విలేకరులు కూడా గుమిగూడారు. అభిమానుల గోల మధ్య ఎవ్వరితోనూ మాట్లాడని రాజమౌళి, జై హింద్ అంటూ అక్కడి నుండి వెళ్ళిపోయాడు. ఆ ఒక్క మాట అభిమానులకు ఎంతో ఉత్సాహాన్నిచ్చింది.
రామ్ చరణ్
ప్రధాని మోదీని కలవనున్న రామ్ చరణ్
ప్రస్తుతం రాజమౌళి వీడియో సోషల్ మీడీయాలో వైరల్ అవుతోంది. ఇదిలా ఉంటే ఆల్రెడీ ఎన్టీఆర్, అమెరికా నుండి వచ్చేసారు. ఇక రామ్ చరణ్ ఒక్కడే రావాల్సి ఉంది. ఆయన ఈరోజు ఇండియాకు రానున్నారు. కాకపోతే డైరెక్ట్ గా హైదరాబాద్ కి రాకుండా ఢిల్లీ విమానాశ్రయంలో దిగనున్నారు. అటు నుండి అటే ప్రధాని నరేంద్ర మోదీని కలవనున్నారు. ఈరోజు రాత్రి వేళ, లేదంటే రేపు ఉదయం పూట హైదరాబాద్ చేరుకోనున్నారు రామ్ చరణ్. రామ్ చరణ్ రాక కోసం అభిమానులు ఎంతగానో ఎదురుచూస్తున్నారు. ఆస్కార్ తర్వాత ఆర్ఆర్ఆర్ బృందం మాటలు వినాలని సినీ అభిమానులతో పాటు సాధారణ జనం కుడా ఎంతగానో ఎదురుచూస్తున్నారు.