Vishal-Sai Dhansika: విశాల్ పెళ్లికి ముహూర్తం ఫిక్స్‌.. బర్త్‌డే రోజునే వెడ్డింగ్‌
ఈ వార్తాకథనం ఏంటి
తమిళ నటుడు విశాల్ త్వరలో ఓ ఇంటివాడు కాబోతున్నారు. నటిగా, నాయకుడిగా తమిళ చిత్ర పరిశ్రమలో తనకంటూ ఓ ప్రత్యేక గుర్తింపును తెచ్చుకున్న విశాల్, ఇప్పుడు జీవిత భాగస్వామిగా హీరోయిన్ సాయి ధన్సికను ఎంపిక చేసుకున్నారు. సోమవారం జరిగిన ఓ కార్యక్రమంలో ఈ జంట తమ పెళ్లి తేదీని అధికారికంగా ప్రకటించినట్లు సమాచారం. విశాల్, ధన్సిక 15 ఏళ్లుగా స్నేహితులుగా ఉండగా, ఈ సంవత్సరం ఆ స్నేహం ఏడడుగుల బంధంగా మారనుంది. కొద్ది రోజులుగా విశాల్ పెళ్లి వార్తలు సోషల్ మీడియాలో వైరల్ అవుతూ వస్తున్నాయి. గతంలో పలువురు హీరోయిన్‌లతో ఆయన వివాహం జరగబోతుందన్న వార్తలు వచ్చినా అవన్నీ రూమర్స్‌గానే మిగిలిపోయాయి. కానీ ఈసారి మాత్రం ధన్సికతో పెళ్లిపై ఖచ్చితమైన సమాచారం బయటకొచ్చింది.
Details
త్వరలోనే అధికారిక ప్రకటన
ఈ జంట వచ్చే ఆగస్టు 29న పెళ్లి చేసుకోనున్నట్లు సమాచారం. అదేరోజు విశాల్ జన్మదినం కూడా కావడం గమనార్హం. ఇద్దరి మధ్య దాదాపు 12 సంవత్సరాల వయస్సు తేడా ఉంది. విశాల్ ప్రస్తుతం 47 ఏళ్ల వయసులో ఉండగా, ఆగస్టులో 48కి చేరుకోనున్నారు. ధన్సిక జన్మతేది నవంబర్ 20, 1989 కాగా, ఆమెకు ప్రస్తుతం 35 ఏళ్లు. సాయి ధన్సిక తమిళం, తెలుగుతో పాటు కన్నడ, మలయాళ సినిమాల్లోనూ నటిస్తూ దక్షిణాది సినీ పరిశ్రమలో బాగా గుర్తింపు పొందారు. ముఖ్యంగా 2016లో రజనీ కాంత్‌తో కలిసి నటించిన 'కబాలి' చిత్రంలో ఆయన కుమార్తె పాత్రలో చేసిన నటనకు మంచి ప్రశంసలు వచ్చాయి. త్వరలోనే పెళ్లి తేదీలపై అధికారిక ప్రకటన వెలువడే అవకాశం ఉంది.