Bhopal gas leak: భోపాల్ ఘటనకు 40 ఏళ్లు.. దుర్ఘటన ఆనవాళ్లు మరువలేనిది
భారతదేశ చరిత్రలో ఎప్పటికీ గుర్తుండిపోయే ఘోరమైన దుర్ఘటన 1984 డిసెంబర్ 3న మధ్యప్రదేశ్‌లోని భోపాల్‌లో చోటుచేసుకుంది. నేటికి 40 ఏళ్లు గడిచినా, ఆ అపశ్రుతి వల్ల మిగిలిన గాయాలు ఇంకా మానలేదు. యూనియన్ కార్బైడ్ ఫ్యాక్టరీ నుంచి మిథైల్ ఐసోసైనేట్ (ఎంఐసీ) అనే అత్యంత విషపూరిత వాయువు లీకైన ఈ ఘటన, ప్రపంచంలోనే అతిపెద్ద పారిశ్రామిక ప్రమాదాల్లో ఒకటిగా నిలిచింది. ఆ దురదృష్టకరమైన రాత్రి భోపాల్ నగరం నిద్రిస్తున్న వేళ, మృత్యువు గాలి రూపంలో చొరబడి వేలాది మందిని బలి తీసుకుంది. ఆ దృశ్యాలు ఇంకా అక్కడి ప్రజల మనసుల్ని వేధిస్తూనే ఉన్నాయి.
ఆ రాత్రి అసలు ఏమైంది?
భోపాల్‌లోని యూనియన్ కార్బైడ్ కంపెనీలో పనిచేసిన ఒక అధికారి తన అనుభవాన్ని వివరించారు. "1984 డిసెంబర్ 3న మా రోజులు ఎప్పటిలానే మొదలయ్యాయి. ఉదయం 8 గంటలకు ఇంటి నుంచి బయటకు వచ్చి, ఫ్యాక్టరీకి వెళ్లేందుకు బస్సు కోసం వేచి చూశాను. ఆ సమయంలో ఫ్యాక్టరీ నుంచి విషవాయువు విడుదలై నగరాన్ని కమ్మేసిందని నాకు తెలియదు. బస్సు కోసం ఎదురుచూస్తున్న సమయంలో, అక్కడి వ్యక్తులలో ఒకరు గ్యాస్ లీక్ అయ్యిందని, దాని కారణంగా అనేక మంది మరణించారని చెప్పినప్పుడు షాక్‌కు గురయ్యాను" అని తెలిపారు.
సీనియర్ ప్రెస్ ఫోటోగ్రాఫర్ అనుభవం:
భోపాల్‌కు చెందిన సీనియర్ ప్రెస్ ఫోటోగ్రాఫర్ గోపాల్ జైన్ తన ఇంటికి వచ్చిన ఒక బంధువును చూసి షాక్ అయ్యారు. ఆమె చేతిపై హఠాత్తుగా ఏర్పడిన ఎర్రని వాపును చూసి,ఆ మహిళ తన అనుభవాలను చెబుతూ భోపాల్ నగరమంతా పొగతో కమ్ముకుందని చెప్పింది. ఉదయం హమీదియా హాస్పిటల్ సమీపంలో మృతదేహాలు చెల్లాచెదురుగా పడిపోవడంతో, జైన్‌కి దాని కారణం అర్థమైంది. జైన్ ఆ రోజు జరిగిన ఘటనను గుర్తుచేసుకుంటూ,"ఉదయం ఆసుపత్రికి చేరుకున్నప్పుడు, అక్కడ పరిస్థితి భయానకంగా ఉంది. మృతదేహాలు కుప్పలుగా పడివున్నాయి. అక్కడ గుమిగూడిన ప్రజలు తమ కుటుంబ సభ్యులను వెతుకుతున్నారు. యూనియన్ కార్బైడ్ ప్లాంట్ నుంచి గ్యాస్ లీక్ అయి ఈ దారుణం చోటు చేసుకుందని అర్థమైంది" అని చెప్పాడు.
5,474 మంది మృతి
ప్రభుత్వ లెక్కల ప్రకారం, ఆ దుర్ఘటనలో 5,474 మంది ప్రాణాలు కోల్పోగా, ఐదు లక్షల మందికి పైగా గ్యాస్ విషపూరిత ప్రభావాలకు గురయ్యారు. ఈ ఘటన జరిగినప్పటికీ, నాలుగు దశాబ్దాలు గడిచినా, ఆ కాలంలో జరిగిన గాయం ఇంకా మానలేదు. గ్యాస్ లీకేజీ కారణంగా వేలాది మంది ప్రజలు అనారోగ్య సమస్యలను ఎదుర్కొన్నారు. ఈ విషవాయువు ప్రభావం తరతరాలుగా కొనసాగుతూ, నేటికీ ఎంతోమంది జీవితాలను ప్రభావితం చేస్తుంది.
