Vijay: డీఎంకే,బీజేపీపై టీవీకే విమర్శలు..'వన్ నేషన్, వన్ ఎలక్షన్' అప్రజాస్వామికం..
కేంద్ర ప్రభుత్వం చేపట్టిన 'జమిలి' ఎన్నికల ప్రతిపాదనను ప్రముఖ సినీ నటుడు, తమిళగ వెట్రి కళగం (టీవీకే) పార్టీ వ్యవస్థాపకుడు విజయ్ వ్యతిరేకించారు. దేశమంతా ఒకేసారి ఎన్నికలు నిర్వహించడం ప్రజాస్వామ్యానికి విరుద్ధమని పేర్కొంటూ, ఈ చర్యను ఖండిస్తున్నట్లు వెల్లడించారు. తన పార్టీ జిల్లా కార్యాలయ ఆఫీస్ బేరర్లు, కార్యవర్గ సభ్యులతో ఆదివారం తొలిసారి సమావేశం నిర్వహించారు. ఈ సమావేశంలో టీవీకే సంస్థాగత బలోపేతం, ప్రజలకు చేరువయ్యే అంశాలపై చర్చించి 26 తీర్మానాలను ఆమోదించారు.
తమిళనాడు ప్రజల ఐక్యత, సామరస్యత కోసం టీవీకే
ఈ సందర్భంగా విజయ్ డీఎంకే, బీజేపీ పాలనపై తీవ్ర విమర్శలు చేశారు. తమిళనాడులో శాంతి భద్రతల సమస్యలను ప్రస్తావించారు. అలాగే, కులగణన చేపట్టాలని, పరందూర్‌ విమానాశ్రయం ప్రాజెక్టును రద్దు చేయాలని, మద్యం దుకాణాలను క్రమంగా మూసివేయాలని రాష్ట్ర ప్రభుత్వానికి విజ్ఞప్తి చేశారు. కేంద్రంలోని బీజేపీ సారథ్యంలోని ప్రభుత్వ తీరుపైనా విజయ్ విమర్శలు చేశారు. జాయింట్ పార్లమెంటరీ కమిటీ(JPC)రివ్యూలో ఉన్న వక్ఫ్ సవరణ బిల్లు-2024ను ఫెడరలిజంపై దాడిగా పేర్కొన్నారు. ఈ సవరణ బిల్లును వెంటనే ఉపసంహరించుకోవాలని డిమాండ్ చేశారు.నీట్‌ను రద్దు చేయాలని, విద్యను ఉమ్మడి జాబితా నుంచి రాష్ట్ర జాబితాలోకి మార్చాలని కోరారు. చివరగా,తమ పార్టీ సిద్ధాంతం లౌకికవాదం,సామాజిక న్యాయం అని,తమిళనాడు ప్రజల ఐక్యత, సామరస్యత కోసం టీవీకే పనిచేస్తుందని విజయ్ స్పష్టం చేశారు.
