America :అమెరికాలో తెలుగోడిపై సాటి తెలుగువారి కిరాతకం.. 7నెలలుగా చెప్పింది చేయకుంటే అరాచకం
అగ్రరాజ్యం అమెరికాలో ఆంధ్రప్రదేశ్ రాష్ట్రానికి చెందిన ముగ్గురు యువకుల అరాచక చర్యలు తీవ్ర కలకలం రేపుతున్నాయి. ఈ మేరకు 20ఏళ్ల యువకుడిని బంధించి, తీవ్రంగా హింసించారు.దాదాపు 7 నెలలుగా రాక్షసంగా వేధించారు. అమెరికాలోని మిస్సోరి రాష్ట్రంలోని సెయింట్ లూయిస్ పరిధిలో ఈ ఘోరం జరిగింది. సదరు విద్యార్థిపై సత్తారు వెంకటేశ్ రెడ్డి,నిఖిల్,శ్రవణ్,ఈ ముగ్గురు తమ పైశాచికత్వాన్ని చూపించారు. ఓ రెస్టారెంట్ లో బాధిత యువకుడు మరో వ్యక్తికి తీవ్ర ఆవేదనతో కనిపించగా అతను పలకరించాడు. సమస్య ఉంటే తనకు ఫోన్ చేయమని చెప్పి తన ఫోన్ నెంబర్ కూడా ఇచ్చాడు. ఈ క్రమంలోనే ఈ ముగ్గురు యువకులు నిత్యం తనను వేధిస్తున్నారని వాట్సాప్ ద్వారా మొరపెట్టుకున్నాడు.యువకుడి దుస్థితికి చలించిపోయి పోలీసులకు సమాచారం అందించాడు.
మానవ అక్రమ రవాణా, హింస తదితర సెక్షన్ల కింద నాన్ బెయిలబుల్ కేసు
వెంటనే ఆ ముగ్గురి నివాసానికి చేరుకున్న పోలీసులు లోపలకు వెళ్లేందుకు యత్నించారు. దీంతో ముగ్గురు నిరాకరించారు. పోలీసులు వచ్చిన విషయాన్ని గ్రహించిన బాధితుడు, వెంటనే పోలీసులకు తన గోడును వెళ్లబోసుకున్నాడు. ఆ ముగ్గిరి బారి నుంచి తనను రక్షించాలని అర్థించాడు. అనంతరం ముగ్గురుని అరెస్ట్ చేసిన పోలీసులు మానవ అక్రమ రవాణా, హింస తదితర సెక్షన్ల కింద నాన్ బెయిలబుల్ కేసు నమోదు చేశారు. తనను రోజూ చావబాదేవారని. ఇందుకు పీవీసీ పైపులు, ఇనుప రాడ్లు, విద్యుత్ వైర్లను ఉపయోగించారని బాధితుడు ఆవేదన వ్యక్తం చేశాడు.
వెంకట్ రెడ్డి రోజు 2గంటలు మసాజ్ చేయించుకునేవాడు : బాధితుడు
వాళ్ల దెబ్బలకు నుదుటి నుంచి పాదాల వరకు గాయాలై పక్కటెముకలు విరిగాయని కంటతడి పెట్టుకున్నాడు. ఇంట్లో చాకీరీ చేయించేవారని, వెంకట్ రెడ్డి రోజు 2గంటలు మసాజ్ చేయించుకునేవాడని వివరించాడు. రోజుకు 3గంటలు మాత్రమే పడుకునేందుకు అనుమతించేవారన్నాడు. ఈ హింస కారణంగా అమెరికాకు వచ్చిన తర్వాత 7 నెలల్లో 30 కిలోల మేర బరువు తగ్గినట్లు ఆందోళన వ్యక్తం చేశాడు. దీంతో తీవ్రంగా నీరసించిపోయిన బాధితుడికి ప్రస్తుతం చికిత్స అందిస్తున్నారు. మరోవైపు బాధితుడు ఎవరు, ఎందుకు ఈ ముగ్గురి చేతికి చిక్కాడు, బాధితుడిని వీళ్లు ఎందుకు హింసిస్తున్నారు అన్న కారణాలు తెలియాల్సి ఉంది.
